ОАВ вакиллари билан мулоқотга киришишни унча хуш кўрмайдиган Лионель Месси Америка кубоги-2019 старти яқинлашаётганиданми, Fox Sports Argentina нашри ижодкорларининг интервью бобидаги илтимосларини рад этолмади ва турли мавзуларда берилган саволларга батафсил жавоб қайтарди. Марҳамат, «ўзга сайёралик» мақомини олган футболчининг ердаги ҳаёт ва воқеаларга муносабати билан танишиб чиқишингиз мумкин.

Суюкли устоз

- Аргентина терма жамоасини ЖЧ-2014 саралаш ва финал босқичларида бошқарган Алехандро Сабелья даврини ажиб бир соғинч ва қониқиш ҳисси билан эслайман. Ҳа, саралаш турнирини анча омадсиз бошлагандик. Лекин кейинчалик ажойиб ғалабаларга эришдик. Муваффақият онларида яшаш анча осон. Зеро, мағлубиятга тоқат қилолмайдиган бўлиб қолгандик. Муҳими, якунда финалга етиб бордик.

Марадона билан ҳамкорлик

- Тўғриси, Сабелья даври билан таққослаганда, Диего Марадона раҳбарлигида у қадар лаззатланиб тўп суролмадим. Ҳа, ўша вақт биз ўта эҳтиросли ва қатъиятли эдик. Аммо тез-тез кутилмаган йўқотишлар ва қоқилишларга дуч келардик. Марадона аслида ўта куюнчак, шижоатли мураббий ҳисобланади. Бироқ катта майдонда ғалабага эришиш учун бунинг ўзи камлик қилади...

ЖЧ-2014 финали

- Эҳ, жамоамизга озгина омад етишмади. Германия термасига қарши кечган ўша финал ҳаммасини бутунлай ўзгартириб юбориши мумкин эди, бироқ якун яна ўхшамади...

ЖЧ-2018 таассуротлари

- Россия мундиали жамоамиз учун ҳар жабҳада жуда мураккаб кечди. Бунда барча икир-чикирлар, машғулотлар ва ўйинларни назарда тутяпман. Эҳтимолки, турнирдаги иштирокни ғалаба билан бошлаганимизда ҳаммаси бошқача давом этармиди? Менинг айбим шуки, Исландия терма жамоаси дарвозасига пенальтидан гол уролмадим. Шу омадсизлик кейинги ўйинга сезиларли даражада таъсир қилди, менимча. Йўқ, хорватларга қарши баҳсда хавотир уйғотадиган қандайдир воқеа юз бермади. Аммо кейин ўта бемаъни хатоликка йўл қўйдик. Хуллас, Нигерия термаси билан учрашув давомида ортга йўл йўқлиги, ҳаттоки, дуранг натижа қайд этсак ҳам, Аргентинада бизни ўлдиришдан тоймасликларини теран тушуниб тўп сурдик. Кийиниш хонасида нималар бўлганини ошкор қилишни ёқтирмайман, мени жамоага тегишли гап-сўзларни четга чиқармаслик, ҳаммасини ўз жойида қолдиришга ўргатишган. Лекин алоҳида айтишим керак, Россия мундиали шахсан мен учун ғайритабиий чемпионат бўлди. Саралаш босқичидан катта қийинчиликлар эвазига ўтганлигимиз ҳам таъсир кўрсатгандир, балки. Ҳар ҳолда, биз ҳаттоки, фаворитлар қаторига ҳам кирмагандик. Ҳозир ҳаммаси ўзгача: ёшлардан ташкил топган янги жамоа, халқаро тажриба йўқ ҳисоби, аммо ишонч катта.

Терма жамоадаги фаолияти

- Қандайдир совринни қўлга киритсам ёки бу борада барча имкониятлардан фойдаланиб бўлганимга ишонч ҳосил қилсамгина терма жамоадаги фаолиятимни якунлашим мумкин. Ҳа, бундай интилишимни оқламайдиганлар ҳам бор ва улар мени тинмай танқид қилишмоқда. Лекин такрор айтаман, кучим ва маҳоратим бор экан, ҳаракатдан асло тўхтамайман. Нимагадир эришаманми ёки йўқ - бу Яратганнинг ўзига аён.

