Ёзги трансфер мавсумининг энг ажабтовур келишуви Норвегияда қайд этилди - Лионель Месси маҳаллий «Юнкерен» клуби билан шартнома имзолади. Келишув ҳақиқий, ҳужжатлар сохталикдан холи. Бироқ Месси... машҳур юлдуз, аргентиналик даҳо эмас, 16 ёшли норвегиялик ўсмир Даниэль Аре Кнутсен.

Норвегиянинг Verdens Gang газетасига ёш футболчи қуйидагича изоҳ берди: «Мен анчадан бери исм-шарифимни ўзгартириш ниятида эдим. Лионель Месси - менинг «кумир»им. Шу боис, унга ўхшашга интилдим. Бор гап шу».

Асосий муаммо керакли ҳужжатларга эга бўлиш жараёнида юз берди. Даниэль номини ўзгартириши учун солиқ муассасасига югурди. Норвегияда фуқароларни рўйхатдан ўтказиш шу ташкилот зиммасида. Икки ҳафтадан кейин рухсатни олиб, расман Мессига айланди.

Янги Мессининг сўзларига қараганда, исм-шарифининг ўзгартиришига шундай қилиш мумкинми ёки йўқми, деган савол ҳам туртки бўлган. Хуллас, Фёуске шаҳрининг «Спринт» клуби ёшлар жамоасида тўп сурган Кнутсен энди «Юнкерен» ёшлари шарафини ҳимоя қилади. Фақат Лионель Месси номи остида. Янги жамоа бош мураббийи Рунар Эриксеннинг айтишича, навбатдаги вазифа - Криштиану Роналдуни қидириб топиш: «Шуни аниқ биламанки, минтақавий лигада шундай исм-фамилияли футболчи тўп суради». Энди ёш футболчининг режалари билан танишинг: «Майдонда Месси услубида тўп суриш учун бор куч ва маҳоратимни ишга соламан. Ўртамизда қандайдир ўхшашликлар ҳам йўқ эмас. Тўғри, маҳорат бобида ундан анча ортда эканимни яхши биламан. Лекин тезлигим чакки эмас, тўпни Мессидек олиб юраман».

Шунингдек, қаҳрамонимиз бундан кейин унга қай тариқа мурожаат қилиш кераклигини эслатиб ўтишни ҳам унутмади: «Мени аввалдан биладиган танишларим ҳозир ҳам эски номим билан чақиришади. Янгилари эса Лео, деб атамоқдалар».

У чиндан ҳам иқтидорлими?

Агар янги Мессида аргентиналик Леонинг тезлиги ва маҳоратидан озгинаси бўлганида ҳам, «Юнкерен» фантастик келишувни амалга оширган бўларди. Бироқ бунга етарли шубҳа бор. Даниэль Кнутсен ўз номини ўзгартиришидан аввал каттароқ ёшдаги жамоаларда ўйнаган эмас. Ваҳоланки, ноёб иқтидор соҳиблари, албатта ўзларидан каттароқ ёшдаги футболчилар билан тенгма-тенг тўп суришган. 16 ёшли Кнутсен фақат ўз тенгдошлари билан ўйнаган, «Юнкерен»да ҳам 16 ёшлилар сафидан жой олди. Мураббий эса унинг тез орада етакчилар қаторидан жой олишига эҳтиёткорлик билан фикр билдирди. Ваҳоланки, гап «Волеренга» ўринбосарларидан қуйида иштирок этадиган жамоа ҳақида кетмоқда. Умуман, ҳикоямизнинг футболга оид жиҳати мақтайдиган даражада эмас.

Аввал ҳам шундай воқеалар бўлганми?

Ҳаваскор мақомида бўлсада, Месси шарафига унинг номини олиш - илк бора юз берган воқеа. Лекин фарзандларига Лео номини берган ота-оналар жуда кўп. Жумладан, Россия­да ҳам. 2016 йилда липецклик жуфт­лик зурёдини бир йўла Лионель-Месси деб атади. 3 ёшли Лионель-Месси Николаевич ҳозирданоқ футбол ўйнашни ўрганмоқда.

2015 йилда «Барселона»нинг барча совринларни қўлга киритганидан ҳайратга тушган англияликлар орасида 4 нафар Месси пайдо бўлди. АҚШда 2 йил ичида 15 нафар чақалоқ шу номга эга бўлди. Бу борада Аргентинага тенглаша оладиган юрт йўқ, албатта. Даҳонинг жонажон шаҳри Росариода унинг фамилияси кенг тарқалган. Яъни, Месси исмга айланган. Улар шунчалик кўпайиб кетдики, маъмурлар Месси исмини тақиқлаб қўйишди. Фақат Лео исмига монеълик йўқ.

Тўғри, бу ҳолларда исмлар ота-оналар томонидан танланган, чақалоқлар шу ғайритабиий номга кўниб яшашга мажбурлар. Фақат мана шу ягона тафовут бу жарангдор ном соҳибларини қаҳрамонимиздан ажратиб туради: Даниэль Аре Кнутсен даҳонинг исм-шарифини ўз ихтиёри билан, мустақил равишда танлади.