Аввал Франция, кейин Англия футболи тахтини фатҳ этган бельгиялик ноёб иқтидор соҳиби энди ўз салтанатини Испания ҳисобига кенгайтиришга аҳд қилди. Ҳа, Эден Азарнинг «Реал»га ўтиши нафақат унинг ўзи, балки яқин келажакда ёрқин ўйинлари билан барчани ўзига қаратиши тахмин қилинаётган футболчилар сулоласи хусусида фикр юритишимизга туртки бўлди.

 Кўрмасдан, юрмасданурилган голлар

Аслида, туғилажак Эденнинг тақдири у ёруғ дунёга келмасидан аввал белгилаб қўйилганди. Унинг отаси Тьерри ва онаси Карин Азарлар профессионал футболчилар бўлиб, Тьерри ўзининг қадрдон шаҳри - Ла-Лувьернинг «Лувьеруаза» клубида, Карин эса аёллар лигасида тўп суришарди. «Ойим ҳужумчи эди ва ҳомиладорликнинг учинчи ойида ҳам майдонга тушишни тўхтатмаган экан. Демак, мен ҳали туғилиб улгурмасдан гол урганман десам, хато бўлмайди», - деганди Эден ўз интервьюларидан бирида.

Азардиньолар сулоласи

Спортчи ота-она ўзларидаги футболга нисбатан ирсий мойиллик фарзандларига шу қадар кучли таъсир этиши мумкинлигини ҳатто хаёлларига ҳам келтиришмаган бўлса, ажабмас. Азарлар сулоласининг тўнғичи бўлмиш 28 ёшли Эден янги мавсумни «Реал» таркибида бошлайди. 26 ёшли Торган эса Дортмунднинг «Боруссия»­сида, ундан 3 ёшга кичикроқ бўлган Кильян «Серкль Брюгге» шарафини ҳимоя қилади. Яқин келажакда «Челси» тизимига ўтиши тахмин қилинаётган 15 ёшли кенжатой Итан эса ҳозирча Бельгиядаги Тюбиз академиясида таҳсил олмоқда.

«Қироллик клуби»нинг дебютанти ўзининг оилавий сулоласини бразилияликларга хос услубда Азардиньолар квартети сифатида эътироф этишни хуш кўради ва тез орада Азарларнинг ҳеч бўлмаганда 3 нафари Бельгия терма жамоаси либосида майдонга тушишини орзу қилади. Бу ниятнинг яқин келажакда рўёбга чиқишига шубҳа қилмаса ҳам бўлаверади - Торган акасидан ортда қолмасликка ҳаракат қилмоқда.

Ота тақиқи

Ҳа, аввал Франция, кейин Англия чемпионатларида зафар қучган, ЖЧ-2018 бронза медали соҳибига айланган, ЕЛнинг охирги ғолибини ҳозир ўз таркибига қўшиб олиш учун «Қироллик клуби» «Челси»га 100 миллион евродан кўпроқ маблағ сарфлади. Бироқ бундан 20 йил муқаддам Эденнинг ота-онаси тўнғич фарзандларининг ҳар қандай касбни танлашига қарши эмасликларини, фақат у футболни танламаслигини истаган эдилар. «Профессионал футболни хаёлингга ҳам келтира кўрма!» деганди Тьерри 8 ёшли Эденга қатъий оҳангда. Чунки катта Азар ўз вақтида Бельгиянинг иккинчи дивизионидан юқорига кўтарила олмаган ва ўғлини омадсизликдан асраб қолмоқчи бўлганди.

Франция сафари

Бироқ 4 ёшидан бошлаб коптокка ошно тутинган болакай отанинг тақиқига эътибор бермади ва 10 ёшида «Тюбиз» академияси тарбияланувчилари сафидан жой олди. Ҳозир унинг кенжа укаси Итан бу ўқув даргоҳидан учирма бўлиш тадоригини кўрмоқда.