МаҒлубиятлар таъсири

- Салбий натижалар ҳамиша азоб беради, албатта. Лекин тўнғич ўғлим дунёга келганидан кейин мағлубиятларга нисбатан умумий муносабатимни анча ўзгартирдим. Яъни емай-ичмай, ҳеч ким билан сўзлашмай, аза тутиб ётгандан кўра, омадсизлик сабабларини аниқлаш, уларни бартараф этиш кераклигини тушундим. Тўғри, ҳозир ҳам оғриқни ҳис этаман. Бироқ уйда рафиқам ва фарзандларимни кўргач, улар учун яшашим, курашишим кераклигини қайта англайман.

Ўз ўйинлари видеотакрори

- Ўз ўйинимни телеэкран орқали томоша қилишни ёқтирмайман, кўрсам негадир хижолат тортгандек бўламан. Хуллас, менда видеотакрорларга эҳтиёж йўқ, чунки ўйин жараёнидаёқ барча эътиборли лавҳалар хотирамдан жой олади.

ЎҒлонлари

- Тьяго фақат футбол билан тирик - шундан нафас олади, доимо тўп тепиш ёки ўйин томоша қилиш илинжида. Боз устига, ҳозирдан «Барселона»нинг омадсизликларини ўта жиддий қабул қилади. Дейлик, «Ливерпуль» ва «Валенсия»га бой берилган имкониятлар тўнғич ўғлимга жуда оғир ботди. Матео эса ҳали анча ёш, у ҳозирча мағлубият ва ғалабанинг фарқига бормайди. Лекин акаси жиғига тегишни яхши кўради. Айниқса, ТВда «Реал» ўйини намойиш этилаётган бўлса, голларни хурсандчилик билан нишонлайди. Матео яқиндагина менга «Барса»ни мусобақадан чиқариб юборган «Ливерпул»ни ёқтиришини айтганди. Кейин «Қирол кубоги» ғолибига айланган «Валенсия» ҳам унинг севимли жамоасига айланди-қўйди. Матео шунақа шўх бола...

ФутболташҚарисидаги ҳаёт

- Кундалик ҳаётимдан нолишга арзийдиган сабаб йўқ: турмуш ўртоғим ҳамроҳлигида болаларни мактабга олиб борамиз. Фарзандларимиз ўртоқлари жуда кўп, улар доимо бирга ўйнашади. Ўзимиз ҳам бошқа ота-оналар билан яқин алоқадамиз. Шунингдек, ўғилларимиз клуб академиясида таҳсил олишяпти. Тьяго ва Луис Суареснинг ўғли битта гуруҳда шуғулланишмоқда, чунончи, «Барса» футболчилар фарзандлари учун алоҳида гуруҳ очган. Матеонинг машғулотларга киришганига эса 1 йилдан ошди. Харидлар масаласига келсак, бўш қолган пайтлар интернет орқали зарур нарсаларни сотиб олишим мумкин.

ЖЧ-2022 режалари

- Навбатдаги мундиалга қадар жиддий жароҳатлардан узоқроқ юриш баробарида талаб даражасида тўп сура олишимга умидворман. Ҳа, ЖЧ вақтига анча бор, шундай экан, олдиндан бир нима дейиш қийин. Умуман, фаолиятимни имкон қадар узайтириш ниятидаман. Албатта, футболдан кейинги ҳаётни тасаввур қилиш осон эмас. Лекин бу қачондир юз бериши аниқ. Тўғри, футболга нисбатан муҳаббатимдан бир умр воз кечолмасам керак.

Мураббийлик соҳаси

- Ўйлашимча, мураббийлик мен учун мос касб эмас. Ўзимни ҳеч қачон жамоа устози ролида тасаввур қилмаганман, ҳар ҳолда.

