17 апрель. «Манчестер Сити» ва «Тоттенхэм» Чемпионлар Лигаси чорак финалининг жавоб учрашувида мухлисларга ажойиб спектаклни туҳфа этишганди. Биринчи ўйинда «шпорлар» 1:0 ҳисобида ғалаба қозонишган, жавоб баҳсида эса «шаҳарликлар» 4:3 кўринишида олдинда боришаётганди. Шу паллада Раҳим Стерлинг бешинчи тўпни киритди, аммо видеотакрорлардан кейин гол бекор қилинди ва «Сити» мусобақани тарк этди.

17 август. «Манчестер Сити» ва «Тоттенхэм» АПЛ иккинчи турида ўзаро куч синашишди. Габриэль Жезус сўнгги дақиқаларда ғалаба тўпини киритди, аммо VAR хулосасидан кейин гол бекор қилинди. Ўйин 2:2 ҳисобида якунланди. «Шаҳарликлар»нинг қувончи яна узоққа чўзилмади.

Тўрт ой аввалги ҳолатда Стерлингнинг голидан кейин Хосеп Гвардиола ақлдан озаёзганди. «Раҳим тўп киритган пайтда офсайд бор экан, бу шафқатсизлик. Биз байрамни бошлаб юборгандик, ярим финалга жуда яқин келгандик. Шундай бўлиши керак экан, нима ҳам дердик. Мен ўша эпизодни тўлиқ кўриб чиқдим ва юқоридаги шахслар буни ўйиндан ташқари ҳолат деб баҳолашди», - деганди мураббий ўша учрашувдан кейин.

«VAR ҳақида гапириш шу қадар зерикарлики. Баъзан ушбу тизим сизга ёрдам берса, баъзан акси бўлади. УЕФА VARни ҳакамларга ёрдам бериш учун татбиқ этган экан, нима ҳам қила олардим?», - дея қўшимча қилди Пеп кейинроқ.

Афтидан, Гвардиоланинг VARга нисбатан нафрати янада ортадиган кўринади. Ҳа, «Тоттенхэм»га қарши ўтган сўнгги баҳс ҳам унинг кайфиятини бузди. Боз устига, иккинчи бўлим ўрталарида Серхио Агуэро билан жанжаллашиб қолди.

«Буларнинг бари Чемпионлар Лигасида қолиб кетди, деб ўйлагандим, лекин яна такрорланди. Бу шафқатсизлик, - деди Пеп бекор қилинган гол ҳақида гапираркан. - Аммо бунга кўнишдан ўзга чора йўқ».

Муҳими, Жезус дарвозани ишғол қилган вазиятда Агуэро билан қучоқлашиб ярашишди. Аммо гол бекор қилинганидан кейин аргентиналик ҳужумчи ҳам ҳайрон бўлишда мураббийдан қолишмади.