ЎЗГАЧА ЎЙИН, МУХЛИСЛАР ТОМОНИДАН РЕКОРД, БЕТАКРОР ПЕРФОРМАНС ва 5G ТАРМОҒИ ТЕСТИ. «Марсель» клуби Франция чемпионати 13-турида «Лион»ни қабул қилиб, 2:1 ҳисобида ғалаба қозонди. 2та «Олимпик» ўртасидаги принципиал ўйин арафасида «Марсель» фанатлари «Лион» автобусига ҳужум қилдилар, лекин стадион ичида барчасини ўз ўрнига қўйиш, қойиллатишга уриндилар. Мисол учун, шу ўйинда «Велодром»га мухлислар ташрифи бўйича рекорд кўрсаткич қайд этилди. Расмий маълумот: трибуналарда 65421 фанат йиғилди!
Шу мавсум «Марсель» футбол клубининг ташкил топганига 120 йил тўлди. Гарчи кўплаб манбаларда ёзнинг охирги куни - 31 август клуб таъсис этилган сана сифатида келтирилсада, фанатлар негадир юбилей шарафига тайёрланган ажойиб перформансни айнан «Лион»га қарши ўйин учун сақлаб қолишган экан. Бинобарин, жамоа асосий рақиб - «ПСЖ» билан биринчи давра ўйинини сафарда ўтказди. Кейинчалик «Марсел»нинг «Твиттер»даги саҳифасида перформанс қандай тайёрлангани ҳақида видеолавҳа қўйилди. Барчаси жуда гўзал.
Яна бир томони, «Марсель» Orange билан ҳамкорликни йўлга қўйиб, ўз стадионида 5G тармоғини синаб кўрган Франциянинг биринчи клуби бўлди. Гап мобиль алоқанинг 5-авлоди хусусида кетмоқда. Бу тизимнинг интернет тезлиги 1-2 Гбит.|сонияга тенг. Orangeнинг махсус иловасидан фойдаланиш имконияти ўлароқ, мухлислар ноёб ички манзарани ўз смартфонларида томоша қилишди. Бунинг учун стадион ичига эксперименталь антенналар ўрнатилганди. Хуллас, 5G шу тариқа Франция футболида дебютини нишонлади. Аввалига фанатларнинг видеолавҳаларни 360 даражада 8К-сифати билан кўришлари таъминланиши тахмин қилинганди. «Марсель» эндиликда алоқа сифатини янада яхшилаш чораларини излайди. Умуман олганда, охирги 3 йилда «Велодром» стадиони атрофига 1000тадан ортиқ Wi-Fi-терминали ўрнатилди.
5Gнинг бутун Европадаги ҳолатига келсак, бунга қадар ушбу тармоқ Германияда «Вольфсбург» томонидан синаб кўрилди. Яъни сентябрь ойида журналистларнинг махсус гуруҳига янгича хизмат тури ҳавола этилди. «Барселона» раҳбарияти эса жорий йилнинг февралидаёқ «Камп Ноу» 5G билан жиҳозланган биринчи стадион бўлишини эълон қилганди. Каталонияликлар мухлисларни махсус кўзойнаклар билан таъминлашни режалаштиришган. Шунда улар ўйинни худдики, майдон ичида кузатаётгандек бўлишади.
BT Sportнинг мобиль стратегия бўйича директори Мэттью Стэгг 5G истиқболига шубҳаланмаяпти. Бироқ унинг фикрича, тизимнинг стадионларга кенг кириб боришини анча кутишга тўғри келади. Чунки қурилма катта харажат талаб этади. Стэгг шунинг баробарида 5G кенг миқёсда ривожланиши муқаррар эканлигини таъкидламоқда.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20