«Барселона»нинг янги ҳужумчиси клубга бахт келтиришига ишонмоқда. Ниҳоят, «Атлетико»дан кетган Антуан Каталония жамоаси телеканалига интервью берар экан, бу ҳақда дангал гапирди. Франциялик футболчи яна «Барселона» либосини кийиш унинг учун нимани англатишини ҳам алоҳида тушунтирди.

 - Аввало, футбол томон ташланган илк қадамларингизни бирров эсга олсак...

- Эҳ, бошида роса қийналганимни ҳеч унутмайман. Бир қатор клублар мактабига борганман, бироқ негадир ҳар сафар мени қабул қилишни хоҳлашмаган. Гап шундаки, бўйим анча паст эди, шу сабаблими, мураббийлардан рад жавобини эшитганман: «Йўқ, бизга тўғри келмайсан». Аслида бўй масаласи мен учун муаммо эмасди, ҳар ҳолда, тўпни оёғимда яхши ўйнатардим. Муҳими, мушкулотларга қарамай, ишлашда давом этдим. Бунда отам катта ёрдам берганини алоҳида айтишим керак. Ахийри, ажойиб кунлардан бирида «Реал Сосьедад»дан таклиф олдим. Бу ёруғ йўлнинг бошланиши эди.

- Қизиқ, «Сосьедад» вакиллари сизни қандай «топишган»?

- Қандай? Билмадим. Бу муҳим эмас. Муҳими, бўйимга эмас, балки техник салоҳиятимга эътибор қаратадиган клуб чиққанди. Менга айни шу ёндашув катта қувонч бағишлаганди. Ота-онам ҳамиша ҳолимдан хабар олиш имкониятига эга эмасдилар. Ҳар ҳолда, уйдан 900 километр узоқликка йўл олгандим. Шунингдек, ўзим ҳам хоҳлаган пайт яқинларим олдиларига қайтолмасдим. Ўйинлар, машғулотлар, мактабдаги таҳсил... Эсимда, Испаниядаги биринчи йили давомида оиламиз даврасида атиги 10 кун бўлганман, холос. Шу ҳам кунлари қисқа қиш фаслига тўғри келганди. Қисқаси, ўшанда роса қийналганман, ҳаттоки, баъзан пана жойда йиғлаб олардим...

- Катта футболдаги дебют мавсумингизни қандай эслайсиз?

- «Реал Сосьедад» раҳбарияти кейинчалик мен билан профессионал шартнома тузди. Ўшанда жамоа иккинчи дивизиондан элитага чиққанди. Орадан ҳеч қанча ўтмай, Европа Чемпионлар Лигаси йўлланмасини ҳам қўлга киритдик. Бу футболчи сифатида ўсишим учун идеал имконият эди. Умуман, «Сосьедад»да ҳар томонлама улғайдим, кўп нарсаларни ўргандим. Бу жамоадан бир умр миннатдорман, албатта.

- Кейинги бекат - «Атлетико»...

- Диего Симеоне қўл остида шуғулланганим ва ўйнаганим омадим келганидан далолат. Айнан «Чоло» туфайли юксак савияга чиққанимни асло унутмайман. Сизга айтсам, «Атлетико»да дам олиш куни умуман йўқ. Клуб учун  футболчиларнинг жисмоний ҳолати энг муҳим жиҳат саналади. Шунингдек, мураббийлар тактика устида ҳам кўп ишлашади. «Матрасчилар» сафида унутилмас даврни бошдан кечирганим рост. Бироқ танганинг иккинчи томони ҳам бор - бу ЧЛ финалида пенальтидан гол уролмаганим ва мағлубиятга учраганимиз. Ўша омадсизликнинг алами Евро-2016 финалида Португалия термасидан учралган мағлубиятники билан тенг. Буларни ўйлашнинг ўзи азоб...

- Энди «Барса» вакилисиз. Хўш, нималарни режалаштиряпсиз?

- Аввало, айтишим керак, бу мен учун ғурурдир. Зеро, клуб сафига қўшилиб, мақсадларимдан бирига етишдим. Оилам ҳам Каталонияда эканлигимдан бахтиёр. Мутлақо тайёрман ва чиндан ҳам, ушбу клуб футболкасини кийиб, «Камп Ноу» майдонида жавлон урмоқчиман. Умид қиламанки, бу ерда ҳам янги мухлисларнинг қўллаб-қувватлашларидан яйрайман. «Барса» ўйинларини кўп кўрганман ва футболчилар машғулотлардаги ишланмаларни майдонга олиб чиқишларини ҳам биламан. Демак, аввало, янги жамоадошларим билан ўзаро тушуниб тўп суриш ҳақида ўйлашим керак.

- Мессининг бош ролда эканлиги сизга салбий таъсир қилмасмикан?

- У шубҳасиз, биринчи рақамли ижрочи. Лео футболда худди баскетболдаги Леброн Жеймс кабидир - чин тимсол. Умуман, бундай буюк ижрочи 30 йил ёки бундан ҳам узоқ вақтда бир марта туғилади. Лекин унинг мавқеи менга салбий таъсир этиши - асоссиз гап. 

- Айтишларича, голни нишонлаш услубини ўзгартиришни ўйлаётган экансиз...

- Ҳа, «Камп Ноу»да голларни бошқача нишонлашни хоҳлайман. Ўйлайманки, ғоя яхши натижа беради, бироқ ҳозирча барчасини ошкор қилиш ниятим йўқ.

- «Барса» ўйинига ўзгача эффект олиб киришингиз мумкинми?

- Ҳозир дейлик, нечта ўйинда қатнашиш ёки қанча гол уриш ҳақида бош қотираётганим йўқ. Асосийси, майдонда ҳам, унинг ташқарисида ҳам завқ туйсам, бас. Ҳаммага имкон борича ёрдам бериш учун шу ердаман. Клубга бахт олиб келишимга ишонаман.