Хорватия терма жамоаси бош мураббийи Златко Далич турнир ҳақида китоб ёзди. Хабарингиз бор, унинг жамоаси финалга қадар етиб борганди. Китобнинг русча талқини Москвада тақдим этилди.

 - Китобнинг номи «Орзуимиздаги Россия» деб аталади. Ҳақиқатан ҳам мамлакатингиз Хорватия футболи учун орзуга айланди, - дея гап бошлади Далич. - Бу фаолиятимдаги энг бахтли онлар эди. Асал ойини шу ерда ўтказдим, дейишим мумкин.

- Бу сизнинг биринчи жаҳон чемпионатингиз эди...

- Ҳа, 2018 йилга қадар бундай турнирларда на футболчи, на мураббий сифатида иштирок этгандим.

- Россияга қандай хаёллар билан ташриф буюргандингиз?

- Биринчи вазифамиз гуруҳдан чиқиш эди. Кейин қадамма-қадам юравердик. Шиоримизни эсласангиз керак: «Кичик мамлакат, катта орзулар». Айнан шу шиорга амал қилдик. Барча мухлислардан миннатдормиз. Россияга бизни қўллаш учун келганларга ҳам, телевизор орқали ишқибозлик қилганларга ҳам.

- Жамоангиз кучайганини қачон ҳис қилдингиз?

- Нижний Новгородда Аргентинани 3:0 ҳисобида мағлуб этганимиздан сўнг. Айнан ўшандан кейин қўлимиздан кўп нарса келиши мумкинлигига ишондик.

- Россия терма жамоаси ЖЧ-2018 чорак финалида сизни ажаблантирдими?

- Ҳа! Биз вазиятни бошқарамиз, рақибни ҳимояланишга мажбур қиламиз, деб тўрт нафар ҳужумчини майдонга туширгандик. Лекин Россия терма жамоаси юқори прессингда ўйнаб, бизни сиқиб қўйди. Хайриятки, тезда голга жавоб қайтардик. Кейин бир ҳужумчимизни марказий ярим ҳимоячига алмаштиришга мажбур бўлдик.

- Хорватия терма жамоаси қўшимча вақтда гол урганида ғалабага ишонч ҳосил қилдингизми?

- Йўқ. Россия қаҳрамонларча ҳисобни тенглаштирди.

- Францияга қарши финал ҳақида нима дея оласиз?

- Биз олдинги ўйинларга қараганда яхши ўйнадик. Айниқса, биринчи бўлимда. Афсуски, ғалаба қозона олмадик.

- Хорватиянинг иккинчи ўринни олганини қандай баҳолайсиз?

- Бу футболимиз тарихидаги энг яхши натижа. Яна нима дейиш мумкин? Биз бахтлимиз ва ўз натижамиз билан фахрланамиз. Бунга қадар 1998 йили жаҳон чемпионати совриндорлари қаторига киргандик. Ўшанда Давор Шукер, Звонимир Бобан, Роберт Просинечки, Славен Биличлар Мирослав Блажевич қўл остида бронзага эга чиқишганди. Бу фантастикадек гап эди. Биз эса янада юқорироққа кўтарилдик.

- Наҳотки, финалдаги мағлубиятдан ранжимаган бўлсангиз?

- Аввалига хафа бўлдим. Финалдан сўнг Модрич турнирнинг энг яхши футболчиси учун бериладиган совринни олгани кетаётганида, унинг юзини кўрган бўлсангиз керак. Лука жуда ғамгин ҳолатда эди. Соврин унинг учун ҳеч қандай аҳамият касб этмасди. Чунки жамоаси ҳал қилувчи учрашувда мағлубиятга учраганди. Модрич сардор бўлгани учун ҳам бу қўшимча масъулият эди.

- Россиядаги чемпионатга қандай баҳо берасиз?

- Бу сюрпризлар турнири бўлди. Ҳамма финалга Анг­лия, Бразилия, Германия, Аргентина ёки Испания терма жамоаларидан бири чиқади, деб ўйлаганди. Лекин биз инглизларни, Россия эса испанларни мусобақадан чиқариб юборди. Германия гуруҳдан ҳам чиқа олмади. Аргентина Месси билан, Португалия Роналду билан, Бразилия Неймар билан уйига эртароқ кетишга мажбур бўлди.

- Қайси стадион сизга кўпроқ ёқди?

- Уларнинг барчаси ажойиб эди ва мухлислар билан тўлганди. Агар хорватиялик мухлислар кўп бўлган ўйинни инобатга олсак, Калининградни танлайман. Аммо бу стадион ЖЧ-2018даги энг кичиги эди. Биз у ерда биринчи турни ўтказгандик ва Нигерияни 2:0 ҳисобида мағлуб этгандик. Яна Нижний Новгороддаги стадионни айтишим мумкин. Бу арена бизга икки марта омад келтирди. Дастлаб Аргентинани 3:0 ҳисобида мағлубиятга учратдик, 1|8 финалда эса Данияни пенальтилар сериясида таслим этдик.

- Муваффақиятдаги ўз ролингизга қандай баҳо берасиз?

- Мен керакли вақтда керакли жойда пайдо бўлган оддий мураббийман.

- Сизни харизматик мураббий деб ҳисоблашади. Бу ҳам муҳимми?

- Менга суперфутболчилар ўйнайдиган супержамоа тўғри келиб қолди. Уларга футбол ўйнашни ўргатишим шарт эмасди. Шу боис ҳам кўпроқ бошқа жиҳатларга эътибор қаратдим. Яъни, уларнинг руҳий ҳолатига.

- Китоб ёзишга қачон қарор қилдингиз?

- Бундай қилмоқчи эмасдим. Аммо журналистлар кўндиришди. Сизларда қандай билмадим-у, лекин хорват халқининг хотираси қисқа. Шунчаки, муваффақиятимиз тарихда қолишини истадим.