Академия «Лилль» клуби билан яқин алоқада бўлгани боис, 2005 йилда Азарлар Францияга йўл олишганида 14 ёшли Эденнинг келажаги ўз-ўзидан «доглар»га боғланиб қолди. Ўшанда охирги чемпионликни 1954 йилда нишонлаган жамоа ярим асрдан кўпроқ вақтдан бери зафарга эриша олмаётганди.

Дебют ва хайрлашув

Узоқ кутилган ғалабага эришишда айнан Азарнинг ҳиссаси сезиларли бўлди: 16 ёшида у асосий таркибда дебютини нишонлади, 18да Биринчи дивизионнинг энг яхши ёш футболчиси унвонига сазовор бўлган дастлабки легионерга айланди, 20 ёшида эса «доглар»га 57 йиллик танаффусдан ке­йинги чемпионликни совға қилди. Ўзи 7 гол ва 10та самарали узатма билан мавсумнинг энг яхши футболчиси унвонига лойиқ топилди.

Орадан бир йил ўтгач, яъни Азарнинг «Челси»га ўтиши аниқ бўлиб улгурганида қизиқ бир воқеа юз берди: сўнгги тур арафасида бронза медалларини нақд қилган «Лилль» Эден билан хайрлашув учрашувини ташкил этганди. Ана шу ўзига хос тадбир тафсилотларини 2017 йилга қадар «Лилль» шарафини ҳимоя қилган Рио Мавуба ке­йинчалик айтиб берганди. Маълум бўлишича, ўша тунда Азар ўз жамоадошлари билан тонггача маишат қилган, уйига ҳам бормасдан тўппа-тўғри жамоа йиғинига йўл олган, асосий таркибда майдонга тушиб, 34 дақиқа ичида «хет-трик»ка эришган экан.

Терма жамоадаги бебошлик

Азар иштирокидаги яна бир ҳангома Бельгия терма жамоасида юз берганди. 2011 йилда «қизил иблислар» Туркия термаси билан ўртоқлик учрашувида куч синашишган, Эден 60-дақиқада ўз ўрнини захира ўйинчисига бўшатиб берганди. Вақтдан унумли фойдаланмоқчи бўлган футболчи оила аъзолари билан учрашиб, бургерхўрлик қилганди. Терма жамоанинг ўша пайтдаги бош мураббийи Жорж Лекенс бу ўзбошимчалиги учун Азарни иккита учрашувдан четлатиш билан жазолаганди. Кейинчалик Эден бу воқеага ойдинлик киритди: «Ҳа, соусли бургер менга жуда ёқиб қолганди. Ҳозир ҳам ойимдан Лондонга севимли таомимдан олиб келишини илтимос қиламан».

Мазкур воқеа Бельгия терма жамоаси ЖЧ-2018га йўл олаётган пайт­да шахсан мамлакат қироли Филипп томонидан тилга олинди. Анъанага биноан, футболчиларга омад тилаган монарх жумладан Азарга бургерлардан кўп истеъмол қилмасликни маслаҳат берди. Ўз навбатида, қаҳрамонимиз уларнинг фойдали эканлигини таъкидлади.

Сериалдан олинган тахаллус

Туманли ўлкадаги ёрқин ўйинлар Азарга жарангдор тахаллусни инъом этди. Боз устига, «аристократлар» учун жуда мос унвон - «Герцог» (The Duke). Аммо келиб чиқиши тамоман ўзгача: бир пайтлари намойиш этилган АҚШ сериали асосида яратилган тўлиқ метражли The Dukes of Hazzard (Герцог Азар) фильми бельгиялик иқтидор соҳибига аталгандек эди, гўё.

