У Чемпионлар Лигасидаги дебютида «хет-трик» қайд этиб, ҳафта ўйинчисига айланди, унинг отаси «МЮ» сафида ўйнаган, шунингдек, қаҳрамонимиз бир учрашувда 9та гол ургани билан танилган. Soccer.ru келажаги порлоқ футболчи - Эрлинг Халанд ҳақида ҳикоя қилади.

ФУТБОЛЧИнинг ЎҒЛИ

Эрлинг футболчи оиласида туғилган. Отаси Альфа-Инге Халандни АПЛнинг катта ёшли ихлосмандлари яхши эслашади, зеро норвегиялик фаолиятининг 10 йилини Англияда ўтказган, туманли ўлкага афсонавий Брайан Клафнинг таклифига биноан кўчиб ўтганди.

Тўғри, Халанднинг Норвегиядан кетиши бироз чўзилиб кетди, сўнгра ҳимоячи «Ноттингем»да машҳур мураббий билан шуғулланди ва тўрт йилни «ўрмончилар» таркибида ўтказди. Кейинчалик эса Клафнинг «Лидс Юнайтед»и­га ўтди. Альф-Ингенинг Англиядаги охирги клуби «Манчестер Сити» бўлган, бундан ташқари, у Норвегия термаси либосида 34та ўйинда майдонга тушган, ЖЧ-1994да қатнашган.

ОЛЕ-ГУННАР СУЛЬШЕР — ФУТБОЛдаги ОТА

Айнан «Манчестер Юнайтед»нинг ҳозирги устози биринчилардан бўлиб Халандга ишонч билдириб, унга катта футболга йўл очганди. Эрлинг Сульшер бошчилигидаги «Мольде» клубига камтарона «Брюне» жамоасидан ўтганида анча ёш эди - ҳали 17га ҳам тўлмаганди. Аммо Оле-Гуннар навқирон амплуадошининг кўзларига тикилгач, бир сонияга ҳам шубҳаланмади. «Мен қотилни топдим!» - чақалоқ юзли Сульшер шундай дея кичик Халандни муҳим ўйинларда майдонга туширди.

Йигитча ўзини йўқотиб қўймади: Оле-Гуннар қўл остида «Мольде» сафида 20та гол уриб, 7та самарали узатма муаллифига айланди. Аммо ўтган йилнинг қишида мураббий ва футболчининг йўллари айро тушди: Сульшер «Манчестер Юнайтед» устозига айланди, Халанд эса 5 миллион евро эвазига «Зальцбург» аъзосига айланди. «МЮ» Эрлингни йил бошида жалб этишга уринмади, ваҳоланки, айни пайт Сульшерга айнан шундай форвард етишмаётгандек, гўё.

БАСАВЛАТ, АММО ЧАҚҚОН

Халанднинг бўйи 194 сантиметр, лекин шунга қарамай, у жуда эпчил, тезкор. Яхшигина тезликка эга, яъни «Зальцбург»га хос ҳужумкор ўйинга мос тушади. Умуман, позицион ҳужумларда ҳам дуруст ҳаракатланади, айниқса, рақиб дарвозаси ортида эканлигида бақувватлиги асқотади, дастлабки юқори тезланиш ва гол сезиш қобилияти эса жарима майдончасида унга устунлик беради.

КИЧИК МУНДИАЛДАГИ БИР ЎЙИНДА 9та (!) ГОЛ

Норвегия термаси жорий йилнинг май-июнь ойларида Польшада ўтказилган ёшлар ўртасидаги жаҳон чемпионатида муваффақиятсиз қатнашди: Уругвай, Янги Зеландия ҳамда Гондурас билан бир гуруҳдан жой олган жамоа учинчи ўринни эгаллади.

Норвегияликлар Жанубий Америка ва Океания вакилларига ютқазишди, гуруҳ босқичининг сўнгги турида эса Гондурасни 12:0 ҳисобида мағлубиятга учратишди. Голларнинг 9таси Эрлинг Халанд ҳисобига ёзилди. Бу эса турнирнинг бош тўпурари мақомини қўлга киритиши учун етарли бўлди. У мерганлик курашидаги асосий рақобатчиларини 5та голга ортда қолдирди.

