«Ливерпуль» ҳимоячиси Виржил ван Дейк ўтган мавсумда Англия Премьер-лигасининг энг яхши футболчиси деб топилди. Ваҳоланки, унинг жамоаси якунда чемпион бўла олмаганди. Голландиялик футболчи France Football нашрига берган интервьюсида «Ўтган мавсум ўхшамаган бўлса, бу мавсум чемпион бўламиз», деди.

- «Ливерпуль» мавсумолди йиғинини Бостонда ўтказди. У ерда Том Брэди (америкача футбол ўйинчиси, «Нью-Ингленд Пэтриотс» клуби аъзоси)ни кўрдингизми?

- (Кулади.) Йўқ. Лекин ҳақиқатан ҳам у менга жуда ёқади. Ваҳоланки, америкача футболнинг ашаддий ишқибози эмасман. Брэди нафақат мен учун, балки барча спортчилар учун ҳақиқий профессионализмда ўрнак бўладиган инсон.

- Бир сафар Брэдидан ташқари Леброн Жеймс (баскетболчи, «Лос-Анжелес Лейкерс» клуби аъзоси)нинг ҳам ишқибози эканлигингизни айтгансиз. Нима учун уларни ёқтириб қолгансиз?

- Иккиси ҳам 15 йилдан ортиқ вақт­дан буён юқори савиядаги ўйинларни намойиш қилиб келишмоқда. Бу катта масъулият, куч талаб қилади. Лекин улар осонлик билан бунинг уддасидан чиқишмоқда. Одамлар бунинг қанчалик қийин эканлигини ҳар доим ҳам ҳис қилишмайди.

- Лекин улар футболчи эмаслар-ку...

- Фарқи нима? Биз тўпни оёқда ўйнаймиз, улар қўлда... Стресс, вазиятлар ўхшаш. Биз ва улар ҳамиша босим остидамиз. Шундай экан, бундай спортчиларни кузатиб бориш фойдали. Улардан кўп нарсани ўрганиш мумкин.

- Сиз доимий стресс ва босимга қарши қандай курашасиз?

- Ошириб юбормасликка ҳаракат қиламан. Футбол - ҳаётимнинг муҳим бир бўлаги. Лекин энг асосийси эмас. Ўйиним қовушмаса, кайфиятим тушиб кетади. Хайриятки, ҳаётда оила аъзоларим бор. Улар мени қутқаришади. Мияларимни жойига келтирадилар, тинчлантиришади.

- Ўтган мавсумнинг охири даҳшатли бўлди. Чемпион бўлишинглар учун очко етишмади. Аммо Чемпионлар Лигасида зафар қучдинглар. «Том»ингиз кетиб қолмадими?

- Ҳозир сизга ҳаммасини айтиб бераман. Ярим финалда, Барселонада 0:3 ҳисобида мағлуб бўлганимиздан кейин барчамизнинг руҳимиз тушиб кетганди. Ҳеч нимани тушуна олмай қолгандик. Тўғри, мағлуб бўлдик. Лекин бу даражада йирик ҳисобда енгилишга ҳақли эмасдик. Чунки яхши ўйнагандик. Буни ҳамма кўрганди. Кейинги босқичга чиқишимизга мўъжиза ёрдам беришини тушуниб тургандик. Муҳими, тезкор гол уришимиз керак эди. Шундагина бир нимага умид қилсак бўларди. Жавоб ўйинидан олдинги дам олиш кунида сафарда «Ньюкасл»ни зўрға 3:2 ҳисобида мағлуб этдик. Ғалаба тўпини ҳам ўйин охирларида киритгандик (Ориги, 86-дақиқа). Якшанба куни бутун жамоа бўлиб «Манчестер Сити» «Лестер»ни (1:0) Винсент Компанининг ажойиб голи эвазига мағлуб этганини томоша қилдик. Бу ҳам руҳий таъсир ўтказди. «Сити»нинг биринчи ўринни бериб қўймаслиги шунда ҳал бўлганди. Икки кундан сўнг «Барселона»га қарши ўйиндан сўнг мавсум муддатидан олдин тугаши мумкин эди. Фақат умидимиз мўъжизадан эди. Лекин стадионга келганимизда фанатларнинг қўллаб-қувватлашларини кўриб ўзимизга бўлган ишонч ортди. Худди бошимизга бир нарса билан ургандек бўлди. Натижада мўъжиза юз берди. Лекин чемпионатда ҳам ҳаммаси ҳал бўлмаганди. Шу боис ҳам охиригача курашда давом этдик. Ҳа, якун даҳшатли бўлди. Ачинарлиси, чемпион бўлишимизга озгина етишмади.

