Стефан ал Шаарави 20 ёшида Россия чемпионатида ўйнашга кўнмаганди. Мегаиқтидор соҳиби сифатида мақталган футболчи орадан атиги 6 йил ўтиб, Хитойга йўл олди. «Милан» бағридан порлаб чиққан йигит аслида яқинда ҳам бошқача гапирганди: «Энди 26 ёшга тўлдим, демак, Европада қолиб, ўзимни кўрсатишга ҳаракат қиламан ҳали».

28 июнь куни эса Стефан матбуотдаги навбатдаги чиқишида Хитой клубидан тушган ўта манфаатли таклифни рад этганини таъкидлади: «Йўқ, еврофутболдан четга чиқишни хоҳламайман. Чунончи, юқори савияда ўйнаш иштиёқини йўқотмадим. Умуман, футбол марказидан йироқлашишга ҳали эрта. 26 ёшдаёқ бошқа қитъага юзланиш ярамайди». Кейинроқ барчаси бирдан ўзгариб кетди...

Италиялик футболчи хизматига қизиққан клуб - «Шанхай Шенхуа» Хитой Суперлигасининг охирги мавсумида 7-ўринни банд этганди. Бироқ жамоа янги чемпионатни жуда суст бошлади. Оқибатда тез орада бош мураббий Кике Санчес Флорес истеъфога чиқарилди. У шанхайликларни атиги 17та ўйинда майдонга бошлаб тушганди. Боз устига, «Шанхай Шенхуа» Суперлиганинг дастлабки 13та турида бор-йўғи 12 очко тўплади. Умуман, ҳозирда жамоанинг жорий мавсум нимагадир умид боғлаши фантастика ҳисобланади. Аксинча, юқори дивизиондан тушиб кетиш хавфи йўқ эмас. Хуллас, Шанхай клуби раҳбариятининг шошилинч чоралар кўришига тўғри келди. Стефан ал Шаарави «Шанхай Шенхуа» таклифини нега қабул қилмаганини лўндагина тушунтирган бўлсада, хитойликлар чекинишмади. Улар футболчига тезда янгиланган шартларни ўз ичига олган иккинчи таклифни жўнатишди. Натижада Стефан бунисидан шунчаки, юз ўгиролмади. Хуллас, ҳали юқори савияда ўйнашни хоҳлаши ҳақида баралла баёнот берган италиялик футболчи орадан атиги 9 кун ўтиб, яъни 8 июлда Хитой клуби билан расман шартнома тузди. Унинг трансфер ҳуқуқига эгалик қилган «Рома» хитойликлардан 20 млн. евро оладиган бўлди. Италия ОАВ маълумотларига кўра, Стефаннинг ўзи 3 йиллик келишувга биноан, жами 30 миллион евро миқдорида маош олади. Демакки, бир йиллик хизмати 10 «лимон»га баҳоланган. Қолаверса, «Шанхай Шенхуэ» ал Шааравига шартномага имзо чеккани учун мукофот тариқасида қўшимча 10 млн. евро беради. Тўғри, айрим манбаларда ёзилишича, трансфер суммаси 18 миллион еврони ташкил этган.

Қайси маълумот тўғри бўлишидан қатъий назар, «Рома» ўз футболчиси ортидан яхшигина фойда кўрди ва у билан чиройли тарзда хайрлашди. Яъни жамоа раҳбарияти Стефанга самимий миннатдорчилик билдириб, Хитойда омад ва кўплаб голлар уришини тилади. Экспертлар эса ҳайрон - уларнинг хулосаларига кўра, ал Шаарави фаолиятини кучлироқ чемпионатда давом эттириши керак эди. Зеро, гап атиги 19 ёшида Италия терма жамоаси таркибига кирган ва барчада мамлакат футболининг келажаги сифатида умид уйғотган футболчи ҳақида кетмоқда. Умуман, Стефан ўша 2012 йили чинакамига ёғду сочганди: ёш йигитча қўққисдан «А» сериянинг катта клуби сафида мухлисларни ҳайрат кўчасига етаклади. Аниқроқ айтсак, катта футболдаги дебют мавсумида «Милан»нинг 34та ўйинида иштирок этиб, 16та гол урди. Қўшимчасига, у яна Европа Чемпионлар Лигасида  ўз номини гол ёздириб қўйган «Милан» тарихидаги энг ёш футболчига айланди. Бунинг самараси ўлароқ, Италия терма жамоаси бош мураббийидан тортиб, оддий мухлисларгача - ҳамма ал Шааравини мамлакат футболининг келажаги сифатида эътироф эта бошлади. «Милан»нинг собиқ соҳиби Сильвио Берлускони эса ўсмир йигитни тан олинган ҳужумчи Эдинсон Каванидан устун кўрди, голландиялик Луи ван Гал ҳам шунга ўхшаш фикр билдирди: «Бу бола ҳозирнинг ўзида Марио Балотеллидан хавфлироқ». Шу орада янги юлдузчага харидорлар ҳам чиқди. Хусусан, араб шайхлари маблағи эвазига моддий томондан қувватланган «Манчестер Сити» яхшигина таклифни ўртага ташлади, бироқ «Милан» жавоҳирдек товланган вундеркиндни сотишни истамади. Gazzetta Dello Sport нашри маълумотларига қараганда, 2013 йили Россиянинг «Анжи» клуби ҳам жазман харидор сифатида чиқиб, «россонерлар»га рад этиш мушкул саналган ўта манфаатли таклиф билан мурожаат қилган. Гарчи «Милан» вакиллари ушбу хабарни тасдиқламаган бўлсаларда, ал Шааравининг ўзи кейинчалик ўша ёз Россия клубидан тушган мегатаклифни рад этганини тан олганди.

