Одатда, ўтмиш афсоналарининг «Ҳаммасини бошлаган жойга қайтиш - фантастиканинг ўзгинаси» дейишганига кўп гувоҳ бўлганмиз. Аммо Марко Симоненинг бу борадаги қараши ўзгача: «Қайтишим амри-маҳол. Мени директорлар ва агентлар қўллаб-қувватлашмаяпти. Машҳур бўлмасанг, сен учун жой топилиши қийин экан. Алоқаларинг йўқми, жамоага яқинлаштиришмайди. Ўзимга-ўзим савол бераман: наҳотки, клуб раҳбарларидан бирортасининг хаёлига менинг номим келмаган бўлса?» Ҳозир Симоне Таиландда мураббийлик қилмоқда, ваҳоланки, ўтган йилнинг ёзида у «Милан» билан икки йиллик шартномага эга эди - Марко ўринбосарларни бошқариши кутилганди. Аммо клуб кутилмаганда иккинчи жамоа ғоясидан воз кечди.

- Шундан сўнг ярим йил ишсиз юрдим, - дейди Симоне. - 5-6та таклиф тушди, катта маош беришларини айтишди, лекин кўнмадим, чунки «Милан»га қайтишни хоҳладим. Майли, иккинчи жамоага бўлса ҳам. Келишув ўхшамаган паллада эса бошқа вариантлар ҳам қолмаганди. Алоҳида таъкидламоқчиманки, ҳеч қачон «Милан»дан менга иш топиб беришни сўрамаганман. Менинг номзодимни Гаттузо таклиф қилганди.

- Айтишларича, бир неча кун меҳмонхонада янгилик кутган экансиз.

- Шундай бўлганди. Бир ҳафта мобайнида ёрдамчиларим билан хабар келишини пойлаганмиз. Мен билан учрашишдан қочиб юрган Леонардони кутгандик. Ҳурматдан дарак ҳам йўқ. Ҳар ҳолда, «Милан» билан қандайдир ютуқларга эришгандим, ахир...

- Ҳамон алам қиляптими?

- У мен билан яхши муносабатда бўлмади. Бу лойиҳани кўришни ҳам хоҳламади. Ўринбосарлар жамоасидан воз кечишни «молиявий фэйр-плей» билан изоҳлашди, лекин ҳаммаси бюджетга киритилганди. Оқибатда Примавера ғояси йўқ бўлди, ваҳоланки, унинг таркибидан яхшигина ёш футболчилар чиқиши мумкин эди. Умуман, Леонардо бутун бошли «Милан»га ҳурматсизлик қилди. Афсус, ахир Мальдини ушбу лойиҳа бўйича ижобий фикр билдирганди. Кейинчалик уларнинг иккиси билан ҳам учрашдим.

- Қайси масала бўйича?

- Примаверани бошқаришни таклиф қилишди, мен рози бўлдим. Бўлиб ўтган воқеалардан кейин, эҳтимол, айбларини тан олишларини кутгандим. Лекин ундай бўлмади. Бу эса янада кўпроқ ранжитди мени.

- Мальдинининг директорлик фаолиятига қандай баҳо берасиз?

- Клубда Леонардо борлигида Мальдини уни қўллаб-қувватларди. Қанақасига бундай бўлиши мумкинлигини тушунмасдим. Мальдини - бу «Милан», у қарор чиқариши керак. Паолонинг Леога ёрдамчи бўлгани нотўғри эди. Энди у ўз жойида, кўпроқ тажриба тўплаши лозим.

- Лекин энди клубда Бобан бор.

- Икки чемпион клуб рулида. Звоне жуда малакали. Биз тез-тез гаплашиб турамиз. «Милан» бошқаруви уларнинг қўлига ўтганидан хурсандман, бу ажойиб дуэт. Бу икковлон «Милан» манфаатлари шахсий манфаатдан устунлигини тушунади. Паоло билан Миланеллода бирга яшаганмиз, у идеал спортчи. Бобан майдонда ҳам, унинг ташқарисида ҳам ҳақиқий артист эди, бизнинг муносабатларимиз яхши бўлган.

- Гаттузога ачиндингизми?

- У кенг кўламли ишни амалга оширди. Қолиши керак эди, гарчи бу таваккалга тенг бўлсада. Аммо одамлар аслида ким айбдор эканини яхши билишади.

- Собиқ ҳужумчининг таҳлили қизиқарли. Пентек ҳақида нима дейсиз?

- У ёрқин таассурот қолдирмоқда, муваффақиятлари бир кунлик эмаслиги аниқ. Кшиштофнинг ўйини менга ёқади, лекин унга янада қулайроқ шароит яратиш керак.

- Бу гап Андре Силвага ҳам тааллуқлими?

- Бу футболчининг ҳаракатлари бўйича ҳам доимо ижобий фикр билдирганман, кучли жиҳатлари кўриниб турибди, лекин «Милан» сабр қилишни хоҳламади, Силвага имконият бермади. Андренинг кетишида унинг ўзини айбдор сифатида кўрсатиш нотўғри.

- Шунингдек, Кутроне ҳам кетди.

- Патрикка ҳам хотиржам бўлишни тавсия қиламан, ахир у «Милан»нинг асосий ўйинчиси бўлишга тайёр эмас. Яхши ҳужумчи, лекин юқори савиядаги эмас. Жамоани ҳозир тарк этиш - яхши вариант эмасди.

У.Умаров тайёрлади.