Зидан билан ўзаро юксак ҳурмат-эҳтиром

Энди ўз вақтида Францияни, кейин Англияни фатҳ этган герцог Азардан Испанияни забт этиш талаб этилади. Эътиборли жиҳати шундаки, футболчи билан «Қироллик клуби» ўртасидаги муносабатлар ўзаро ҳурмат-эҳтиромга асосланган. Сўнгги йилларда бельгиялик юлдуз «Реал» либосида майдонга тушишга орзуманд эканлигини бир неча марта такрорлаганди. Шунингдек, у Зиданни ўз «кумир»и сифатида кўришини таъкидлаб, «Лилл»даги давридан бери унинг финтларини ўзлаштириш билан шуғулланишини маълум қилди. Ўз навбатида, Зайниддин Флорентино Пересга маслаҳатчи бўлган давридаёқ Азарни харид қилиш таклифини киритганди. Қолаверса, бельгиялик ноёб иқтидор соҳибининг ўйинидан ҳайратда эканини ҳам яширмаганди: «У - бўлажак юлдуз! Мен уни ҳеч иккиланмай «Реал»га таклиф этардим».

Ниҳоят, орзулар рўёбга чиқди. Янги мавсумда «Реал» сезиларли даражада кучайишига шубҳа йўқ. Табиийки, нафақат Мадриднинг қаймоқранг қисми, балки бутун футбол жамоатчилиги герцогнинг қирол тахтига чиқишини сабрсизлик билан кутади.

 Мадриднинг «Реал» клуби Эден Азарни сотиб олиш орқали футбол тарихидаги энг қиммат 10та трансфер рўйхатига беихтиёр ўзгартириш киритди. «Қироллик клуби» бельгиялик учун «Челси»га 100 миллион евро (қўшимча бонуслар ҳисобига бу нарх янада ошиши мумкин) берди ва Азар қимматбаҳо футболчилар рейтингида 8-ўринга жойлашди. Криштиану Роналду эса «МЮ»дан «Реал»га ўтаётганда ҳам, «Реал»ни «Ювентус»га алмаштираётганда ҳам қиммат нархда сотилгани учун бу рўйхатда унинг номи иккита ўринда қайд этилган.

1. Неймар («Барселона»дан «ПСЖ»га) - 222 млн. евро

2. Коутиньо («Ливерпул»дан «Барселона»га) - 145 млн. евро

3. Мбаппе («Монако»дан «ПСЖ»га) - 135 млн. евро

4. Дембеле («Боруссия» Дортмунддан «Барселона»га) - 125 млн. евро

5. Роналду («Реал»дан «Ювентус»га) - 117 млн. евро

6. Погба («Ювентус»дан «Манчестер Юнайтед»га) - 105 млн. евро

7. Бэйл («Тоттенхэм»дан «Реал»га) - 101 млн. евро

8. Азар («Челси»дан «Реал»га) - 100 млн. евро

9. Роналду («Манчестер Юнайтед»дан «Реал»га) - 96 млн. евро

10. Игуаин («Наполи»дан «Ювентус»га) - 90 млн. евро

Бевосита «Реал» клуби тарихидаги энг қимматбаҳо трансферларга тўхталадиган бўлсак, бу ерда Азар пешқадамлар сафида. Тўғри, «Қироллик клуби» Гарет Бэйл хариди учун 101 миллион евро сарфлаган. Аммо Эденни сотиб олгани учун «Реал» ҳали «Челси»га бонуслар ҳам тўлаши мумкинлигини инобатга олсак, бельгиялик вингер бу борада пешқадамга айланиб олиши турган гап.

1. Бэйл («Тоттенхэм», 2013) - 101 млн. евро

2. Азар («Челси», 2019) - 100 млн. евро

3. Роналду («Манчестер Юнайтед», 2009) - 96 млн. евро

4. Хамес Родригес («Монако», 2014) - 80 млн. евро

5. Зидан («Ювентус», 2001) - 72 млн. евро

6. Кака («Милан», 2009) - 67 млн. евро

7-8. Фигу («Барселона», 2000) - 60 млн. евро

7-8. Йович («Айнтрахт», 2019) - 60 млн. евро

9. Милитао («Порту», 2019) - 50 млн. евро

10. Ферлан Менди («Лион», 2019) - 48 млн. евро