«Атлетико» ҳужумчиси Антуан Гризманн ниҳоят, «Барселона» билан шартнома тузса, ажабмас. Зеро, 1 июль (кеча) унинг шартномасида белгиланган бадал пули 200 миллион евродан 120 «лимон»га тушди. Яъни бу борадаги алоҳида банд кучга кирди. The Telegraph нашри маълумотларига кўра, франциялик футболчи вакиллари Каталония клуби билан битим шартларини 2 ой олдин келишиб қўйишган. Тўғри, «Барса» президенти Хосеп Мария Бартомеу олдинроқ бундай миш-мишларни инкор этганди. Франциялик голеадор май ойида «Атлетико»дан кетишини маълум қилган бўлсада, қайси клуб сафига қўшилиши ҳақида оғиз очмаганди. Кейинчалик «ПСЖ» ва «МЮ» каби клублар Гризманнга яққол даъвогар эканлиги айтилди. Mundo Deportivo нашрида ёзилишича эса, «Барселона» Антуан Гризманн трансфери бўйича музокара жараёнини бошлади. Таъкидланишича, Каталония клуби Гризманн трансферига ҳимоячи Нелсон Семедуни қўшмоқчи. Ўз навбатида, «матрасчилар» раҳбарияти ҳам португалиялик футболчига бефарқ эмас. Асосийси, Семеду жамоасини ўзгартиришга мойил. Айни пайт унинг трансфери 40 миллион еврога баҳоланмоқда.