«Қизил оқлар» бўлажак мавсумга кадрлар борасидаги катта ўзгаришлар билан тайёргарлик кўришмоқда. Диего Симеоне бу сафарги трансферлар бозорида бир қатор қадрдон шогирларидан айрилди - Диего Годин, Антуан Гризманн, Фелипе Луис... Тўғри, «Атлетико» раҳбарияти шунинг баробарида харид масаласида ҳам фаоллик кўрсатишга уринди. Дейлик, португалиялик ёрқин иқтидор Жоау Фелиш трансферига нақ 126 миллион евро сарфланди.

Бош сотувчи

Аслида Мадрид «Атлетико»си ёзда ўз таркибини кескин янгилашга ўрганган эмас, лекин ҳар бир трансферлар мавсумида футболчиларни сотиш имконияти туғилса, бу ишни сира пайсалга солмайди. Мисол учун, жамоа охирги 10 йил бадалига Европада трансферлар тушуми бўйича мутлақ етакчилик қилмоқда. Рақамларда айтсак, «матрасчилар» раҳбарияти бу муддат ичида жами 212 нафар футболчи савдосидан деярли 1 миллиард евро олишди. Аниқроқ айтсак, 15 июль куни бу сумма 973,35 миллион еврога етди. AS нашри маълумотларига кўра, кейинги 3та яхши натижа «Бенфика» (967,66 миллион евро), «Монако» (939,85 миллион евро) ва «Челси» (923,22 миллион евро)га тегишли. Умуман, «Атлетико» навбатдаги трансферлар бозорида улгуржи савдога киришгани билан ажралиб турди.

«Янгича безаш»

Бундан 2 ойча муқаддам «атлет»  қисмларга бўлиниб кетадигандек таассурот уйғонган эди. Чунончи, «қизил-оқлар» ҳимоясидаги 3та «кит» - Диего Годин, Филипе Луис ва Хуанфран бирин-кетин «матрасчилар» билан хайрлашишларини эълон қилишди. Кейинроқ, яна икки футболчи - Люка Эрнандес ҳамда Родрини ҳам таркибда олиб қолиш имконияти йўқлиги ойдинлашди. Ваҳоланки, «Атлетико» бу йигитларга келажак умиди сифатида қараётган эди. Якунда клуб тарихидаги энг яхши тўпурарлар рўйхатининг 5-қаторида турган Антуан Гризманн ҳам жомадонини йиғиштира бошлади. Тўғри, франциялик голеадор май ойидаёқ кетишни хоҳлаётганини яширмаганди. Хуллас, бундай ҳолатда бош мураббий Диего Симеоненинг қандай йўл тутиши, янги мавсумга қайси таркиб билан ҳозирлик кўриши мутлақо мавҳум масала эди. Лекин тез орада мавҳумлик ўрнини аниқ лойиҳа эгаллади - «Янгича безаш». Оддий айтганда, аргентиналик мутахассис зудлик билан янги кўринишдаги «Атлетико»ни шакллантиришга тушди ва қисқа муддатда бу ишни уддалади ҳам. Айтиш жоиз, бир қарашда, анча рақобатбардош таркиб йиғилди. Ҳар ҳолда, «Атлетико» олдидан Испания чемпионатида олтин медалга даъвогарлик қилиш ва Европа ЧЛда доимгидек, муносиб қатнашиш вазифасини ҳеч ким олиб ташлаган эмас. Чунончи, жамоа мухлислари бошқача бўлишига жимгина қараб турмайдилар.

Рассом Фелиш

Янги таркиб тузишдаги илк қадам сифатида жамоа тарихидаги энг қимматбаҳо трансфер (харид)ни айтиш керак. «Атлетико» раҳбарияти 19 ёшли ярим ҳимоячи Жоау Фелиш учун «Бенфика»га нақ 126 миллион евро тўлади (мадридликлар яна Жоауни тарбиялаган «Порту» академиясига ҳам 1,2 миллион евро беришлари керак). Гап ўтган мавсум барча турнирлар доирасида 20та гол уришдан ташқари, 11та самарали узатмага муаллифлик қилган мегаиқтидор ҳақида кетмоқда. «Қизил-оқлар» Фелиш билан бирданига 7 йиллик шартнома тузишдики, бу ёш йигитчани келажак учун харид қилишганидан далолат. «Матрасчилар» мухлислари эса Жоау «Барселона»га кетган Антуан Гризманн ўрнини босишидан умидворлар. Дарвоқе, Marca газетаси ўз муқовасини португалиялик вундеркинднинг ажойиб сурати билан безади. Яъни фотографлар уни Прадо музейида буюк рассом Диего Веласкеснинг «Менини» картинаси фонида суратга олишди. Энди сарлавҳага эътибор қаратинг: «Рассом келди». Ўз ўрнида «Атлетико» менежментининг юқори савиясини ҳам эътироф этиш керак. Мана, бунга далил бўладиган битта факт: клуб тарихидаги рекорд харид суммаси бўлиб-бўлиб берилади. Оддий айтганда, мадридликлар бу йил атиги 30 миллион евро тўлашса, бас. Тўловнинг қолган қисми режа асосида кейинги йилларда амалга оширилади. «Атлетико» бош директори Мигель Анхель Хиль Марин бундай имтиёзли шартнома тузиш йўлида Португалияга нақ 4 марта борди. У бунда асосан Фелишнинг ўзи ва футболчининг яқинлари билан учрашиб, йигитчани «матрасчилар» фойдасига қарор чиқаришга кўндирди. Натижада Жоау «Ювентус» ва «Манчестер Сити» каби йирик клубларнинг манфаатли чорловини рад этиб, Мадрид томон юз бурди.

