Бразилия миллий жамоаси Америка кубоги-2019 ғолибига айлангач, турли манбаларда Дани Алвеш фаолияти давомида 40-совринини ютгани ва бу борада жаҳоннинг мутлақ рекодчисига айлангани ҳақида маълумотлар берилди. Лекин аслида бундай эмас экан. Йўқ, «Копа Америка»да «пентакампеонлар»ни сардор ролида майдонга бошлаб тушган ва якунда чемпионликни тантана қилиш баробарида турнирнинг энг яхши  футболчиси сифатида эътироф этилган Дани Алвеш чиндан ҳам, профессионал фаолияти давомидаги совринлари сонини 40тага етказиб қўйди. Ўнг қанот фулбеки шунча жамоавий совринни 18 йил давомида қўлга киритди. Айтиш жоиз, фахрий ҳимоячи Бразилия миллий жамоасининг 115та ўйинида иштирок этган. У самарали фаолиятини ўз юртида, аниқроғи, Байя шаҳрида бошлаган ва еврофутболга 2002 йили юзланган эди. Алвеш шу кунга қадар «Севилья», «Барселона», «Ювентус» ва «ПСЖ» клублари сафида ҳам миллий чемпионатлар, ҳам халқаро турнирларда мунтазам равишда ғалаба нашидасини сурди. Дейлик, Каталония жамоаси билан 3 марта ЧЛ кубогини қўлга киритди.  36 ёшли футболчи совринлар коллекциясини Бразилия термасидаги фаолияти орқали ҳам бойитди. Яъни Америка кубоги ва Конфедерациялар кубогида 2 мартадан зафар қучди. Фақат шуниси борки, Дани ҳозирча футбол тарихидаги энг совриндор ўйинчи эмас. Мана, қуйидаги фотогалерея (манба - football.ua)га қараб, унинг кимлардан олдинда ва орқада эканлиги хусусида маълумот олишингиз мумкин. Демак, бошладик, саҳнада - футбол тарихида энг кўп соврин ютган ўйинчилар.

Витор БАЙЯ (Португалия) - 34та соврин

Клублари: «Порту», «Барселона»

Совринлари: Португалия чемпионати олтин медали (10та), Португалия кубоги (5та), Португалия суперкубоги (9та), УЕФА кубоги (1та), Қитъалараро кубоги (1та), Европа ЧЛ кубоги (1та), Испания чемпионати олтин медали (1та), Испания кубоги (2та), Испания суперкубоги (2та), Европа кубок эгалари кубоги (1та), Европа суперкубоги(1та)

Португалия миллий жамоасида: 80та ўйин

Витор Байя - «Порту» клубининг чин афсонаси. «Аждарлар» тарбияланувчиси асосий жамоа дарвозасини 500тадан кўп ўйинда қўриқлади. У шунингдек, би неча мавсум «Барселона» шарафини ҳимоя қилди. «Порту» билан нақ 10 марта Португалия чемпиони бўлгани - фантастика. Умуман, Витор ўз совринларининг хилма-хиллиги билан мақтаниши мумкин. Дейлик, собиқ дарвозабон УЕФА кубоги ва ЧЛдек нуфузли турнирларда ҳам ғалаба нашидасини сурди. У шунинг баробарида деярли 10 йил давомида Португалия миллий жамоасининг биринчи рақамли голкипери ролини бажарди. Тўғри, фаолиятига 2007 йили нуқта қўйган Байяга терма жамоалар миқёсида олий пробали соврин ютиш насиб этгани йўқ.

Златан ИБРАГИМОВИЧ

(Швеция) - 35та соврин

Клублари: «Мальмё», «Аякс», «Ювентус», «Интер», «Барселона», «Милан», «ПСЖ», «МЮ», «Лос-Анжелес Гэлэкси»

Совринлари: Англия Лига кубоги (1та), ЕЛ кубоги (1та), Англия суперкубоги (1та), Испания чемпионати олтин медали (1та), Испания суперкубоги (2та), Европа суперкубоги (1та), Италия чемпионати олтин медали (4та), Италия суперкубоги (5та), Франция чемпионати олтин медали (4та), Франция кубоги (2та), Франция Лига кубоги (3та), Франция суперкубоги (4та), Голландия чемпионати олтин медали (2та), Голландия кубоги (1та), Голландия суперкубоги (2та), Клублар ўртасидаги ЖЧ олтин медали (1та)

