Аргентиналик эҳтиросга бой Диего Симеоне Мадриддаги 8 йиллик фаолияти давомида «Атлетико»ни испан футболи грандлари қаторига олиб чиқди. Жорий ёзга келиб, жамоа кўплаб етакчилари билан хайрлашди. Демак, дон Диего энди ҳаммасини қайтадан бошлаши керак. Мураббий La Nacion нашри мухбирлари билан мулоқот чоғи жумладан, ўз касбининг энг нозик жиҳатларига алоҳида тўхталди.

- Бизнесменлар ва сиёсатчилардан иборат аудитория қаршисида чиқиш қилганингизда, улар сиздан нималарни кутишлари биласизми?

- Йўқ, умуман билмайман, ҳаттоки, ўзимни улар ўрнида тасаввур ҳам қилолмайман. Биз - мураббийлар ўз ўй-хаёлларимиз билан бандмиз. Албатта, шогирдларим ёки бошқалар билан мулоқот пайти самимий, ошкора ва қизиқарли киши бўлишга уринаман. Уларга ўз ҳиссиётларимни тўлиқ етказишни хоҳлайман.

- Биз - аргентиналиклар... Шахсан сиз ушбу жумлани қандай ниҳоясига етказардингиз?

- Оддий: биз - аргентиналиклар кўплаб фазилатларга эгамиз. Лекин жамоа билан ишлашни ўрнига қўёлмаяпмиз негадир. Юртимиздан чиққан машҳур олимлар, рассомлар ва спортчиларни дунёнинг турли бурчакларида учратиш мумкин. Аммо айни пайт аҳил жамоа шакллантириш масаласида асло мақтанолмаймиз.

- Наҳотки, юртдошларингизга уруш эълон қилсангиз...

- Бу ибора фикримга қанчалик мос тушишини айтолмайман. Биз ўзгалар ҳис-туйғулари, нуқтаи-назари билан ҳисоблашишга ўрганмаганмиз. Энг асосий камчилигимиз ҳам шу, менимча. Нима қила олардик, шундай халқмиз. Жумладан, мен ҳам шу халқ вакилиман ва аргентиналикларга хос хислатлардан бебаҳра эмасман. Ўзимни мақташ ниятидан йироқман, лекин якуний қарорга келишдан аввал ҳар бир шогирдимга имконият бериш йўлларини излайман. Қолаверса, доимо бамаслаҳат иш юритишга интиламан. 13 йилдан буён шу ақидага амал қилиб келяпман. Назаримда, жамиятимизда рўй бераётган воқеалар футболда ўз аксини топаётгандек. Европада мени тинимсиз саволга тутишади: «Шунча кучни қаердан оласиз?» Бунга лўнда жавоб қайтараман: «Биз иқтидорли, тезкор, кучли ва жасоратлимиз». Лекин тан оламан, қўшнимизни ака ўрнида кўрмаймиз...

- Демоқчисизки, фақат ўзини ўйлайдиган худбинсиз, шундайми?

- Ниманидир бошқалар билан баҳам кўрмаслик хислатининг синонимлари жуда кўп. Воқелик шундан далолат берадики, алоҳида олганда, ҳаммамиз зўрмиз, кучлимиз. Кинода, спорт, аниқ фанлар ёки тиббиёт соҳаларида. Ҳар қайси мутахассис фикри ҳурматга муносиб. Аммо жамоа хусусида дангал гапиришнинг иложи йўқ асло.

- Фақат аргентиналик баскетболчиларнинг олтин авлоди бу фикрингизга мутлақо зид...

- Ҳа, албатта! Бироқ бу ўта камёб истисно ҳолати. Тўғри, баскетболчиларимиз жамоа сифатида юксак натижаларга эришишди. Футболга қайтадиган бўлсак, Гальярдо шакллантирган «Ривер Плейт»ни намуна ўрнида кўрсатиш мумкин. Авлодлар алмашуви ва етакчи футболчиларнинг кетишларига қарамай, жамоа ўз хусусиятларини сақлаб қолмоқда. У ҳар мавсум 1та кўп ёки кам соврин ютиши мумкин. Муҳими, клуб изланишни ҳеч қачон тўхтатмайди. Айни шу фазилати эвазига Жанубий Американинг энг кучли жамоалари сафида бормоқда.

- Клуб брендига муносиб даражада фаолият юритиш мураббий олдидаги энг мураккаб юмуш ҳисобланади. Айтингчи, жамоангизни формаси эмас, ўйинига қараб ажратиш имкони борми?

