Ҳозирча Оле-Гуннар Сульшернинг «МЮ» бош мураббийи сифатида яна қанча қолишини айтолмаймиз. «Тоттенхэм» ва «Манчестер Сити»га қарши кечган баҳсларда қўлга киритилган ажойиб ғалабалардан кейин муваффақиятли юриш давом этса, манчес­терликлар унинг қолишини хоҳлашлари аниқ. Ҳар қандай ҳолатда ҳам, норвегияликдан энг кўп миннатдор бўлса арзийдиган бир йигит бор. 19 ёшли Брендон Уилльямсга айнан Сульшер асосий таркибдан жой ажратди.

Брендон Уилльямс 53-рақамда ўйнайди. Гўёки, бу унинг жамоадаги мақомига ишора қилаётгандек. 3 сент­ябрь куни 19 ёшини нишонлаган футболчининг келажагига ишонч билан қаралаётганди. Шу, холос. Аммо Сульшер, балки мажбурликдандир, Брендонни асосий таркибга киритди. Натижада маълум бўлдики, бу йигитча бош жамоада ўйнашга тайёр экан. Уилльямс майдонга тушганда ўша учрашувнинг энг яхши футболчиларидан бирига айланди.

Навқирон чап қанот ҳимоячиси кўплаб яккакурашларда устунликка эришди, қўпол хатоларга йўл қўймади, ўз позициясида таниқли ҳамкасб­лари - жамоа сардори Эшли Янг, жуда кўп жароҳатланадиган Люк Шоу, дастлаб чап томонда ўйнаган Маркос Рохоларнинг ўрнини эгаллади. «Шеффилд Юнайтед»га қарши баҳсда муҳим голни урди. Анча совуққонлиги, улғайганини кўрсатди, буюк клубнинг «асосий»сида ўйнашга тайёр эди. Гарчи омади юришмаётган бўлсада, «Манчестер Юнайтед» ҳамон буюклигини йўқотмаган. Қолаверса, Уилльямс клуб академия­си тарбияланувчиларига асосий таркибга йўл ёпиқ эмаслигини кўрсатиб қўйди, бунинг учун ижараларда санғиш, вақт ва мотивация йўқотиш шартмаслиги исботланди. Бунинг учун машғулотларда астойдил ишлаб, имкониятга эга бўлиб, ундан унумли фойдаланиш керак. Ёшлар жамоаси мураббийи Нил Райан ҳам бу мавзуга алоҳида тўхталди. «Уилльямснинг фаолияти - академиядаги бош­қа футболчиларга намуна бўлади. Асосий таркибга олиб чиқадиган «лифт» ёпилмаган. Унинг эшиклари ҳам, тугмалари ҳам бор. Шунчаки, уларни топиш ва босиш керак, холос».

Уилльямснинг «асосий»га киритилиши клубнинг ўз тарбияланувчиларига қандай муносабатда эканлигини ҳам намоён этди. Сир эмаски, академия кўпинча бошқа клублар учун ишларди. Сўнгги йилларда «резерв»дагилардан бош жамоага фақат Жесси Лингард (бир нечта ижарада юришдан кейин), Скотт Мактоминай ва Маркус Рэшфорд чиқишди. Ваҳоланки, тарбияланувчилар орасида кучли футболчилар бисёр эди. Англия термасига «Эвертон»дан Майкл Кин чақирилди. Номзодлар ичида «Бернли»даги Жеймс Тарковски бор. Бу футболчининг клубдоши Дуайт Макнилда ҳам инглизлар миллий жамоасида тўп суриш имконияти бор. Бу тўлиқ рўйхат эмас. Бу футболчиларнинг ҳаммаси «МЮ» академиясидан чиқишган, барчалари қадрдон клубларида ўйнашни хоҳлашган, аммо уларнинг иқтидорини ўз вақтида пайқайдиганлар топилмаган. Ушбу масалада Брендон Уилльямснинг омади чопди. Ундаги истеъдодни асосий таркиб устози назардан четда қолдирмади.

Сульшер келажаги порлоқ ўсмирни баҳордаёқ кўз остига олиб, Брендонни «ПСЖ»га қарши баҳсда қатнашиши лозим бўлган футболчилар билан бирга Парижга олиб кетганди. Ўшанда «қизил иблислар» ўтган мавсумдаги энг яхши ўйинларидан бирини ўтказишган, Франция чемпионини Чемпионлар Лигасидан чиқариб юборишганди.

