Қуйидаги фотожамланмага танланган футболчилар ҳозирда энг қимматбаҳо автомобилларда сайр қилишади, ҳашаматли уйларда яшашади, гранд клублар сафида энг чиройли ва замонавий стадионларда ўйнашади.

Айримлари ҳаттоки, ўзларининг шахсий оролларида дам олишади. Лекин доим шундай бўлмаган - улар барчасига тинимсиз меҳнат ва алоҳида иқтидор эвазига эришишган, албатта.

Мана, бугунги юлдузлар футболдаги ёрқин йўлни қандай стадион ва майдонларда бошлашганига қараб, бу борада ўзингиз маълум тушунча ҳосил қилишингиз мумкин.

НЕЙМАР (Бразилия)

Америка кубоги-2019ни четдан кузатишга мажбур бўлган Бразилия футболининг биринчи рақамли юлдузи 1992 йилнинг 5 февраль куни Сан-Паулу штати тасарруфидаги Можи-дас-Крузис шаҳрида туғилди.

Фаолиятини эса «Сантос»нинг ёшлар жамоаси саналадиган «Португеза Сантиста» клубида бошлади. Неймарга футбол бобида бешик мисоли хизмат қилган стадион номи - «Улрико Мурса». Бразилиялик футболчи 2013 йилнинг ёзида Испаниянинг «Барселона» клуби сафига қўшилди.

Каталонияликлар тез орада жаҳон футболининг бош юлдузи бўлиши кутилган иқтидор эгасига 57 млн. евро тўлашди. Неймар мавсум-2014|2015да янги клуби билан «требл»га эришди (Испания чемпионати ва кубоги, шунингдек, ЕЧЛда ғалаба қозонди).

2017 йилнинг августида эса 222 млн. евро эвазига «Барса»дан «Пари Сен-Жермен»га  ўтиб, жаҳоннинг энг қимматбаҳо футболчисига айланди.

Криштиану РОНАЛДУ (Португалия)

Бутун Португалия фахрига айланган Криштиану 1985 йилнинг 5 февраль куни Фуншал шаҳрида дунёга келди. У болалигидан «Бенфика» клубига мухлислик қилди. 8 ёшида эса ҳаваскорлар жамоаси - «Андоринья»да ўйнай бошлади. Кришнинг отаси шу клубда ишларди. Унинг стадионидаги трибуна эса атиги 500 кишига мўлжалланган эди.

Роналду кейинчалик чинакам шуҳратга бурканди. Хусусан, 2008, 2011, 2014 ва 2015 йилларда «Олтин бутса»га эга чиқди. «Олтин тўп»ни эса 5 марта қўлга олиб, бу борада Лионель Месси билан бирга ҳақиқий пойгани юзага келтирди. Роналду яна ЧЛда нақ 7 марта (6таси қаторасига) бош тўпурар бўлди, қанчадан-қанча рекордларни янгилади.

Муҳаммад САЛОҲ (Миср)

Салоҳ - «Мокавлун» клуби академияси тарбияланувчиси. У асосий жамоадаги дебютини 2010 йилнинг 3 май куни «Ал-Мансури»га қарши ўйинда нишонлади. Мавсум-2010|2011да эса асосий таркибдан мустаҳкам жой олди. «Ливерпул»нинг бугунги тўпурари илк голини 2010 йил 25 декабрда «Ал-Аҳли» дарвозасига урди.

Салоҳ ҳозирда нафақат Миср, балки бутун Африка фахри ҳисобланади. У жумладан, 2018 йилнинг апрелида АПЛнинг энг яхши футболчиси сифатида эътироф этилди. Қолаверса, жорий йил «Ливерпул»нинг ЧЛда ғалаба қозонишига катта ҳисса қўшди.

Садио МАНЕ (Сенегал)

1992 йилнинг 10 апрель куни Седиу шаҳрида таваллуд топган Садио кичиккина Бамбали қишлоғида улғайди. Болакай 15 ёшга тўлгач, амакиси уни Дакардаги «Женерасьон Фут» академиясига топширди. Шу тариқа Сенегал футболининг бугунги бош юлдузи ёрқин фаолиятини мўъжаз «Дени Бирам Ндао» стадионида бошлади. 2016 йил 28 июнь - Садио шу куни «Ливерпуль» аъзосига айланди. «Қизиллар» унинг трансфери учун 40,7 миллион евро тўлашди.

2018 йилнинг қишида ЧЛ доирасида «Порту»га қарши кечган баҳсда «Ливерпуль» сафида илк «хет-трик»ни расмийлаштирган. Ўша мавсум якунида Мане «Реал» дарвозасини ишғол қилиб, ЧЛ финалида гол урган илк сенегаллик бўлди. Мана, жорий йил «Ливерпуль» билан «шалпангқулоқ» кубок соҳибига ҳам айланди.

