Олдин хабар берганимиздек, «Ювентус» мавсумолди турне йўналишини ўзгартирди. Энди туринликлар АҚШ эмас, Осиё бўйлаб сафарга чиқишади. Бу ҳақда The New York Times нашри хабар тарқатди. Маълумотларга кўра, Халқаро чемпионлар кубоги ташкилотчилари навбатдаги мусобақа иштирокчилари сафига «бьянконерлар»ни киритмасликка қарор қилишган. Бунга АҚШда сентябрдан буён жамоа ҳужумчиси Криштиану Роналду устидан тергов кетаётгани сабабдир. Ташкилотчиларни иккилантирган жиҳат шуки, португалиялик юлдуз Қўшма Штатлар ҳудудига кирган тақдирда эҳтиёт чораси сифатида ҳибсга олиниши мумкин. Аслида Турин клуби Relevant Sports компанияси томонидан ташкиллаштириладиган Халқаро чемпионлар кубогининг доимий иштирокчиси эди. Аммо шароит тақозоси билан Италия гранди энди Хитой ва Сингапурда йиғин олиб бориши, унинг доирасида «Тоттенхэм» ҳамда «МЮ» клубларига қарши майдонга тушиши кутилмоқда. Қайд этиш керак, ХЧК расмий сайтида 6 март куни чиққан хабарда «Ювентус»нинг бу йилги турнирда ҳам қатнашиши тасдиқланган эди. Эслатиб ўтамиз, 2018 йилнинг кузида америкалик модель Кэтрин Майорга португалиялик юлдуз унга нисбатан зўравонлик ишлатгани юзасидан даъво аризаси ёзганди. Ҳужумчи 2016 йили илгари сурилган бу айбловни буткул рад этиб, модель шу йўл билан оммага танилишни истаётганини айтиб келмоқда. «Ҳуқуқшуносларим барчаси уюштирилган «ўйин» эканлигини айтишмоқда. Жумладан, ўз хулосам ҳам шундай. Ҳақиқат юзага чиқади, албатта» - деганди Криштиану. Дарвоқе, бир ойча муқаддам EA Sports компанияси Роналду суратини FIFA19 иловаси муқовасидан олиб ташлади ва бунга ҳеч қандай изоҳ бергани йўқ.

Айтганча, «Ювентус» ярим ҳимоячи Федерико Бернардески билан ўртадаги шартнома муддатини узайтиради. Corriere di Torino нашрининг хабар беришича, «кекса синьора» ва футболчининг вакиллари узоқ вақтдан буён музокара олиб боришмоқда. Айни вақтда томонлар янги шартнома бўйича келишувга эришишган. Хабарларга қараганда, Бернардерски янги битимга мувофиқ, 2023 йилгача «Юве»да тўп суради.