- Янги мавсумда ҳаммасини хаёлдан чиқариб ташлаш ва барчасини нолдан бошлаш қийин бўлдими?

- Тўғрисини айтсам, менга қийин бўлмади. ЕЧЛдаги ғалаба «Ливерпуль» фанатлари учун байрам. Бу қайсидир маънода руҳий допингга айланди. Шу билан бирга биз ҳам руҳан кучайдик. Ҳамма иккинчи уринишда чемпионатда ғолиб чиқишни мақсад қилган. Ўтган мавсумда ўхшамаган бўлса, бу сафар чемпион бўламиз. Умуман олганда барча турнирларда: Англия кубоги, Лига кубоги, клублар ўртасидаги жаҳон чемпионатида ғолиб чиқишни истаймиз.

- Энг муҳими қайси бири?

- Энг муҳими йўқ, мақсадимиз - ҳар бир турнирда зафар қучиш. Ваҳоланки, битта кубокни қўлга киритиш қанчалик қийинлигини тушуниб турибмиз. Бунда турли факторлар роль ўйнайди. Кичик инқирозсиз бутун мавсумни юқори савияда ўтказиш осон эмас. Боз устига, ҳамма «қуёнлар»ни қуваётганда. Барча жамоадошларимдан сўрашингиз мумкин, уларнинг ҳар бири мен каби максималист.

- «Ливерпуль» 1990 йилдан буён чемпион бўлмади. Ҳамма бу қачон рўй беришини кутмоқда. Ушбу масалада босимни ҳис қилмаяпсизларми?

- Йўқ, мен бошқа олам одамиман. Биричидан, «Ливерпул»га келганимга эндигина бир ярим йил бўлди. Клуб тарихини, ливерпуллик мухлислар истагини биламан. Лекин сиз айтганчалик босимни ҳис қилмаяпман.

- Бундай омадсизликлар қаторида 2018 йилги ЕЧЛ финалида «Реал»га учралган мағлубиятни ҳам эслашимиз мумкин.

- Муваффақиятсизликлар фақат кучайтиради. Албатта, шунча нарсани миядан чиқариб ташлаш ҳам бўлмайди. Хулоса битта: жорий мавсумда янада кўпроқ югуришимиз, кўпроқ гол уришимиз, камроқ ўтказиб юборишимиз, яъни ҳар жабҳада ўсишимиз талаб этилади.

- Ёзда Диснейлендга бордингизми? Сиз унинг катта мухлисисиз...

- Бу сафар бора олмадим. Диснейлендни қанчалик ёқтиришимни тасаввур ҳам қила олмайсиз. Имкон туғилиши билан ўша ерга ошиқаман. Нима деб ўйлайсиз, балки уларнинг реклама агенти бўлсаммикан? Умуман олганда, бу борада ёлғиз эмасман (кулади).

- Сизни ЕЧЛ финали ва АПЛнинг энг яхши ўйинчиси деб топишди. Энг яхши бўлиш қандай экан?

- Бу катта шараф ва бахт. Лекин бошим айланиб кетмади. Тўғри, энг яхши деб тан олишди. Лекин ҳаёт шу билан тўхтаб қолмайди. Яна меҳнат қилиб, жамоа учун ишлаш керак.

- «Олтин тўп»ни қўлга киритиш борасида қандай фикрдасиз? Хаёлингизга келдими?

- Тўғрисини айтсам, ўйлаб кўрмадим. Сўров лотерея деган гап. Агар одамларда сиз ҳақингизда қандайдир фикр пайдо бўлса, уни ўзгартиришга қодир эмассиз. Албатта, номзодлар орасида бўлиш ёқимли. Лекин бу туфайли осмонда юриш ярамайди. Ердаги ишларни қилиш керак (кулади). Қолаверса, ўтган йилдагидан яхшироқ қилиш лозим.

- Бажариш қийин дейиш осон...

- Лекин ҳар сафар янги мавсумни шундай кайфият билан бошлаш керак. Мен шундай деб ўйлайман. «Олтин тўп» номзодлари орасида борлигим қайсидир маънода ёрдам беради. Бу қўшимча мотивация.

- Роналду ёки Мессидан узоқ вақтдан буён энг яхши бўлишаётгани сирини сўрамадингизми?

- Йўқ, бу мавзуда гаплашмадик. Аммо уларнинг бу борада фикрларини эшитиш яхши бўларди... Ҳозир фаолиятимнинг энг яхши дамларини ўтказяпман. Ажойиб давр. Лекин чўққингиз қаерда эканлигини ҳеч қачон айтмаслигингиз керак. Муҳими, чўққига кўтарилишда давом этиш лозим.

