«Барселона» клуби ҳамда Испания терма жамоаси ҳимоячиси Жерар Пике тасарруфидаги «Андорра» клуби янги мавсумни Сегунда-Бда бошлайдиган бўлди. У молиявий муаммолар туфайли мусобақалардан четлатилган «Реус Депортиу» ўрнини эгаллайди. Мазкур хабар сабабли хорижлик касбдошларимизда мухлисларни футбол жамоаларига раҳбарлик қилаётган футболчилар билан таништириш истаги уйғонди.

Роналдо ва «Вальядолид»

Ўтган йили Бразилия терма жамоасининг собиқ ҳужумчиси камтарин жамоа акциялари назорат пакетини харид қилиб, президентлик лавозимини эгаллади. Янги соҳиб жарангдор ваъдаларни бермади, фақат Примеранинг доимий иштирокчисига айланиш учун «Вальядолид» етарли шарт-шароитга эга бўлишини маълум қилганди. Илк мавсумни унинг жамоаси анчайин беқарор ўтказган бўлсада, элитадаги ўрнини сақлаб қолди.

Испанияга келгунга қадар Роналдо АҚШнинг «Форт-Лодердейл Страйкерс» клуби акциядорларидан бири эди. Ҳозир бу жамоа ўз фаолиятини тўхтатган.

Дэвид Бекхэм ва «Интер Майами»

2007 йилда «Лос-Анжелес Гэлакси» сафига ўтган афсонавий ярим ҳимоячи футбол клубини шакллантириш ҳуқуқига ҳам эга бўлганди. Футболчилик фаолиятини якунлагач, Бекс 25 млн. доллар эвазига МЛС жамоасини тузишга киришди. Унинг клуби 2020 йилда АҚШнинг бош лигасида дебютини нишонлайди. Жамоа ҳозирча тўлақонли фаолиятини йўлга қўя олмаган бўлсада, Дэвид яқин келажакда Роналду ва Мессини ҳамкорликка таклиф этиш ниятида.

Паоло Мальдини ва «Майами»

Бундан 4 йил аввал Мальдини бизнесмен ватандоши Рикардо Сильва билан ҳамкорликда «Майами» клубини ташкил этиш ҳуқуқини харид қилганди. Қўшимчасига, собиқ ҳимоячи «Милан»нинг техник директори вазифасини ҳам адо этмоқда.

Дарвоқе, 2018 йилда АҚШ футбол федерацияси Шимолий Америка футбол лигасига МЛСдан кейинги мусобақа мақомини беришдан бош тортган ва чемпионат тўхтаб қолганди. Лекин янги йилда унинг фаолияти давом эттирилиши режалаштирилган.

Дидье Дрогба ва «Финикс Райзинг»

2017 йилда африкалик ҳужумчи эркин агент мақомида жамоага ўтган ва бир йўла клуб акцияларининг маълум қисмини ўз тасарруфига олганди. «Финикс» 2-лига вакили. Бироқ клуб мутасаддилари унинг МЛСда иштирок этишини истамоқдалар. «Финикс» тасарруфида «Челси»нинг собиқ ҳужумчисига созанда Пит Вентц, бейсболчи Брэндон Маккарти ва Диплолар ҳамкорлик қилишмоқда.

Гари ва Фил Невилл, Пол Скоулз, Райан Гиггз, Ники Батт ва «Солфорд Сити»

2014 йилнинг март ойида «МЮ» юлдузлари бирлашиб, шаҳарнинг ярим профессионал клубини ўз тасарруфларига олишганди. Тез орада улар сафига қўшилган сингапурлик бизнесмен Питер Лим акцияларнинг 50 фоизини харид қилди. Қолган 50 фоизи эса манчестерлик «беш оғайни ботирлар»да қолди.

Сармоядорларнинг алмашуви «Солфорд»га ижобий таъсир этиб, жамоа 8-лигадан 2-дивизионгача кўтарилди. Райан Гиггзнинг маълум қилишича, раҳбарият яқин йиллар ичида жамоани Чемпионшипга олиб чиқишни мўлжалламоқда.

Эден Азар ва «Сан-Диего 1904»

Американинг бу клубига 2017 йилда асос солинган. Бельгиялик ярим ҳимоячи уни Демба Ба, Йоан Кабай ва Мусса Соу каби касбдошлари билан ҳамкорликда сотиб олди. Сармоядорларнинг ишлари ҳозирча кўнгилдагидек кетмаяпти. Улар жамоанинг Шимолий Америка Лигасида тўп суришини мўлжаллашганди, режа амалга ошмади. Кейин эса USL розилигини олишга уринишди. Бироқ лиганинг барча талабларини қондиришга улгуришмади. «Сан-Диего 1904»нинг бир қисми бўлганим билан фахрланаман. Бу шаҳар ва унинг аҳолиси ўз профессионал клублари бўлишига ҳақлилар. Ишончим комилки, улар жамоани доимий равишда қўллаб-қувватлайдилар», - деди Азар.

Ака-ука Комбаровлар ва «Домодедово» ФК

Кирилл ҳамда Дмитрий Комбаровлар қадрдон шаҳрилари жамоасининг асосчилари ҳисобланишади. Узоқ вақт давомида уларнинг оталари Владимир Комбаров клуб директори лавозимида ишлаган. Энди унинг фарзандлари жамоани бошқаришмоқда.

Ака-ука сармоядорлар ўз олдиларига клубни биринчи, кейин олий лигага олиб чиқиш вазифасини қўйган эдилар. Афсуски, «Домодедово» 2017 йилда стадионни қайта таъмирлашга киришиб, ПФЛ биринчилигида иштирок эта олмади.

Ж.Бобохонов тайёрлади.