Ўтган мавсум «Милан»да тўп сурган Патрик Кутроне Англиянинг «Вулверхэмптон» клуби аъзосига айланди. Яқинда у La Gazzetta dello Sport нашрига интервью берди.

- Ташрифдан дастлабки таассуротлар қандай?

- Мени ажойиб тарзда қабул қилишди. Мослашиб ҳам олдим, ўзимга уй топдим. Отелда яшаш ёқмаётганди. Ҳозир энг яқин дўстим Андреа меникида меҳмонда.

- Инглиз тилини ўрганиш ишлари қандай кетяпти?

- Ёмон эмас. Ҳар ҳолда, инглиз тилини нолдан ўрганмаяпман. Лекин барибир, ҳали кўп ўрганишим керак.

- «Вулверхэмптон» мураббийлар штаби ва етти нафар футболчи Португалиядан. Нуну билан қайси тилда гаплашяпсиз?

- Албатта, инглиз тилида.

- «Лестер»га қарши дастлабки учрашувингизда захирадан майдонга тушганингизда «Вулвз» фанатлари ўтирган трибуна сизни тик турган ҳолда олқишлар билан кутиб олди. Шундай бўлишини кутганмидингиз?

- Ажойиб бўлди. Улар мени ҳайрон қолдиришди. Ахир жамоага эндигина қўшилдим.

- Премьер-лига ҳақида нима дея оласиз?

- Бу ерда атмосфера фантастик. Маҳаллий футбол билан таниишиш қизиқ бўлди. Англия чемпионатда ўзгача нимадир бор деганлар хақ экан.

- Европа Лигасининг гуруҳ бос­қичига чиқиш учун «Торино»га қарши баҳс олиб боришинглар лозим.

- Осон бўлмаслиги аниқ. «Торино» кучли жамоа. Умуман олганда, бу икки клубнинг ўхшаш томнлари кўп: қайноқ мухлислар, характер.

- Сиз «Вулверхэмптон»да, Мойзе Кин «Эвертон»да. Италиялик ёш футболчилар ўйнаш учун кетишга мажбур бўлишмоқда.

- Ҳар доим шундай. Биздан кўра хорижлик футболчиларни маъқул кўришмоқда. 20 ёшли футболчи учун юртини тарк этиш оғир. Лекин шуни алоҳида айтмоқчиман - менга берган нарсалари учун «Милан»дан ҳамиша миннатдорман.

- Роберто Манчинининг айтишича, ёш футболчиларнинг мамлакатдан ташқарида ўйнаши унга ёқмас экан.

- У ҳақ. Лекин ўз меҳнатим билан мени эсдан чиқариб қўймасликлари учун ҳаракат қиламан.

- «Ювентус» ҳамон Италияда энг кучлими?

- Улар қаторасига саккизта скудеттони қўлга киритишди ва трансферлар орқали яна кучайишди. Уларнинг рақибларига осон бўлмаслиги аниқ.

- Англия футболида кўзга биринчи ташланадиган нарса нима?

- Ишга бўлган муносабат. Англияда барчаси профессионал даражада. Шунингдек, стадионлар ҳам гўзал. Мухлислар қайноқ, рақиблар жаҳон даражасида.

- Англияда нимага эришмоқчисиз?

- Ҳар қандай тажриба инсонни кучли қилади. Англияда ўзимни кўрсатиш имкониятидан фойдалана олмасам, катта хатога йўл қўйган бўламан. Олдин айтганимдек, бу ерда бор кучимни ишга соламан. Бунинг учун барча шароитлар бор. Ажойиб мураббий, натижага эришишни истаган жамоа. Энг яхшилардан бири бўлмоқчиман.

С.Раҳмонов тайёрлади.