«БАРСЕЛОНА» КУЗАТМОҚДА. «МЮ» ПОЙГАДА...

Эрлинг Халандга кўз тиккан клублар талайгина. Ҳужумчининг шундай тез ривожланаётгани сабабли уни қўлга киритишга даъвогарлар сони тобора ортмоқда. «Манчестер Юнайтед»нинг асосий «овчилар»дан бирига айланиши турган гап, Оле-Гуннар Сульшер эса бу борада «қизил иблислар»нинг катта «кўзири» ҳисобланади.

Боз устига, норвегияликларни туманли ўлкага ҳар доим нимадир жалб этиб туради, зеро иқлим деярли яқин, инглиз тилини биладиганлар ҳам бисёр. Аммо Халанднинг олдида танлаш имконияти бўлади, жанубдан келадиган таклифларга «йўқ!» деб жавоб бериш осон эмас.

«Барселона»нинг норвегиялик ҳужумчига кўз тикканига анча бўлди. Каталониянинг спортга ихтисослашган газеталари жаҳон чемпионатида Норвегия ёшлар термаси ўйинини кузатаётган скаутлар ҳақида ёзишди. Mundo Deportivo берган хабарларга ишонадиган бўлсак, «Барса» вакиллари мунтазам равишда «Зальцбург»­нинг жорий мавсумдаги ўйинларига ташриф буюришмоқда.

Умуман, ҳаммаси мантиқан тўғри, ахир «кўк-анорранглилар» ҳужум марказида Луис Суаресга муносиб ўринбосар қидиришмоқда. Эътибор фақат Эрлингнинг ўзига қаратилмаслиги турган гап, аммо ушбу футболчини ўз сафида кўришни хоҳлаётганлар сони тобора ортмоқда. Унинг ўйини билан боғлиқ ҳисоботлар жуда қизиқарли, сентябрь ўрталарига келиб Халанднинг ҳисобида барча турнирларда 17та гол ва 5та «ассист» бор.

ЕЧЛдаги ДЕБЮТда «ХЕТ-ТРИК»

«Генк»ка қарши кечган баҳсга қадар Халанд Чемпионлар Лигасида ўйнамаганди, Европа Лигасининг асосий тўрида эса майдонда бор-йўғи тўрт дақиқа тўп сурганди. Шундай экан, бельгияликларга қарши кечган ўйинни тўлақонли дебют дейиш мумкин. Ҳаммаси ўхшади! Дарвоқе, Халанд Чемпионлар Лигасида «хет-трик» қайд этган учинчи энг ёш футболчи бўлди.

Бу борада уни 19 ёшига тўлмасидан аввал айни натижа қайд этган Рауль ва Руни ортда қолдиришмоқда. Эрлингни ЕЧЛда ҳафта ўйинчиси деб топишди, норвегиялик вундеркинд Марк-Андре тер Штеген, Анхель Ди Мария ва учта гол урган яна бир ўйинчи Мислав Оршичдан устун келди.

НАРХИ КУН ЭМАС, СОАТ САЙИН ОШМОҚДА

Йил бошида «Зальцбург» уни «Мольде»дан 5 миллион еврога сотиб олганди, ҳозир эса «Трансфермаркт» Халандни 12 миллионга баҳоламоқда, ваҳоланки, бундай нархга австрияликлар келажаги порлоқ ҳужумчининг чап оёғини ҳам сотмасликлари аниқ. Ёш футболчиларнинг нархига уларнинг ўсиш жараёнига қўйилган баҳо ҳам таъсир кўрсатади, Эрлингнинг келажаги эса мўъжизавий ва голларга бой ўтиши кутилмоқда.

Айнан «Генк» дарвозасига йўлланган «хет-трик» орқали Халанд ўз баҳосини икки карра оширган бўлса, ажабмас. Нарх айнан қайси суммада тўхташини айтиш қийин, лекин «Зальцбург» Эрлинг орқали ўз ғазнасини 50 миллион еврогача бойитиб олишни мўлжаллашини тахмин қилиш мумкин.