- «Атлетико» бошқа клубларга ўхшамайди, ўзига хос услубга таянади. Ўзи бу тажрибани «Эстудиантес»даёқ ҳаётга татбиқ этган ва самарасини ҳам кўргандим. Кейин «Атлетико»да худди шу йўлдан бориб, барчасини такрорладим. Жамоанинг бош мақсади болакайлардан тортиб қарияларгача, оддий мухлисдан тортиб клуб хизматчисигача - барчага маълум. Бунга заррача шубҳам йўқ. Ҳамма «Атлетико» тимсолида кучли жамоа кўришини яхши билади. Бу ақида жамоа қонига ҳам сингдирилган. Таркибга энг сара ўйинчиларни тўплаганимизда ҳам, ушбу принципдан воз кечмаслигимиз шарт. Шунда мавжуд имкониятлар билан мақсадга етишимиз аниқ.

- Мураббийнинг клуб руҳиятига мос тушиши нечоғли муҳим?

- Клубга келган мураббий унинг тарихини яхши билиши ва тушуниши шарт, албатта. Акс ҳолда, муваффақиятга эришолмайди. Дейлик, агар мен жамоа руҳиятини чуқур ҳис этолмасам, унинг бошқарувини қўлга олмайман асло. Аввал ўзимга савол бераман: «Бу клуб ортида қандай анъаналар, тарих яширин?» Мисол учун, «Аякс» ўзига хос ўйин модели, ёшлар билан ишлаш дастурига эга. «Барселона», «Ювентус» ва «Атлетико»да ҳам шундай. «Реал»да эса йўқ. Чунки бу жамоа ўз ўйинчиларини тарбиялаш билан эмас, ноёб иқтидорларни жалб этиш билан шуғулланади. Яна шундай жамоалар борки, улар шаклланиш жараёнида. Яъни Гвардиоланинг «Манчестер Сити»си каби. Бундай жамоаларда тарих йўқ, аммо мураббий сингдира бошлаган услубни аста-секин ўзлаштирмоқда.

- Умуман, сиз ғалаба қозонишни ўргата оласизми? Ғолиблик менталитетини ривожлантиришничи?

- Ўйинчилар билан шундай машғулот ўтказиш керакки, улар натижа учун курашишга одатланишсин. Биз ҳар бир футболчига дастлабки кундан шуни сингдиришга интиламиз. Ҳозир «Атлетико» авлодлар алмашуви даврини бошидан ўтказмоқда. Хайриятки, таркибда бу жараённи босиб ўтган футболчилар бор: Хименес, Сауль, Коке, Томас... Энди улар бой тажрибаларини янги авлодга беришлари, ўзлари етакчи сифатида ўрнак кўрсатишлари талаб этилади.

- Қай тариқа?

- Машғулотлар орқали - бу муҳокамадан холи масала. Чунки айнан шу жараён футболчини мақсад сари интилишга ўргатади. Машқ пайти ўйинчи шунчаки, ўз вазифасини адо этиш эмас, техник, тактик ва жисмоний жиҳатдан етукликка интилишини намойиш этиши лозим. Мураббийнинг қаттиққўллиги шогирдларига малол келсада, вақт ўтиши билан маҳорат юксалишини таъминлайди.

- Айтингчи, сизни ким қаттиқ ранжитган?

- Карлос Билардо ўта талабчан мураббий эди ва нафас ростлашга ҳам имкон бермасди. Шундай мутахассислардан ибрат олган ҳолда, ўйинчилар ўртасида соғлом рақобат муҳитини яратишга интиляпман. Жамоада ички рақобат қанчалик кучайса, рақибни енгиш шунча осонлашади.

- Доимо ички туйғуни асосий қуролингиз сифатида эътироф этасиз. Нима учун?

- Ички сезиш қобилияти ўз-ўзидан туғилмайди. Уни кимгадир ўргатиш ёки ўрганиш ҳам мумкин эмас. Кузатувчанлик мураббийлик касбининг муҳим жиҳатларидан биридир. Мураббий аввало, кундалик иш жараёнида нима олиш кераклигини яхши билиши лозим.

- Энг машаққатли жараёнлардан бири шу, тўғрими?

- Бу менинг танловим. Илмга чанқоқ ёш футболчилар билан шуғулланишни хуш кўраман. Яна тил топишишга ҳуши йўқ исёнчи ўйинчиларни ҳам ёқтираман. Чунки уларга тўғри йўл кўрсатиш учун анчагина бош қотириш, изланиш талаб этилади. Футболчи майдонда ўзини қандай тутса, ҳаётда ҳам шундай. Иш жараёнида вояга етган йигитчанинг турмуш тарзи улғайганидан кейин ҳам ўзгармайди. Баъзан шогирдларим менга нафақат футбол, балки ҳаётдан сабоқ берганлигимни айтиб, миннатдорчилик билдиришади. Ўз касбига меҳр қўйиш, бор куч-маҳоратини сарфлаш ва ўзгаларни ҳурмат қилиш инсон сифатида шаклланишнинг асосий фазилатларидир.

