«Брюгге» ҳужумчиси ўз сўзи устидан чиқиб, «Реал» дарвозасига 1та эмас, 2та гол урди. Нигериялик Эммануэль Бонавентуре Деннис энди мағрур ҳолда, «Сантьяго Бернабеу» нимани қўмсаётгани ҳақида баралла гапирмоқда. Ҳа, «Қироллик клуби» ҳисоб 0:2га етгач, фаолликни кескин ошириб, якунда мағлубиятдан қутулиб қолди, барибир. Аммо камтарин «Брюгге» билан баҳсда қайд этилган дуранг «Сантьяго Бернабеу»ни қувонтирадиган натижа эмас асло...

Мадридликлар биринчи бўлимнинг ўзида Эммануэль Бонавентуредан 2та гол қабул қилиб олишди ва фақат 9999999та (!!!)та узатмадан кейингина Серхио Рамос ва Каземиронинг бош билан аниқ зарба йўллашлари эвазига мағлубиятдан қутулиб қолишди. «Мадрид» ҳисобида 2та турдан кейин атиги 1та очко бор ва унинг «ПСЖ», «Галатасарой» ҳамда «Брюгге» жой олган гуруҳдан чиқиши энди осонгина вазифадек туюлмаяпти. Майли, «Реал» ўз йўлига, Бельгия клуби эса чиндан ҳам, мақтовга лойиқ ўйнади. Айниқса, нигериялик 21 ёшли йигитча - Эммануэль Бонавентуре Деннис. У 2та бироз ғалати гол урди, факт шуки, ёш футболчи ўзи учун тарихий натижа қайд этди. Ахир «Бернабеу»да, боз устига, ЧЛ баҳсида «дубл»га эришиш ҳаммага ҳам насиб қилавермайди, яна камтаргина жамоа сафида.

Энг қизиғи, Бонавентуренинг ўзи ўйиндан олдин гол уриши ҳақида гапирганди: «Сантьяго Бернабеу» — туш! Кўпчилик бу ерда ўйнаш ҳақида ҳаттоки, ўйлашга ҳам ботинолмайди. Мана, орзуларимдан бири ушалди. Энди агар гол уришни ҳам эпласам-ми...? Бунинг шарафига татуировка қилдираман!» Ўйиндан олдинги интервью учун идеал намуна. Деннис озгина таваккал гапиргани тайин, ҳар ҳолда, «Брюгге»нинг «Бернабеу»да лоақал 1та гол уришини ҳам кўпчилик кутмаганди. Амалда эса Эммануэлга ўз сўзи устидан чиқиши учун атиги 8 дақиқа кифоя қилди. Энди у нафақат келажак учун «Бернабеу»га боғлиқ унутилмас хотира ҳозирлади, балки яна татуировка чиздирадиган бўлди. Аниқроғи, 2та сурат. «Албатта, ваъдам эсимда! Нима дердим, 2та тату бостираман!» — деди бахтиёр Бонавентуре Бельгия ТВсидаги чиқишида.

Айтиш жоиз, «Брюгге» нигериялик футболчи фаолиятидаги 2-клуб ҳисобланади. У еврофутбол томон юришини Луганскнинг «Заря»сида бошлаганди. Яъни ёш Деннис мавсум-2016|2017ни Украинада ўтказиб, 6та гол урган. Нигериялик болакай жумладан, Киев «Динамо»сига қарши кечган баҳсда «дубль» қайд этиб, назарга тушган, қолаверса, ЕЛда ҳам чакки ҳаракатланмаганди. 2017 йилнинг ёзида эса «Брюгге» атиги 1,2 миллион евро тўлаб, Бонавентурени ўз сафига қўшиб олди. Ҳа, бельгияликлар оддий африкалик иқтидорларни жиддий ижрочи даражасига олиб чиқиш йўлларини яхши билишади. Кўринишидан, Бонавентуре мисолида ҳам бу ишни маромига етказишмоқда. Ҳар ҳолда, ёш ҳужумчи айни пайт «Манчестер Сити» ва «Рома» эътиборида турибди. Қанотларда ҳам тўп суриш салоҳиятига эга универсал форварднинг трансфери эса ҳозирдан 10 миллион еврога баҳоланмоқда.

Айтганча, Деннис ўз голларини Криштиану Роналдуга хос тарзда нишонлаши билан ҳам «Бернабеу»ни ҳайратга солди. Тўғриси, мадридликлар бундай ҳаракатни соғиниб қолишганди. «Криштиану — мен учун биринчи рақамли севимли футболчи. Афсус, у «Реал»дан эртароқ кетиб қолди. Қисқаси, ўз хатти-ҳаракатим билан «Бернабеу» мухлислари айнан нимани қўмсаётганликларини кўрсатмоқчи бўлдим, холос», — дея голни нишонлаш услубига изоҳ берди 21 ёшли иқтидор.

Бонавентуренинг иккинчи голи жуда кулгули бўлди: Тибо Куртуа олдида ёлғиз қолган ҳужумчи тўпни тўхтатишга уриндию, аммо эплолмади. Бироқ иккинчи оёғини ишга солди ва дарвозабон ожиз қолди - вазият тақозоси. Дарвоқе, бунга қадар ЧК|ЧЛ тарихида Мадридда «Реал» дарвозасига биринчи бўлимдаёқ 2та гол уриш фақат 2 нафар футболчига насиб этганди - Марио Манжукич ва Дмитрий Радченкога.