Швеция миллий жамоасида: 116та ўйин

Шундай бўлиб чиқдики, замонавий футболнинг бош юлдузларидан бири энг буюк кўчманчилар қаторига қўшилди. Италия, Испания ва Францияда миллий совринлардан улкан «хирмон» ясаган Ибра 2016 йили АПЛни забт этиш илинжида «МЮ» билан шартнома тузди. Зеро, Златан Англия лигасида ҳам муааммосиз ўйнай олишини амалда исботлаб қўйишни истади. У шу тариқа «қизил иблислар» либосида икки мавсум тўп сурди ва якунда «Лос-Анжелес Гэлэкси» таклифини қабул қилиб, океан ортига йўл олди. Асосийси, бетакрор Ибрагимович ҳамон ақл бовар қилмас савияда тўп сурмоқда. Швед ҳуҳумчисининг энг баракали фаолияти «ПСЖ»да ўйнаган даврига тўғри келди - жами 13та соврин.

Райан ГИГГЗ (Уэльс) - 35та соврин

Клуби: «МЮ»

Совринлари: Англия чампионати ол-тин медали (13та), Англия кубоги (4та), Англия Лига кубоги (4та), Европа ЧЛ кубоги (2та), Англия суперкубоги (9та), Клублар ўртасидаги ЖЧ олтин медали (1та), Европа суперкубоги (1та), Қитъалараро кубоги (1та)

Уэльс миллий жамоасида: 64та ўйин

Уэльс футболи афсонаси бутун фаолиятини «МЮ»га бағишлади ва нақ 20 йил давомида жамоанинг алмаштирилмас футболчиси бўлиб юрди. Қисқаси, «қизил иблислар» таркибидаги муҳим ижрочи ролида катта тарих яратилишига салмоқли ҳисса қўшди. Хусусан, Райян сэр Алекс Фергюсон қўл остида Англиянинг 13 карра чемпионига айланди - мутлақ рекорд. Қолаверса, у Европа Чемпионлар Лигасида 2 марта ғалаба завқини туйди. Гиггз шунингдек, «МЮ» либосида 963та расмий ўйинда майдонга тушиб, клуб рекордчиси мақомини олди. «МЮ» тарихидаги энг яхши тўпурарлар орасида эса 7-ўринни банд этиб турибди - 168та гол.

Лионель МЕССИ (Аргентина) - 35та соврин

Клуби: «Барселона»

Совринлари: Испания чемпионати олтин медали (10та), Испания суперкубоги (8та), Испания кубоги (6та), Европа ЧЛ кубоги (4та), Клублар ўртасидаги ЖЧ олтин медали (3та), Европа суперкубоги (3та), Олимпиада олтин медали (1та)

Аргентина миллий жамоасида: 136та ўйин

Эҳтимолки, Лионель Месси «Барселона»нинг янги тарихида ғалабалар кафолатидир. Каталония клуби бошқаруви Хосеп Гвардиолага топширилиши аргентиналик даҳочанинг юксалиш ва нур сочиш даврига тўғри келди. Натижада улар биргаликда ҳам Испания, ҳам Европа миқёсидаги турнирларда бирин-кетин совринлар юта бошлашди. Рақамларда айтсак, «Манчестер Сити»нинг амалдаги устози Каталония клубида 5 йил ишлаган бўлса, Лео бу вақтда «кўк-анорранглилар»ни Примеронинг ўзида 4 бора ғалаба сари етаклади, қолаверса, клуб ЧЛда 2 марта шоҳсупага чиқди. Умумий ҳисобда айтсак, аргентиналик юлдуз ҳисобида 10та чемпионлик мақоми ва 4та «шалпангқулоқ» кубок бор. «Бир кам дунё» - бу ибора Месси фаолиятида ҳам ўз моҳиятини намоён қилмоқда. Ҳар ҳолда, клуб футболида буюк натижаларга эришаётган голеадор Аргентина миллий жамоасида ҳали бирор соврин ютгани йўқ. Хуллас, 2008 йили олимпия термаси сафида қўлга киритилган Олимпиада олтин медали «альбиселест»нинг 32 ёшли етакчиси учун ҳамон ягона юпанч бўлиб қолмоқда.