«ҚаймоҚранг» ҳам бор...

«Атлетико» таркибини яққол кучайтириши кутилаётган яна бир футболчи  - бу 24 ёшли Маркос Льоренте. «Реал» тарбияланувчиси ҳисобланган ҳужумчи Зайниддин Зидан режаларидан жой ололмаслигини билиб, «Қироллик клуби»нинг азалий ва ашаддий рақиби либосини кийишга қарор қилди. Ушбу трансфер ўз-ўзидан ноодатий саналади. Гап шундаки, Мадриднинг икки клуби анча йиллар олдин бир-бирининг футболчисига кўз олайтирмаслик ҳақида оғзаки келишувга эришган ва бунга амал қилиб келаётган эди. Бироқ «қаймоқранглар» 2 йилча олдин Тео Эрнандес (жорий ёз «Бавария»га йўл олган Люканинг акаси)ни ўз томонларига оғдириб, норасмий шартлашувни бузишди. Энди эса «Атлетико» ҳам шу йўлдан бориб, деярли 10 йилдан кейин «Қироллик клуби» вакилини ўз сафига қўшиб олди. Бунга қадар «Реал» вакилларидан Хосе Мануэль Хурадо  «матрасчилар»нинг қизил-оқ тусли формасини кийган охирги футболчи бўлганди (у 2006-2010 йиллар оралиғида «Атлетико» учун ўйнаган). Дарвоқе, «Атлетико» раҳбарияти «Реал»нинг яна бир аъзоси Хамес Родригесни ҳам ўз томонига оғдириш ҳаракатини бошлагани ҳақида гап-сўзлар бежиз тарқалмади. Хуллас, колумбиялик юлдуз «Атлетико»нинг навбатдаги харидига айланиши ҳеч гап эмас (мақола ёзилаётган пайт бу хусусда расмий хабар йўқ эди).

«Реал» тарбияланувчиларини оҒдириш

Умуман олганда, «Атлетико» ва «Реал» академияси тарбияланувчилари ўртасида қизиқарли тарих бор. Дейлик, мақола ёзилган кун бўйича айтсак, «матрасчилар»нинг охирги хариди - бу «Эспаньол» сафида тўп сурган 24 ёшли марказий ҳимоячи Марио Эрмосодир. Гап вақтида «Қироллик клуби» тизимида нақ 12 йил шуғулланган футболчи ҳақида кетмоқда. Ушбу трансфердан сўнг «матрасчилар» сафидаги «Реал» тарбияланувчилари сони 4 нафарга етди - Эрмосо, Льоренте, Антонио Адан ва Альваро Мората. Энг қизиғи, жамоа сафида ўз академиясида таҳсил олган футболчилар сони бундан кам - 3 нафар (Коке, Сауль Ньигес ва Томас Парти). Тўғри, Симеоне ҳали ўринбосарлар таркибидан истиқболли йигитларни бош жамоага жалб этиш имкониятига эга. Мисол учун, Виктор Мольехо тайёр ҳолатда. Ҳар ҳолда, бу йигитча асосий жамоа сафида 4 марта майдонга тушишга улгурди.

95 йил инглизларсиз

«Атлетико» 17 июль куни ўз сафига Англия терма жамоаси ва «Тоттенхэм» клубининг 28 ёшли ўнг қанот ҳимоячиси Киран Триппьерни қўшиб олди. Мадриднинг «қизил-оқ» қисмида инглиз футболчисини кўриш - ноёб ҳодиса. Ҳа, «матрасчилар» уй аренаси - «Ванда Метрополитано» ЧЛ-2018|2019 финали («Ливерпуль» - «Тоттенхэм» - 2:0) баҳона инглизларга тўлиб кетди. Лекин «уч шерлар»нинг бевосита «Атлетико» либосида майдонга тушган охирги вакили кимлигини билиш учун нақ 95 йил орқага қайтиш керак - мавсум-1923|1924да ҳужумчи Дринкуотер қисқа вақт «матрасчилар» шарафини ҳимоя қилган, аммо клуб тарихида айтарли ҳеч қандай из қолдирмаган. Табиийки, Испания пойтахтида энди Триппьердан ёрқин ўйин кутишади, албатта.

«Зенит» устидан Ғалаба

Янги «Атлетико» ҳимояда Триппьер ва Эрмосодан ташқари, яна 21 ёшли Ренан Лодига ҳам таяниши мумкин. Аслида «Атлетико Паранаэнсе»нинг чап қанот ҳимоячиси Мадрид эмас, балки Санкт-Петербургга йўл олиб, «Зенит» билан шартнома тузиши ҳам мумкин эди. Бироқ бразилиялик футболчи охирги лаҳзаларда Симеоне жамоаси фойдасига қарор чиқарди. Лоди Испания Ла-лигасини танлаб, тўғри қилдими ёки хатога йўл қўйди - буни вақт кўрсатади, албатта. Умуман, аргентиналик «қўмондон» ихтиёрида ўз армиясини янги аскарлар билан тўлдириш учун чамаси яна бир ойча вақт бор. Ҳозирнинг ўзида Симеоне армияси анча даҳшатли кўринмоқда. Номларга қарасак, шундай. Амалда қандай бўлишини билиш учун эса яна озгина сабр қилиш керак.

А.ҲАМИДОВ тайёрлади.