«Ливерпуль» ҳимоячиси Виржиль ван Дейк энг яхши футболчига аталган совринни УЕФА президенти Александер Чеферин қўлидан қабул қилиб олгач, ҳайъат таркибига кирган журналистлар саволларига жавоб берди. Янги лауреат жумладан, футбол ўз ҳаётида иккинчи ўринда туришини алоҳида таъкидлади. Оддий айтганда, ван Дейк учун асосийси - оила!
— Майдонда ҳамиша ўта хотиржам ва ўзи ишонган футболчидек таассурот қолдирасиз. Ушбу сифатларни қандай шакллантиргансиз? Дейлик, ҳавас уйғотувчи совуққонликни қаердан оласиз?
— Бу борада аниқ гапиришим қийин. Эсимни танибманки, табиатан шундайман. Йиллар ўтиши билан эса ўзимни қаерда қандай тутишни ҳам ўргандим. Бинобарин, қачон хотиржамликни сақлаб қолиш ва қайси паллада бошқачароқ йўл тутиш кераклигини билиш жуда муҳим.
— Сизни истак-хоҳиши ва мақсади улкан футболчи ўрнида кўришади. Чунки ҳар доим янги марраларни забт этишни кўзлайсиз. Хўш, навбатдаги мақсадингиз нима?
— Аввало, айтишим керак, ўтган мавсум биз учун ғаройиб бўлди. Тўғри, ички чемпионатда «Манчестер Сити»дан бироз ортда қолдик. Янги мақсадга келсак, олдинда турнирлар кўп ва ҳозир улардан бирини ажратиб кўрсатишим ножоиз. Мусобақаларга яраша совринлар ҳам кўп. Чемпионлар Лигаси, Англия Премьер-лигаси, миллий кубоклар... Иштиёқ ҳам етарли. Лекин фақат битта мавсумни назарда тутяпман. Яъни ҳозирдан узоқроққа нигоҳ ташлашни истамайман.
— Футбол асоси — бу гол. Муҳими, ҳимояда тўп сурсангизда, гол уришни ҳам уддалайсиз. Лекин рақиб дарвозасини ишғол этишдан кўра, бошқаларнинг гол уришларига тўсқинлик қилишни кўпроқ ёқтирасиз.
— Бу ҳам болалигимга тақалади - ҳамиша ҳимояланишдан ўзгача завқланганман. Ажойиб ва таниқли ҳужумчилар мен туфайли гол уролмасалар, чиндан ҳам, ўйиндан қониқиш ҳиссини туяман.
— Мана, Фабио Каннаваро, Маттиас Заммер ва Франц Беккенбауэрдан кейин мавсумнинг энг яхши футболчиси мақомини олган 4-ҳимоячига айландингиз. Сизнингча, амплуадошларингизга нега шунчалик кам эътибор қаратишади?
- Биласизми, барчаси одамлар - омма фикрига боғлиқ. Яхшики, охирги 2 йилдан буён ҳимоячиларга муносабат анча яхшиланди. Ҳар ҳолда, амплуадошларим ҳам эътирофга эриша бошлашди.
— Фаолиятингизнинг бошланғич қисмида жиддий хасталикка чалинган ва ҳаётда футболдан муҳимроқ нарсалар борлигини ҳам теран англаган экансиз. Бу ҳолат футболчи сифатида ўсишингизга нечоғли ёрдам берди?
— Ижобий таъсири жуда катта. Шахсан мен учун энг асосийси - оила. Ҳаётий қоидамнинг асоси шу. Футбол эса иккинчи масала. Қисқаси, аввал оила, кейин футбол.
— Айтингчи, бир лаҳза бўлса ҳам, «Ливерпул»дан кетиш ҳақида ўйладингизми?
- Шундай бетакрор мавсумдан кейин-а? Асло. Олдимизда муҳим давр турибди. Мана, Европа суперкубогини ютдик, буёғига ҳам вазифалар етарли.
— Кўринишидан, «Ливерпуль» Чемпионлар Лигасида нисбатан енгилроқ гуруҳга тушди. Қуръа натижалари ёқдими?
— Биз жой олган гуруҳ оддий эмас, барибир. Қолаверса, Чемпионлар Лигасидек катта турнирда ҳар нарса бўлиши мумкин.
— Умуман, «Ливерпуль» сизга нима берди, бу клубда ўтган вақтдан нима олдингиз?
— Улкан тажриба. Ахир машғулотларда ҳам энг кучли ҳужумчиларга қарши ўйнайман.
— Шунингдек, устозингиз Юрген Клоппдан ҳам кўп нарса ўрганганингиз тайин...
— У «Ливерпуль» бош мураббийи сифатида фаолиятимда муҳим ўрин тутади. Яна Голландия терма жамоасини бошқараётган Роналд Куманни ҳам алоҳида эътироф этишим керак.
— Залда икки буюк футболчи - Лионель Месси ҳамда Криштиану Роналду олдида ўтирдингиз ва уларни ортда қолдирдингиз. Тарихнинг бир бўлагига айланганингизни ҳис қиляпсизми?
— Ҳар иккисига катта ҳурмат билан қарайман. Табиийки, шундай нуфузли соврин соҳиблари қаторига қўшилганимдан бағоят хурсандман. Ғолиб бўлиш ёқимли, албатта.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20