Андрес ИНЬЕСТА (Испания) - 35та соврин

Клублари: «Барселона», «Виссел Кобе»

Совринлари: Испания чемпионати олтин медали (9та), Испания суперкубоги (7та), Испания кубоги  (6та), Европа ЧЛ кубоги (4та), Клублар ўртасидаги ЖЧ олтин медали (3та), Европа суперкубоги (3та), Европа чемпионати олтин медали (2та), ЖЧ олтин медали (1та)

Испания миллий жамоасида: 131та ўйин

Хосеп Гвардиола даврида «Барселона»нинг алмаштирилмас ўйинчиси даражасига чиққан яна бир ижрочи. Андрес Иньеста «блаугранас» ярим ҳимоясида Хави билан бирга идеал дуэт ҳосил қилиб, Гвардиолага «тики-така» тактикасини жорий этиш имкониятини берди. Иньеста яна Испания миллий жамоасида ҳам мислсиз ютуқларга эришди. Яъни «фурия роха» билан қитъа чемпионатида 2 бора, жаҳон биринчилигида эса бир марта зафар куйини тинглади. ЖЧ-2010 финалида Голландия терма жамоаси дарвозасига ягона ғалаба голини айнан Андрес йўллади. 35 ёшли хавбек айни пайт Японияда «Виссел Кобе» шарафини ҳимоя қилмоқда.

Александр ШОВКОВСКИЙ

(Украина) - 37та соврин

Клублари: «Динамо» К., ЦСКА ЗСУ

Совринлари: Украина чемпионати олтин медали (14та), Украина кубоги (11та), Украина кубоги (6та), Ҳамдўстлик кубоги (4та), Лобановский мемориали кубоги (2та)

Украина миллий жамоасида: 92та ўйин

Шовковский 20 йилдан кўп вақт давомида Киев «Динамо»сининг биринчи рақамли дарвозабони мақомини ҳеч кимга бермади, ҳисоб. У жумладан, киевликларнинг Украина элит лигасида ҳукмронлик ўрнатишларига ёрдам бериб, нақ 14 марта бўйнига олтин медаль тақди. Пенальтиларни бартараф этиш мутахассиси сифатида ҳам ном қозонган дарвозабон узоқ вақт Украина миллий жамоаси етакчилари қаторида ўйнаб, ЖЧ-2006 чорак финалигача борди. Умуман, Шовковский самарали профессионал фаолиятини 2016 йили 41 ёшида якунлади. Инсоф юзасидан айтиш керак, Александрнинг 6та соврини аслида умумий ҳисобга кирмаслиги керак. Чунончи, улар норасмий турнирлар маҳсулидир. 

МАКСВЕЛЛ (Бразилия) - 37та соврин

Клублар: «Крузейро», «Аякс», «Эмполи», «Интер», «Барселона», «ПСЖ»

Совринлари: Европа ЧЛ кубоги (1та), Испания чемпионати олтин медали (2та), Испания кубоги (1та), Испания суперкубоги (3та), Италия чемпионати олтин медали (3та), Италия суперкубоги (1та), Франция чемпионати олтин медали (4та), Франция кубоги (3та), Франция суперкубоги (4та), Франция Лига кубоги (4та), Голландия чемпионати олтин медали (2та), Голландия кубоги (1та), Голландия суперкубоги (3та), Бразилия кубоги (1та), Клублар ўртасидаги ЖЧ олтин медали (2та), Европа суперкубоги (2та)

Бразилия миллий жамоасида: 10та ўйин

Чап қанот ҳимоячиси бутун фаолиятини Европанинг энг кучли клублари сафида ўтказди, асосийси, деярли ҳар жойда муваффақиятга эришди. «Аякс», «Интер», «Барселона» ва «ПСЖ»да ёрқин из қолдирган бразилиялик баракали фаолиятига 2017 йили нуқта қўйди. Ҳа, у бу клубларнинг барчаси билан соврин ютди, лекин Париждаги даври алоҳида ўрин тутади, барибир. Диққат қилинг, Максвелл ҳисобидаги 37та совриндан 15тасида «ПСЖ» тамғаси бор. Ваҳоланки, у «қизил-кўклар» сафида 5 йилгина тўп сурди, холос.