- Ҳимоячиларни ҳар доим ҳам энг яхши деб тан олишмайди. Нима учун?

- Буни билмайман. Лекин ҳақиқатан ҳам ҳимоячиларни кам ҳолларда энг яхши деб топишади.

- Боз устига, сиздек кам гол урадиганларни...

- (Кулади.) Бу билан кўпроқ гол уришим керак, демоқчимисиз? Мухлисларга кўпроқ гол урадиганлар ёқади, гол уришга халақит қиладиганлар эмас. Лекин гол уришга халақит бериб, гол ургандан кам роҳатланмайсиз. Аммо бу ҳам жамоавий ҳаракат. Жамоадошларимсиз нима қилган бўлардим? Ахир бутун жамоа бўлиб ҳимояланамиз.

- «Тоттенхэм»га қарши уй учрашувини (2:1, 2019 йил 31 март) эслайсизми? Сиссокога гол уришга халақит бергандингиз.

- Албатта. Рақибнинг гол уришига йўл қўймаслик ҳам ажойиб. Бу ўйин охирида рўй берганди. Ўшанда ҳисоб 1:1 бўлиб турганди. Сиссоко ва Сон бир ўзимга қарши олдинга интилишди. Агар гол урилганида ўйин қандай тугарди, билмайман. Сиссоко адашди. Биз эса ўйин охирида тўп киритдик.

- Сиз жаҳондаги энг қиммат ҳимоячисиз. Бу ҳам қўшимча масъулият юклайдими?

- Бу ҳақда ўйламайман. Ҳар қандай ҳолатда ҳам «Ливерпул»дек буюк клуб шарафини ҳимоя қиляпсизми, хато қилишга ҳаққингиз йўқ. Ўн миллион турасизми, етмиш миллионми, бунинг фарқи йўқ.

- Сиз ўзига ўта ишонган эркакдек тасаввур уйғотяпсиз.

- Аслида ҳам шундай. Кайфият яхши бўлса, стрессни енгиш осонроқ бўлади.

- Стрессга қарши курашишни қаердан ўзлаштиргансиз?

- Ҳаёт ўргатган. Ота бўлганим ҳам катта ёрдам берган. Хуллас, ҳаётга фалсафавий назар билан қарашга ўргандим.

- Голландияда ҳамма ҳужумкор футболга берилган. Лекин сиз ҳимоячи бўлгансиз...

- Фаолиятим бошида осон кечмаган. Голландияда бошлаганимда ҳозиргидек ўйнамасдим. «Виллем-2»да асосан захирада ўтирардим ёки ўнг қанот ҳимоясида майдонга туширишарди. Оптимал позициямни топишим учун маълум вақт кетган. Кейинчалик «Гронинген»га ўтдим. У ерда анча ўсдим, ўйинни ўқишни, позиция танлашни ўргандим. Бир сўз билан айтганда, марказий ҳимоячи учун керак бўлган жиҳатларни ўзлаштирдим. «Селтик»да эса жараён давом этди.

- Агар сизни Маттейс де Лигт билан солиштирадиган бўлсак, «жараён» анча чўзилиб кетган. У 19 ёшида «Аякс» сардори бўлган...

- Тортишиб ҳам ўтирмайман. Маттейс футболчи бўлиб етишган ёшда мен «Гронинген» ўринбосарлари сафида ўйнардим. Ажойиб футболчи. Менинг тақдирим эса бошқа. Кўп тер тўкишимга тўғри келган. Ҳаттоки, «Селтик»да (2013-2015) ўйнаганимда ҳам Премьер-лига жамоалари менга унчалик эътибор қаратишмаган. Шотландия лигасидан футболчи таклиф қилишга ҳеч ким таваккал қилмаган. Рональд Куман эса мени «Саутгемптон»га (2015) таклиф қилган.

- «Ливерпул»да ҳам қайсидир жиҳатларингиз ўсдими?

- Юқори прессингга ўргандим. Тўпни яхшироқ назорат қилишни, ўйинни ўқишни кучайтирдим.

- «Ливерпуль» жорий мавсумда қандай кўринишга эга бўлади?

- Кўп прессинг қиладиган, рақиблар ҳаётини дўзахга айлантирадиган, ёрқин ўйин намойиш қиладиган жамоа бўлади.

- Сиздан нима кутамиз?

- Худди ўтган мавсумдаги каби футболни. Энг асосий вазифамиз - дарвозамиз дахлсизлигини сақлаб қолиш.

Ж.БОБОХОНОВ тайёрлади