Аввалги ҳафта Франциянинг Лион шаҳрида шундай бир ўйин ташкил этилдики, унинг футбол тарихидан жой олиши тайин. Ахир нақ 3 кун танаффуссиз давом этган учрашувда 807 нафар (!) футболчи қатнашди. Бу қандай ўйин бўлди? Албатта, алоҳида акция доирасидаги баҳс. Аниқроқ айтсак, ушбу оммавий футбол тенг ҳуқуқлиликни қўллаб-қувватлаш мақсадида ташкиллаштирилди ва шу баҳона бир неча рекорд кўрсаткичлар қайд этилди.

***  Футбол тарихига энг узоқ давом этган ўйин сифатида кирган кўргазмали баҳс 68 соату 9 дақиқага чўзилди. Бошқача айтганда, майдонда 3 куну 2 тун тўхтовсиз тўп тепилди.

***  Оммавий футбол баҳсида нақ 807 нафар аёл ўйинчи қатнашди. Эътиборлиси, улар дунёнинг 60та мамлакатидан эдилар. Дарвоқе, бу ҳам жаҳон рекордидир.

***  Ўйин натижасига келсак, якунда 399:369 ҳисоби қайд этилди. Тўғри, айрим манбаларда бошқа ҳисоб келтирилмоқда - 404:369.

***  Ўйин Лиондаги машғулотлар майдонида ўтказилди ва жамоалар таркибида 5 нафардан ўйинчи ҳаракатланди.

***  Ўйиндан кўзланган мақсад спортда тенг ҳуқуқликни таъминлашга уринаётган Equal Playing Field ташкилотини моддий томондан қўллаб-қувватлаш учун маблағ йиғиш эди. Диққатга сазовор томони, бир неча машҳур компаниялар ўйинни ташкиллашга амалий ёрдам берди. Жумладан, Adidas ҳам ҳомийлар қаторидан жой олди.

***  «Майдонда ҳамма тенг» - бу ўйин шиори, - деди америкалик Николь Тиггс. - Демакки, аёллар футбол бобида эркаклар билан тенг имкониятга эга бўлишлари керак».

***  Олдинроқ бу каби ўйинлар Ер сайёрасининг энг баланд чўққиси (Килиманжаро тоғи) ва энг йирик чуқурлик (Иордания)да ўтказилганди. «Лион» аёллар жамоасининг собиқ аъзоси Сандрин Дусан уларнинг ҳар иккисида иштирок этганди. «Аввалги лойиҳаларда қатнашиш борасида заррача иккиланган эмасдим. Шунинг учун ҳисоб бўйича учинчи учрашувда иштирок этиш учун Лионга етиб келганимда ажабланадиган томони йўқ», - деди Дусан хоним.

***  Покистонлик футболчи Хайра Хан жами 4 соат ўйнаб, 6та гол урди. «Гап рекорд ўрнатишда эмас, - деди Осиё футболи вакили. - Лойиҳада ўз мамлакатим учун қатнашдим. Зеро, Покистон спортида тенг ҳуқуқлик йўқ». Хан мамлакат футбол иттифоқининг аёллар терма жамоасига бефарқ қарашидан норози.

***  Ўйин аёллар ўртасидаги жаҳон чемпионати финали олдидан ташкиллаштирилди. Айнан Лионда ўтказилган ҳал қилувчи баҳсда АҚШ ва Голландия терма жамоалари ўзаро куч синашди. Айтганча, ўйин учун чиқарилган чипталар турнир стартидан олдин сотув бошлангач, атиги ярим соат ичида тугаганди.