- Эҳтиросларни жиловлай олиш хусусида кўп гапиргансиз. Ғалаба ёки мағлубият унга таъсир этадими?

- Замонавий футболда барча футболчилар бир хил шароитдалар. Месси ва Роналду бундан мустасно, албатта. Улардан кейинги ўринлар Неймар ва Азар каби ўйинчиларга тегишли. Ишончим комилки, мукаммалликка интилиш, керакли паллада муросага келиш, умумий ишнинг бир бўлаги бўлишга интилиш - муваффақиятга элтадиган йўл.

- Техник ва тактик маҳорат, жисмоний камолот ёнида эҳтироснинг аҳамияти қандай?

- Эҳтирос муҳимлик бобида бошқа жиҳатлардан кам эмас. Уни ўз измига бўйсундириш эса ғоят мушкул вазифа. Чунки барча футболчилар эътиборга муҳтож, ҳамма майдонга тушишни истайди, аксарият йигитларда худбинлик бор. Шундай шароитда мураббийдан жамоа олдига қўйилган вазифани шогирдлари ёрдамида бажариш учун уларни ранжитмаслик талаб этилади. Жамоани нима бирлаштиради? Ғалаба. Мағлубиятга учраган клуб вакиллари ҳеч қачон бирга овқатланишмайди.

- VAR хусусида нима дея оласиз?

- Бу тизим менга ёқди. Унга аста-секин кўникяпмиз. Лекин барчасини янада мукаммаллаштириш керак. Тез орада майдонда ишлайдиган ҳакамлар тизимга аралашмайдилар. Чунки касбдошлар ўртасида «Мен сенинг камчилигингни яшираман, ўз навбатида сен ҳам шундай қиласан» қабилида келишувлар юзага келиши мумкин. Бундай бўлмаслиги учун эса VARни фақат собиқ ҳакамларга қўйиб бериш керак. Айниқса, амалдаги бош ҳакамларни тизимдан йироқлаштириш шарт. VAR жамоаларга ёрдам беряптими? Ҳа, албатта. Авваллари «Реал» ёки «Барселона» майдонига келган жамоалар ўйинчилари жарима майдончаси ичида юз тубан йиқилиб ётишса ҳам ўйин тўхтатилмасди. Энди ҳакамлар буни текшириб кўриш ва айбдорни жазолашга мажбурлар.

- Годин ва Торресни кўп тилга оласиз. Лекин негадир Гризманн ҳақида фикр билдирмадингиз...

- Чунки Антуан спорт нуқтаи-назаридан ўта муҳим ўйинчи эди. У 5 йил ичида клуб тарихидаги энг яхши тўпурарлар бешлигига кўтарилди. Кетиши ҳақида гаплашиш учун ҳузуримга келганида, ҳаммасидан хабардор эдим. У менга ёқадиган, ёш ва маҳоратда тенги йўқ йигит. Мана шу меҳр-оқибатни ўзаро ҳурмат сақлаб қолади. Биламан, ҳамманинг ўзига яраша мақсади бор. Лекин мақсадлар айро тушса, дўстликка путур етади.

- «Атлетико»ни Годин, Хуан-фран, Фелипе Луис, Люка Эрнандес, Родри ва Гризманн тарк этишди. Шунда ҳам жамоада қолдингиз. Ҳозирги вазиятга қандай баҳо берасиз?

- Воқеликка холис ёндашайлик. Бу биз учун - янгиланиш даври. Кетганлар оддий ўйинчилар эмас, жамоа етакчилари эдилар. Энди уларсиз ўзимизни ўнглашимиз лозим. Бошқа гап йўқ. Балки қандайдир пасайиш кузатилар? Аммо ўз йўлимиздан қайтмаймиз. Кейинги мавсумда чемпионликка даъво қилиш ҳақида гапириш эса шунчаки, шошқалоқлик ҳисобланади.

- Иттифоқо сизга Аргентина ФАдан қўнғироқ қилиб, маҳаллий футболни қайта қуриш ҳақида маслаҳат сўрашса, нима дердингиз?

- Бу кенг кўламли мавзу. Фақат битта жиҳатга тўхталишим мумкин. Олимпия жамоасида иш бошлаган Даниэль Пассарелла бутун бир даврга асос солганди. Ўйлашимча, Лионель Скалони ёки бошқа бир мураббий шундай қилиши учун узоқни кўра олиш қобилиятига эга бўлиши лозим.

А.Аҳмедов тайёрлади.