Иброҳим ҲАССАН (Миср) - 37та соврин

Клублари: «Ал-Аҳли», ПАОК, «Ксамакс», «Ал-Айн», «Замалек», «Ал-Масри»

Совринлари: Миср чемпионати олтин медали (14та), Миср кубоги (5та), Миср суперкубоги (2та), Африка Кубок эгалари кубоги (4та), Африка ЧЛ кубоги (2та), Араб клублари чемпионлар кубоги (1та), Араб клублари кубок эгалари кубоги (1та), Араб клублари суперкубоги (1та), Афро-Осиё кубоги (1та), Африка суперкубоги (1та), Араб клублари ЧЛ кубоги (2та), Саудия-Миср суперкубоги (1та), БАА чемпионати олтин медали (1та), Араб Миллатлар кубоги (1та)

Миср терма жамоасида: 131та ўйин

Иброҳим Ҳассан - 1980-2000 йиллар оралиғида Миср терма жамоаси сафида жавлон урган футболчи. Ўнг қанот ҳимоячиси сифатида танилган араб шунингдек, кўплаб клубларда кўриниш берган. Тўғри, у фаолиятининг катта қисмини жонажон юрти чемпионатида ўтказди. Европада эса Греция ва Швейцария, Осиёда БАА лигаларида ўйнади. У ҳам қайси клубга бормасин, муваффақият қозониш уддасидан чиққан кам сонни футболчилар тоифасига киради. Совринлар коллекциясига назар солсангиз, ҳам миллий турнирлар, ҳам халқаро миқёсдаги мусобақаларда ютилгани етарли.

Дани АЛВЕШ (Бразилия) - 40та соврин

Клублари: «Байя», «Севилья», «Барселона», «Ювентус», «ПСЖ»

Совринлари: Испания чемпионати олтин медали (6та), Испания суперкубоги (5та), Испания кубоги (5та), Италия чемпионати олтин медали (1та), Италия кубоги (1та), Франция чемпионати олтин медали (2та), Франция кубоги (1та), Франция Лига кубоги (1та), Франция суперкубоги (2та), Европа ЧЛ кубоги (3та), Клублар ўртасидаги ЖЧ олтин медали (3та), УЕФА кубоги (2та), Европа суперкубоги (4та), Америка кубоги олтин медали (2та), Конфедерациялар кубоги (2та)

Бразилия миллий жамоасида: 115та ўйин

Ҳа, Дани Алвеш «Копа Америка»-2019да фаолияти давомида 40-марта жамоавий соврин ютди. Ўнг қанот ҳимоячиси энг омадли ва баракали даврни «Барселона» сафида ўтказди. У бу жамоа билан нақ 23та соврин ютди, албатта, Лионель Месси ва Андрес Иньеста кўмаги остида. 36 ёшли фахрий яқинда «ПСЖ» билан хайрлашди. Тушунарлики, Алвеш ҳали чекинмайди. Ахир унинг совринлар сони бўйича тарихий рекорд кўрсаткични такрорлаши учун яна 1тагина ютуқ керак.

Ҳуссам ҲАССАН (Миср) - 41та соврин

Клублари: «Ал-Аҳли», ПАОК, «Ксамакс», «Ал-Айн», «Замалек», «Ал-Масри», «Терсана», «Ал-Иттиҳод»

Совринлари: Миср чемпионатини олтин медали (14та), Миср кубоги (5та), Миср суперкубоги (2та), Африка Кубок эгалари кубоги (4та), Африка Чемпионлар кубоги (2та), Араб клублари чемпионлар кубоги (1та), Араб клублари кубок эгалари кубоги (1та), Араб клублари суперкубоги (2та), Африка ЧЛ кубоги (2та), Араб клублари ЧЛ кубоги (1та), Саудия-Миср суперкубоги (1та), Африка Миллатлар кубоги (3та), Африка ўйинлари кубоги (2та), Араб миллатлар кубоги (1та)

Миср миллий жамоасида: 169та ўйин

Футбол тарихидаги энг совриндор ўйинчи - мисрлик Ҳуссам Ҳассан фаолиятининг катта қисмида эгизак акаси Иброҳим билан бирга ўйнади. Фарқли томони, у ҳужумчи сифатида танилди. Миср миллий жамоасида эса 20 йил давомида 169 марта майдонга тушиб, бу борада рекорд ўрнатди. Ҳуссам ҳам худди акаси каби асосан Миср клубларида шуҳрат қозонди. Унинг еврофутболдаги энг катта натижаси - бу УЕФА кубоги-1991|1992да Швейцариянинг «Ксамакс» клуби учун «Селтик» дарвозасига 4та гол ургани.

Абдураҳмонхўжа АҲМЕДОВ тайёрлади.