Биз ўтган йиллар мобайнида «Реал» ва «Барселона» ўзаро ўйнашганида, «Дунёни иккига бўлиб қўйишади» қабилида гапирардик. Аслида, охирги беш-олти йилга қарайдиган бўлсак, бу клубларнинг етакчилари «бўлиб қўйишган экан дунёни». Ҳа, топдингиз, гап Роналду ва Месси ҳақида бормоқда.
2018 йилнинг ёзида Россияда жаҳон чемпионатининг ҳал қилувчи учрашувлари арафасида «бомба» трансфер амалга оширилди: Роналду - «Ювентус» футболчиси! Шу воқеадан кейин «реалчилар» қайси жамоага мухлислик қилишларини ҳам ўйлаб қолишди. «Юве»ми, «Реал»ми?! Асл ишқибоз Мадрид жамоаси тарафида қолди, қолганлари эса туринликларни олқишлашга киришдилар. Ҳаттоки, кўча-кўйда ҳам турли ҳазилларни эшитдим: мабодо, «Реал» мухлиси жамоаси ютқазганда ҳам кулиб юрса, бошқалар унга «Сен «Ювентус»га ўтдингми?» ёки бўлмаса, Роналду сабаб «Юве»ни алқаётганларга қарата «Сен «Реал» ёки «Ювентус» эмас, Роналдунинг мухлисисан», дейишди.
Лекин бошқа томондан олиб қарасак, мана шу трансфер Италия футболи имиджини янада кўтарди. Оддий мисол, трансляциялар масаласида чинакамига олдинга қадам ташлаш кузатилди. Дунёдаги кўпгина телеканаллар «А» серия ўйинларини намойиш этиш ҳуқуқини сотиб олишди. Бу ҳам бир ўсиш. Тўғри, ушбу трансфердан кейин итальян жамоалари халқаро майдонда айтарли натижа қайд эта олишмади, лекин келаси мавсумда бу чемпионат янада кучайишини тахмин қилиш қийин эмас. Сабаб - ёзги трансферлар ойнасида Италия жамоаларининг мураббийлари қилаётган ишлар!
Бир пайтлари Марадона ўйнаб кетган «Наполи», машҳур Римнинг «Рома»си, Миланнинг икки бош жамоаси ҳам анчагина фаол. Улардан ташқари Туриннинг «Юве»си текинга футболчи қўлга киритиш билан банд. Мен сизларга бу трансферларнинг қиймати ёки уларни келаси мавсумда қандай қўллаш кераклиги ҳақида гапирмай, бошқа жиҳат ҳақида сўзлайман.
Шахсан ўзим келаси мавсумда «Ювентус»нинг чемпион бўлмаслигини тахмин қиляпман. Улар бор эътиборни ЕЧЛга қаратишлари катта эҳтимол. «Юве»нинг бир неча йиллик яккаҳокимлиги сабаб чемпионат зерикарли тус олди. Келаси мавсумдан асосан мураббийлар жанги бўлади, деб ўйлайман. «Наполи»да Карло Анчелотти, «Интер»да Антонио Конте, «Ювентус»да Маурицио Сарри. Агар «Милан»га Моуриньо келса, даҳшат бўларди, дегандим, «россонери» бошқа мураббийни танлади.
Маурицио Сарри бир мавсум Лондон ҳавосидан баҳраманд бўлди. «Челси»да нафақат Сарри, балки Антонио Конте ҳам ишлаган. Демак, «Юве» - «Интер» қарама-қаршилиги ҳозирданоқ янги интрига ҳосил қилмоқда. Яхши жамоаси бор Анчелотти ҳимоясини мустаҳкамламоқда. Костас Манолас ёмон футболчи эмас, Кулибали (агар жамоада қолса) билан яхши тандем бўлади. Икарди, Роналду, Пентек, Инсинье каби топ-ҳужумчиларни ўтказмасликка ҳаракат қилади.
Сарри эса ярим ҳимоясини мустаҳкамлаяпти. Боз устига, Буффон ҳам жамоага қайтди. Менимча, Жижи фаолияти сўнгида ЕЧЛ кубогини ютмоқчи. Ўтган мавсум «ПСЖ» билан бу ишни қила олмади, бироқ энди Турин жамоаси сафида азалий орзусини амалга оширишга уриниб кўради. Акс ҳолда, Буффон жимгина футболдан кетаверса бўлади. Барибир, келажакда биз уни эслаганимизда буюк дарвозабон сифатида ёдга оламиз.
«Интер» ҳамма чизиғини кучайтириш билан банд. Шу кетишда бўлса, Конте ўзининг жамоасини даҳшатли қилиб олмоқчи. Яқинда янги футболчилари келса, унда идеал таркиб шаклланиши мумкин. Лекин бир нимадан қўрқяпман - «Интер»нинг трансферлари худди бир-икки йил аввалги «Милан»нинг трансферлари каби муваффақиятсиз бўлмасин-да, ишқилиб.
Ўтган йили «Аталанта»нинг ЕЧЛга чиқишига ишонганмидингиз? Балки янги мавсумда ҳам бирор клуб сенсациялар қайд этар?! Балки «Милан», «Рома», «Лацио» каби жамоалар юқорида номи тилга олинган клублардек муваффақиятли иштирок этишмас, лекин яхшигина қаршилик кўрсатишади, деган умиддаман.
Хуллас, дўстлар, барчангизни Италия чемпионати асримизнинг аввалидаги ҳолига қайтаётгани билан табриклайман. «Сен қаердан биласан, ҳали мавсум бошланмади-ку» дейишингиз мумкин, лекин менда қандайдир ички туйғу бу чемпионатнинг яна «улғаяётганини» тахмин қилмоқда. 2018|2019 йиллар мавсумида еврокубокларда Англия жамоалари ҳукмронлик қилишди, чемпионлик интригасини ҳам шу чемпионат вакиллари охиригача сақлаб туришди. Келаси мавсумда бу ишни Италия клублари бажаришса, асло ажабланманг, шунчаки, ушбу мақоламни эсласангиз кифоя...
Оғабек САМИСОВ
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20