«ТОТТЕНХЭМ» ТАРИХИДАГИ ЭНГ ҚИЙИН ЎЙИН. Лондоннинг «Тоттенхэм» клуби янги мавсумга тайёргарлик жараёнини Осиёда олиб бормоқда. Дейлик, «шпорлар» аввалига Сингапурда «Ювентус» билан куч синашиб, Гарри Кейннинг сўнгги сонияларда майдон марказидан урган ажойиб голи эвазига 3:2 ҳисобида ғалаба қозонишди. Кейинги ўртоқлик учрашувида Гарри бундан-да кўпроқ қийналди. Тўғри, Френки де Лигт ёки Криштиану Роналдуга қарши тўп суриш осон эмас, аммо бир вақтнинг ўзида сизга 100 нафар футболчи тўсқинлик қилса-чи?! Ҳа, футболда шундай ғайриоддий тўқнашувлар ҳам учраб туради. Эътиборли томони, Кейн шундай қийин вазиятни ҳам ўз фойдасига ҳал қилди.
Келинг, энди ҳаммасини батафсил баён этсак. Лондонликлар Сингапур сафаридан сўнг Хитойнинг Шанхай шаҳрига йўл олишди. Улар бу ерда International Champions Cup доирасида «МЮ» билан куч синашишлари лозим эди. Мазкур ўйинга тайёргарлик асносида «шпорлар»нинг 3 нафар аъзоси - Гарри Кейн, Деле Алли ҳамда Эрик Ламела қизиқарли ишга қўл уриб, нақ 100 нафар (!) хитойлик болакайга қарши майдонга тушишди. Хуллас, 3 кишига 100 нафар бола қарши. Дарвоқе, шу ўринда муҳим бир омилни эслатиш лозим: бир неча йилдан буён «Тоттенхэм» либосларида кўриниш бераётган бренд - AIA аслида Хитойнинг йирик суғурта компанияларидан бири бўлиб, жамоа ҳомийси ҳисобланади. Айнан шу компания ташкиллаштирган ўйин учун 6-10 ёшли 100 нафар хитойлик болакай саралаб олинди. Кучлар нисбати ўта номуносиб бўлган ўйин ғоят кескин ўтганини алоҳида таъкидлаш лозим. Қисқаси, «Тоттенхэм» юлдузларига осон бўлгани йўқ. Рақиблар жуда тиришқоқлик кўрсатиб, сон жиҳатдан устун эканликларидан унумли фойдаланишга уринишди. Хуллас, мезбонлар ғалабага иштиёқ туфайли ҳисобни очишди. Бироқ «камбэк»лар устаси саналган «Тоттенхэм» бу ишни яна бир марта уддалади - митти рақиблар Деле Аллини жарима майдончаси ичида йиқитишгач, ҳакам иккиланмай «нуқта»га ишора қилди. Жабрланувчининг ўзи пенальтини аниқ бажариб, якуний ҳисобни ўрнатди - 1:1.
Асосийси, болакайлар шунга ҳам хурсанд. Гарчи тўпурарлик қобилиятини намойиш қилишига кучли «рақибчалар» йўл қўймаган бўлсаларда, Кейн ҳам натижадан мамнун. «Жуда оғир ўйин... Биз ҳисобни ўзгартириш учун бор кучимизни ишга солдик. Рақиб анойи эмас экан - у сон жиҳатдан кўпроқдек туюлди», - дея жиддий туриб ҳазиллашди ҳужумчи. Болалар эса бунга жавоб тариқасида инглиз йигитини туғилган куни билан қизғин қутлашди. «Ўша вазиятда чиндан ҳам, 100 фоиз пенальти бор эди! Умуман олганда, бугун ҳаётимдаги энг муҳим голлардан бирини урдим. Энди бу тўпни албатта, эсдалик учун сақлаб қўяман!» — деди ҳансираганча Деле Алли.
Хуллас, Чин юртида «Тоттенхэм» - «Манчестер Юнайтед» учрашувига қадар шундай ғаройиб қарама-қаршилик кузатилди...
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20