Роберто ФИРМИНО (Бразилия)

Бразилиянинг Масейо шаҳарчасида туғилган Роберто футболчилик фаолиятини «Клуб Регатас Бразил» жамоасида таянч ярим ҳимоячиси сифатида бошлади. Фирминонинг биринчи қадамига гувоҳ бўлган стадион - бу Бразилия футболи афсонаси шарафига номланган «Қирол Пеле» аренаси.

Тезкор футболчи 2015 йилнинг 24 июнь куни «Ливерпуль» билан шартнома тузди. Трансфери 29 миллион фунтга баҳоланган Роберто ўша вақт клуб тарихидаги иккинчи қимматбаҳо футболчи (Энди Кэрроллдан кейин) бўлганди. Бразилиялик йигит «қизиллар»нинг ЧЛ-2019даги ғалабалари асосчиларидан биридир.

Диего ГОДИН (Уругвай)

Туғилган санаси - 1986 йил 16 февраль. Годиннинг фаолияти Уругвай футболида муҳим ўринга эга «Серро» клубига тегишли «Луис Трокколи» стадионида бошланди. Диего бу жамоа сафида 3 йил ўйнаб, маҳаллий чемпионат доирасидаги 63та учрашувда 6та гол урди.  «Луис Трокколи» трибуналари оригинал номларга эга. Яъни 4та трибунага қўшни мамлакатлар номи берилган - Аргентина, Бразилия, Парагвай ва Чили.

Уругвайлик футболчи 2010-2019 йиллар оралиғида «Атлетико»да ўйнаб, «матрасчилар» рамзига айланди. Диего хусусан, 2017 йилнинг 28 октябрь куни «Атлетико» сафида 315-марта майдонга тушиб, клуб тарихида энг кўп ўйнаган хорижлик футболчи мақомини олди. Айтганча, Годин янги мавсумдан эътиборан «Интер» шарафини ҳимоя қилади.

Виржиль ван ДЕЙК (Голландия)

Аждодлари суринамликларга бориб тақаладиган голландиялик ҳимоячи 1991 йилнинг 8 июль куни Бреда шаҳрида туғилди. У футболга айни шу ердаги камтарона стадионда қадам ташлади. 2001 йили эса «Виллем II» клуби академиясига кўчиб ўтди. Ван Дейкнинг профессионал футболдаги илк жамоаси - «Гронинген».

Гап «Ливерпуль» таянчи, Голландия терма жамоаси сардори ва замонавий футболнинг энг кучли марказий ҳимоячиларидан бири ҳақида кетмоқда.

Радамель ФАЛЬКАО (Колумбия)

1986 йилнинг 10 февраль куни дунёга келган Радамель илк марта «Мильонариос» ёшлар жамоасида кўриниш берди. 13 ёшга тўлганидан кейин эса «Лансерос Бояка» жамоаси сафига қўшилди. Дарвоқе, 1999 йилнинг 28 август куни дебютини нишонлаган Фалькао Колумбия миллий чемпионати тарихида майдонга тушган энг ёш футболчига айланди.

Дебютини оддийгина аренада ўтказган Радамель кейинчалик еврофутболнинг қоқ марказида барчанинг нигоҳи остида тўп суриб, Колумбия обрўси оширди.

Килиан МБАППЕ (Франция)

Килиан 1998 йилнинг 20 декабрь куни дунёга келди. Аждодлари камерунлик бўлажак футболчининг болалиги ва ўсмирлиги Бонди шаҳрида ўтди. Келажакнинг бош юлдузи сифатида эътироф этилаётган йигитча футбол билан шу ерда шуғуллана бошлади - Франция қуйи лигаларида иштирок этадиган шаҳар номидаги ярим профессионал жамоада.

2017 йилнинг 31 август куни  Мбаппе ижара келишуви асосида «ПСЖ»га ўтди, белгиланган муддат якунлангач эса, парижликлар унинг трансфер ҳуқуқини 180 млн. еврога сотиб олишди. Шу тариқа Килиан жаҳон футболи тарихидаги иккинчи қимматбаҳо ўйинчига айланди ва 2018 йил ёзда жаҳон чемпионати олтин медалини бўйнига тақди.

Поль ПОГБА (Франция)

1993 йилнинг 15 март куни туғилган Поль футболдаги йўлини Парижнинг «Руасси-ан-Бри» ҳаваскорлар клубида бошлади. 2007 йили эса иқтидорли йигит «Гавр» таркибига қўшилди. Погба бу клубда 2 йил шуғуллангач, «МЮ» академияда пайдо бўлди. Футболчи кейинчалик Туринда «Ювентус» юлдузига айланди.

Дейлик, 2013 йили Golden Boy совринини қўлга киритди. 2016 йилнинг августига келиб, «Юнайтед»га қайтган Погба маълум муддат жаҳоннинг энг қимматбаҳо футболчиси (трансфер суммаси - 105 млн. евро) сифатида юрди.

Абдуллохон ИСРОИЛХОНОВ тайёрлади