“Металлург” – “Қизилқум” учрашувидан сўнг меҳмонлар устози Ҳамиджон Актамов қуйидагича фикр билдириб ўтди: 

- Ўйинни яхши бошлаган эдик. Ҳисоб якунда бундай йирик кўриниш олишини кутмагандик, рости. Лекин бу футбол. Рақиб жамоа бугун характер намойиш эта олди. Бизга эса шу жиҳат бугун етишмади. Бугун икки жамоа ҳам чиройли ўйин кўрсатди. Лекин иккинчи голдан сўнг ўз ўйинимизни йўқотиб қўйдик. Энди кейинги учрашувларга жиддийроқ ҳозирлик олиб боришга ҳаракат қиламиз, - деди мутахассис. 

Мезбонлар устози Андрей Шипилов ҳам ушбу ўйин хусусидаги таассуротлари билан ўртоқлашди...:

- Бугун ҳисоб йирик кўриниш олган бўлса-да рақиб жамоа ҳақида фақат илиқ фикрлар билдириш мумкин. Ўзимизнинг жамоа ҳақида гапирганда эса бугун иккинчи бўлимни анча тартибли ҳолда ўтказганимизни таъкидлай оламан. Жамоам иккинчи бўлимда хотиржамликка берилмасдан анча тартибли тарзда ҳаракат қилди. Танаффусда берган кўрсатмаларимни аниқ бажаришди. Ўтган ўйиндан тўғри хулоса чиқариб ишладик ва якунда бугун чиройли ғалабага эришдик. Бу билан бутун жамоамни табриклайман ва олға интилишда давом этишимизни айта оламан, - деди мутахассис.