Афсуски, катталар футболидаги илк мавсум Стефан учун энг яхшиси бўлиб қолди. Еврофутбол осмонида чақмоқдек бир чақнаган йигит кейинги йилни тўлалигича даволанишга сарфлади. Сафга қайтганидан сўнг эса навбатдаги жароҳатга йўлиқди ва яна ярим йил ўйиндан четда қолди. «Милан» бу вақтда футболчини ижара келишувлари асосида навбати билан «Монако» ва «Рома»га юборди. Кейинчалик римликлар унинг трансферини 13 млн. еврога сотиб олишди. Ўшанда Стефан 23 ёшда эди. Хуллас, кечагина Италия футболининг бош иқтидори мақомини олган ҳужумчи бирданига ўртамиёна ижрочига айланиб қолганди. Инсоф юзасидан айтиш керак, ал Шааравининг кескин пасайишига 2та жиддий жароҳат сабаб бўлди, лекин йигитча яна тартиббузарлиги билан ҳам кўзга ташланди. «Рома»да эса у қаттиққўл Лучано Спаллетти қўл остида дарҳол ақл-ҳушини йиғиб олди ва бинойидек ўйнай бошлади. Ҳар ҳолда, «бўрилар» сафидаги дастлабки 6та учрашувда 7та самарали ҳаракатни амалга оширди. Шунда ҳам «Рома»ни атиги 13 млн. еврога суперманфаатли трансферни расмийлаштиргани билан табриклашга тушди. Аммо якун яна ўхшамади - ал Шаарави ҳамма кутган янги даражага чиқолмади, барибир. Оддий айтганда, «Рома»нинг асосий ўйинчилари қаторига қўшилолмади. Умуман, Стефан қанчалик уринмасин, фаолиятининг кейинги даврида дебют мавсумидаги натижаларини такрорлай олмади. Лекин унча ёмон ҳам кўрингани йўқ. Мисол учун, «Рома» учун муваффақиятсиз кечган сўнгги мавсумда ҳаттоки, клубнинг энг яхши тўпурари бўлди - 11та гол. Айтиш жоиз, Хитойга юзланган футболчи охирги 2 йилда жиддий жароҳатлардан азият чекмаган ва ниҳоят, нисбатан барқарор ўйин намойиш этганди. Шуни назарда тутсак, унинг Европада қолишни исташи ҳақида берган баёноти мантиққа мос кўринганди. Бироқ якунда...

Тўғри, Стефан атиги 26 ёшда. Ҳа, бу ёшда Хитой чемпионатига йўл олиш бироз ғалати. Бироқ унда евроареналарга қайтиш имконияти борлигини ҳам унутмаслик керак. Зеро, «Шанхай Шенхуа» билан шартномаси 3 йилга мўлжалланди. Европа клубларида эса агар футболчига ишонишса, унинг ёшига катта эътибор қаратмайдилар. Демакки, Стефан Европа марказига қайтишни чинакамига хоҳласа, бунга аввало, улгуриши мумкин. Фақат аввало, Хитой чемпионатида «ярқ» этиб кўзга ташланиши шарт...

У.УМАРОВ тайёрлади.