Табиийки, ўша учрашувда Уилльямс томошабин вазифасини ўтаганди. Унга эътибор қаратишга вақт йўқ эди. Шунга қарамай, Оле-Гуннар ёш шогирдининг интилишига юқори баҳо берди. Куздан Брендонни яна жамоага чақира бошлашди. Ҳатто чап қанотда Эшли Янгнинг ўрнини эгаллади. Дастлаб «Рочдейл»га қарши кечган кубок баҳсида, кейин эса жиддийроқ рақиблар билан учрашувларда майдонга тушди. Мисол тариқасида Европа Лигаси доирасидаги «Партизан»га қарши кечган ўйинни олиш мумкин. Ўшанда Уилльямс энг яхши тўп сурганлардан бири бўлганди. Ҳам ҳимояда ишончли ўйнади, ҳам пенальти ишлади. Шунингдек, «Шеффилд Юнайтед» майдонида ўтган қувноқ дуранг билан якунланган шиддатли беллашувда қатнашди. Брендон катталар жамоасидаги голлари ҳисобини очди. Умид қиламизки, бу охиргиси бўлмайди. Мана, энди Уилльямс асосий таркиб футболчиси, Англия термаси устози Гарет Саутгейт эса «Олд Траффорд»га ташриф буюрди. Аввалига у шунчаки Брендоннинг ўйинини кузатади. Ке­йин нима бўлишини вақт кўрсатади. Ҳар ҳолда, инглизларнинг Европа чемпионатида қатнашадиган таркиби ҳали тўлиқ тузилмаган.

Уилльямс - ўнг оёқда ўйнайди, шунга қарамай, жойи мудофаанинг чап томонида. Унинг тезлиги ҳар тарафлама юқори. Тўғри, тўпни олиб қўйиш ва техника бобида ҳали яна ишлашига тўғри келади. Аммо Брендоннинг эндигина 19 ёшга тўлганини унутмаслик лозим. Уилльямснинг қисқа фаолияти кўрсатмоқдаки, у зарур жиҳатларни ўзлаштиришга қодир. У жуда оғир-босиқ, ўзига ишончи юқори. Гўёки, асосий таркибга кузда эмас, бир неча мавсумлар аввал киритилгандек.

«Манчестер Юнайтед» Янгнинг тез орада МЛСга йўл олишидан хабардор. Шоунинг жароҳатлари ҳам жонга тегди, Рохо билан ҳам хайрлашиш вақти яқин. Клубдагилар «Лестер»дан Бен Чилуэллни сотиб олишмоқчи эди. Тушунарлики, «тулкилар» бу футболчини сотадиган бўлишса, катта пул талаб қилишади. Аммо сўнгги пайтларда бу борадаги музокаралар тўхтаб қолган. Тўғри-да, ўз мактабида салоҳияти юқори футболчи чиқаётган экан, қимматбаҳо Чилуэллни сотиб олишнинг нима кераги бор? Балки Брендон асосий таркибда мунтазам ўйнашга тайёрдир?! «Юнайтед» унга янги шартнома таклиф қилди, футболчи тез орада унинг остига имзо чекса керак. Ортиқча савдолашмаслиги ҳам турган гап. Манчестерда туғилган йигитчанинг кўзига бошқа жамоалар кўринмайди. У ҳар бир цент учун тортишиб, майдонга тушишини миннат қиладиган Поль Погба тоифасидан эмас. Бу ўринда клубга содиқлик иккинчи даражага тушиб қолади.

Брендон Уилльямс - «Манчестер Юнайтед» тарбияланувчилари орасида Сульшер томонидан асосий таркибга киритилган ягона футболчи эмас. Премьер-лига баҳсларида биз Брендондан бир ёш кичик бўлган Мэйсон Гринвуднинг мунтазам равишда майдонга тушишига кўникиб қолдик. Англия ўсмирлар термаси сардори Жеймс Гарнер ҳам «асосий»да кўриниш берди, норвегиялик мутахассис бу футболчининг келажаги ёрқин эканлигини кўп таъкидламоқда. Шунингдек, Тахит Чонг, «Астон Вилла»да тажриба оширган Аксель Туанзебе, унинг амплуадоши Итан Лэйрд, ҳужумкор ярим ҳимоячи Анхель Гомес ҳам бор.

Нур-Султонда кечган «Астана»га қарши баҳсда Сульшер деярли клуб тарбияланувчиларидан ташкил топган, Жесси Лингард, Люк Шоу ва дарвозабон Ли Грант ҳисобига кучайтирилган таркибни майдонга ташлади. Ютқазишди, аммо ҳечқиси йўқ. Ҳар ҳолда, тажриба орттиришди. Норвегиялик мураббий инқилоб тайёрламоқда. Худди шундай ишни 90-йиллар ўрталарида буюк Алекс Фергюсон амалга оширган, Дэвид Бекхэм, Пол Скоулз, Никки Батт, ака-ука Невиллар, кейинчалик эса Сульшернинг ўзини ҳам жангга ташлаганди.

Кўриниб турибдики, мавсумнинг қолган қисмида қандай натижа қайд этилишидан қатъий назар, «МЮ» раҳбарлари Оле-Гуннарни лавозимидан бўшатмасликлари керак. Акс ҳолда, ривожланиш жараёни тўхтаб қолиши аниқ.

 А.АБДУВАЛИХЎЖАЕВ тайёрлади