Германия чемпионатига старт берилди. Албатта, кўпчилик фаворитлар ва еврокубоклар иштирокчиларига қизиқиш билдиради. Лекин Германия нимаси билан қизиқ? Бу ерда номи чиқмаган жамоалар ажойиб кароматлар кўрсатишади. Мисол учун - «Аугсбург».

«Аугсбург» ҳақида қисқа маълумот:

* Клуб 112 ёшда ва шу номдаги шаҳар шарафини ҳимоя қилади. Бирорта соврин ютмаган. Фақат ёшлар жамоаси чемпион бўлган.

* Ўтган мавсумда «Аугсбург» Бундеслигада қолиш учун кураш олиб борди. Аммо бирор марта хавфли зонага тушиб кетмади.

* Чемпионат давомида жамоа футболчилари энг кам дриблинг ва бурчак тўпларини амалга оширишди.

* Ўтган мавсумда ҳимояда муаммолар кўп бўлди. Бир ўйинчи жароҳат олди, яна бири мураббий билан тортишиб қолди, учинчиси эса формасини тиклай олмади. Натижада мураббийни алмаштиришди ва ҳаммаси ўрнига тушиб кетди.

Мураббий ҳақида кейин гаплашамиз. Умуман олганда у ажойиб персонаж. Аввало, футболчилар қизиқроқ.

- 22 ёшли чап қанот ҳимоячиси Мадс Педерсен узоқ вақт «Мини» деб ёзилган никнеймда юрган. 10 йил олдин клубга келганида жамоада беш нафар Мадс исмли йигитлар бўлган. Педерсен энг ёши эди. Шу боис ҳам лақаб ўйлаб топишга вақт сарфлашмаган. Лекин кейинчалик у Валентин номи туширилган футболкада ўйнаган. Ҳозир ҳам уни шундай аташади. Валентин - бобосининг исми. Айтганча, у ҳам футболчи бўлган. Айнан бобоси Мадсга футбол ўйнашни ўргатган.

- «Аугсбург»да Марио Гётце ва Сами Хедиранинг укаси ўйнайди. Эътиборли томони, Феликс Гётце ҳам Марио сингари «Боруссия»дан «Бавария»га ўтган. Тўғри, бу ўсмирлик пайтида юз берган. Феликс таянч ярим ҳимоясида ўйнайди.

Рани Хедира эса майдонда Сами билан бир хил позицияда тўп суради. Албатта, у акаси сингари катта муваффақиятга эришмаган. Бироқ онасининг орзусини амалга оширган - футболдан ташқари олий маълумот олган. Кичик Хедира фитнес ва спортда бизнес билан шуғулланиши мумкин.

- Марказий ҳужумчи Серхио Кордова Венесуэладан ташриф буюрган. Унинг айтишича, эътиқод туфайли Германиянинг совуқ иқлимига мослашиб кетган. У эндигина 22 ёшда. Аммо икки марта тарихга кирган. Биринчиси - Венесуэладаги энг ёш гол муаллифи. Шунингдек, ёшлар ўртасидаги жаҳон чемпионатида энг чиройли гол муаллифига айланган.

- «Аугсбург» сардори, марказий ярим ҳимоячи Даниэль Байер клубда 2010 йилдан буён тўп суради. У ҳозирда 35 ёшда. Бир пайтлари Дитер Айльтс Германия ёшлар терма жамоа­си ўйинларининг бирида йигитчани фантастик келажак кутиб турганини башорат қилганди. Аммо Байер «Вольфсбург» ва «Аугсбург»дан юқорига кўтарила олмади.

- Ҳужумчи Альфред Финнбогасонни кўпчилик Исландия терма жамоаси ўйинлари орқали билади. У болалигида Шотландияда яшаган ва «Хиберниан» мухлисига айланган. Шунинг­дек, Финнбогасон ҳақиқий полиглот. У бешта - исланд, немис, испан, голланд, инглиз тилларида гаплаша олади. Ўзининг айтишича, швед тилини ҳам биларкан.

- Ўнг қанот ҳимоячиси Симон Аста чемпионат тарихига кириб бўлган. Ваҳоланки, у эндигина 18 ёшда. Аста 21 асрда туғилиб, Бундеслигада ўйнаган биринчи футболчига айланган. У майдонга тушганида 17 ёшу 107 кунлик бўлган. Умуман олганда, беш нафар футболчи ундан ёшлигида майдонга тушган. Ҳозирча 2018 йилдаги тарихий ўйин Астанинг Бундеслигадаги ягона ўйини бўлиб турибди.

- Бразилиялик Каюби умуман ажойиб. У 10 йил олдин «Вольфсбург» сафида Германия чемпиони бўлган. «Шальке»га қарши ўйинда эса 8 дақиқа ичида захирадан майдонга тушиб, гол урган ва тактик ўзгаришлар туфайли захирага олинган. Гап шундаки, «Вольфсбург» футболчиси қизил карточка олган. Шунда Феликс Магат бразилиялик футболчини шу ондаёқ майдондан олган. Бу эса «бўрилар»га ёрдам бермаган. Яъни, жамоа ғалабани ушлаб қола олмаган. Сўнгги дақиқаларда «Шальке» Кевин Кураньининг аниқ зарбаси туфайли ҳисобни тенглаштирган.

- Ниҳоят, бош мураббий - Мартин Шмидт. Унинг ташқи қиёфаси рок-гуруҳ гитарачисиникига ўхшаб кетади. Футболчилик фаолияти қовушмаган. Швейцариянинг 2-лигасида фао­лият олиб борган. Мураббийликни 15 йил олдин бошлаган. Лекин 2015 йилга келибгина «Майнц»нинг асосий жамоасини қабул қилиб олган. Бир-икки йил «Вольфсбург»ни бошқарди. Айни пайт эса «Аугсбург» билан бирга.

Ҳаёти давомидаги касблари: текс­тиль компанияси ижрочи директори; автомеханик; пойгачи - кузовли машиналар билан Германия чемпионатида иштирок этган. Бундан ташқари, Шмидт чанғида ҳалокатга учраб, ўлим ёқасига келган. Унинг бўйнидаги иккита умуртқа поғонаси синган ва юролмай қолган. Кўриниб турибдики, бундай ўтмишга эга Шмидт учун ҳеч нима қўрқинчли эмас.

Эслатиб ўтамиз, «Аусбург» мавсумнинг биринчи ўйинини Дортмунд­нинг «Боруссия»сига қарши ўтказиб, йирик ҳисобда мағлубиятга учради.

У.Умаров тайёрлади.