ЮЛДУЗЛАР БИЛАН СУРАТГА ТУШИБ, КЕЙИН УЛАРГА ЭРГАШГАН ФУТБОЛЧИЛАР
Яқин ўтмишдан ёрқин суратлар тўплами. Бугунги кун футболи юлдузлари табиийки, вақтида қайсидир таниқли ўйинчиларга ҳавас қилишган.
Айримларига болалик йиллари ўз даврининг чин юлдузлари билан бирга суратга тушиш ҳам насиб этган. Қуйидаги фотожамланмани бунга ашёвий далил сифатида қабул қилиш мумкин.
2007 йил. «Аякс». Луис Суарес 20 ёшда. Маттейс де Лигт эса атиги 8 ёшли болакай... Голландиялик ҳимоячи жорий мавсумдан эътиборан уругвайлик билан битта жамоада ўйнаши мумкин эди, бироқ у якунда «Ювентус»ни танлади.
Каллум Хадсон-Одои бундан 5 йилча олдин ҳам оддий болбой (тўп ташлаб берувчи) эди. Қарангки, камерунлик Самуэль Это~О «Манчестер Юнайтед» билан баҳсда «хет-трик»ни расмийлаштиргач, айнан у томон югурган экан. Хадсон-Одои энди ўз авлодининг энг иқтидорли вакилларидан бири. Тўғри, у ҳозирда жароҳат туфайли четда.
2012 йил. Мэйсон Маунт икки юлдуз - Жон Терри ва Эшли Коул ёнида (тепадаги суратга қаранг). Дарвоқе, у 2018 йилга келиб, «Дерби»да Коул билан бирга ўйнади. Энди эса «Челси»да дебют қилиб, илк голини нишонлади.
Яна Мэйсон Маунт. Бунисида Давид Луиз билан бирга. Фақат шуниси борки, бразилиялик билан бирга тўп суришга улгурмади. Яъни йигитча «Челси» асосий таркибига қўшилганида, Луиз «Арсенал»га кетиб қолди...
Килиан Мбаппе болалигида Криштиану Роналду ва Тьерри Анрига кумир сифатида қараганини кўп бора таъкидлайди. У бу борада ҳам омадли: жуда ёшлигидаёқ ҳар икки юлдуз билан суратга тушган. Айтганча, бугун Роналду ҳам, Анри ҳам Килианга жуда юқори баҳо беришмоқда.
Бразилияликлар. Неймар ва Роналдо ўртасида алоҳида муносабат шаклланган. Улар бир-бирларини қаттиқ ҳурмат қилишади. «Сўйлоқ» бугун ўз ҳамюртини мақташ билан овора, Неймар эса имкон туғилиши билан унинг ҳайратомуз ўйинларини эсга олади. Лекин ушбу сурат олинган вақтда Роналдо болакай мегаиқтидор эканлигини ўйлаб ҳам кўрмаган бўлса керак.
Райан Брюстер ҳозирча кўпчиликка нотаниш. Лекин у бир неча йилки, «Ливерпуль» академиясининг бош истеъдоди сифатида таърифланмоқда. Брюстернинг ҳали ўзини кўрсатмаганида 2та сабаб бор - оғир жароҳат (тўлиқ бир йил даволанди) ва ўта кескин рақобат. Муҳими, клубда ҳамма, жумладан, Юрген Клопп ҳам унинг ноёб иқтидорга эга эканлигини таъкидлашдан чарчамаяпти. Яна «Ливерпуль» афсонаси Стивен Жеррарднинг ҳам Райандан умиди катта.
Трент Александер-Арнольд эса Брюстердан фарқли ўлароқ, барчага нималарга қодирлигини исботлаб бўлди. Хусусан, вақтида Арнольд қўлини тутиб, майдонга тушган Жейми Каррагер унинг тимсолида Англия футболи «Янги Бекхэм»га эга бўлганини айтмоқда.
Дэвид Бекхэмнинг ўзига тегишли факт ҳақида. Бекс 2005 йили Лондондаги шахсий академиясига бир гуруҳ болаларни таклиф этган ва улар орасида Гарри Кейн ҳам бор эди. Ўшанда Дэвид ёнида Англия миллий жамоасининг бўлажак сардори турганини билганмикин? Албатта, йўқ. Бекхэмнинг ўнг томонидаги қиз - бу Кейннинг бўлажак турмуш ўртоғи Кейт Гудлэнд. Гарри ва Кейт мактабда бирга ўқишган ва 7 йилдан кейин Бекхэм академиясига ташриф баҳона учраша бошлашган. Ҳозир ушбу жуфтликда 2 нафар фарзанди бор.
Криштиану Роналду «МЮ»даги илк мавсуми (2003 йили)да ёшлар машғулотини кузатиб, болалар билан гаплашган ва якунда уларга тўп билан 1-2та ўзига хос «трюк» намойиш этганди. Португалиялик футболчи негадир боши тақир болакай - Жесси Лингардга алоҳида эътибор қаратганди.
«Атлетико» сардори - Коке болаликдаги кумири Фернандо Торрес билан. Кейинчалик ҳужумчи Мадридга қайтганида, улар бир неча мавсум елкама-елка тўп суришди.
Абдуллохон ИСРОИЛХОНОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20