Ватанга Қайтиш

- Кўп бора айтганман, «Ньюэллс Олд Бойс» клуби шарафини ҳимоя қилиш орзусида улғайганман, ҳозир ҳам ўша иштиёқ йўқолган эмас. Аммо келажакда нима бўлишини айтолмайман. Ҳаммаси турли омилларга боғлиқ эканлигини унутмаслик керак. Чунончи, оилам ва фарзандларим бор. Айниқса, Тьягони ўз синфдошлари, ёнма-ён улғаётган ўртоқларидан ажратишни кўз олдимга келтиролмайман. Дейлик, ҳозир ҳам Аргентина ёки АқШ сафарига отланган пайт «Бу ердан ҳеч қаерга кетмаймиз», дея кўнглини хотиржам қилиб турамиз.

Неймар ва Луис Суарес

- Неймар - ажойиб йигит! Ҳалигача мунтазам равишда гаплашиб турамиз. Луис ва мен у билан ҳамиша алоқага чиқамиз.

Криштиану Роналду

- Албатта, Криштианунинг ўрни яққол сезилмоқда! У «Реал»ни яққол кучайтирганди. Олдиндан Роналдунинг кетиши жамоага жиддий таъсир этишини айтгандим. Чунки бундай йўқотишнинг сезилмаслиги мумкин эмас. Ахир у ҳар мавсум 50тача гол урарди. Хуллас, Кришти нафақат «Реал», балки бутун Ла-лигага етишмаяпти. Ҳар ҳолда, чемпионат савиясини ноёб иқтидорлар белгилаб берадилар.

«Ливерпул»дан учралган маҒлубият

- Шундай омадсизликка йўл қўйишимиз мумкинлини ҳеч қачон ўйлаган эмасдим. Боз устига, Римда рўй берган кўнгилсизликдан аччиқ сабоқ олган эдик ва бунақа ҳолатнинг яна такрорланишига йўл қўйишга ҳаққимиз йўқлигини яхши билардик. Тўғри, жавоб ўйини осон кечмаслиги олдиндан маълум эди. Бироқ дастлабки учрашув ҳисоби бизни ғафлатда қолдирди, чамамда. Ўз ўрнида айтишим керак, рақибнинг жисмоний ҳолати аъло даражада экан. Бунга такрорий баҳсда тўла амин бўлдик. Қолаверса, тезкор гол уриш вазифасини уддалай олмадик. Ўз дарвозамиздан тўп олиб чиққанимиздан кейин «Рома»га қарши баҳсдаги омадсизлик такрорланиши мумкинлиги барчамизни гангитиб қўйди. Натижада рақибга қаршилик кўрсатолмадик, ташаббусни бой бердик. Шундан кейин хатолар кети узилмади...

Эрнесто Вальверде

- Жамоамиз тушган ҳолат - охирги шармандагарчиликда мураббийнинг айби йўқ. «Ливерпул»га қарши жавоб учрашувига қадар мавсумни ёрқин ва шиддатли ўтказдик, чемпионликни муддатидан аввал расмийлаштирдик, «Қирол кубоги» финалига чиқдик. Мухлислар Вальвердени жамоадан рақиб кутган усулда тўп суришни талаб қилмаганликда айблашди. Аслида омадсизликка тактик услуб сабаб эмас, балки барчаси футболчиларнинг ўзларига боғлиқ. Оддий айтганда, биз рақибларга бас келолмадик, курашларни бой бердик. Аввалги мавсум тажрибасидан келиб чиқсак, бунга йўл қўймаслигимиз шарт эди. Қайтараман, якуний натижаларга мураббийнинг асло алоқаси йўқ. Шахсан мен ҳеч қачон жамоа устози билан баҳслашган эмасман ва буни истамайман ҳам.

Дарвоқе...

Лионель Месси яқинда қонун билан боғлиқ кичик муаммога дуч келди. ABCнинг хабар беришича, футболчига тегишли хайрия жамғармасида ишлайдиган Федерико Реттори унинг устидан судга шикоят ёзди. Қолаверса, у ташкилотдаги қаллобликларни фош этувчи ҳужжатларни ҳам тақдим қилди. Хусусан, гап қалбаки компаниялар воситасида «пул ювиш» ҳақида кетмоқда. Реттори берган маълумотларга қараганда, Мессининг хайрия жамғармаси охирги йилларда 10 миллион евродан кўп маблағни солиқ идораларидан яширган.

Хўжа АБДУЛРАҲМОН тайёрлади.