«Реал» ёзги трансферлар бозорида Тимо Вернерни сотиб олмоқчи. Бунинг учун мадридликларнинг «РБ Лейпциг»га камида 80 миллион евро тўлашларига тўғри келади. Аслида ҳужумчи ёзда эркин агент мақомини олиши мумкин эди, лекин лейпцигликлар яқинда уни шартнома муддатини узайтиришга кўндира олишди. Вернер учун яна бир жиддий харидор бор - «Челси».
Шу ўринда, Лондоннинг «Челси» клуби яримҳимоячиси Н'Голо Канте қишки трансферда Мадридга кўчиб ўтиши мумкин. Бу ҳақда «Mirror» ёзмоқда. Нашрга кўра, 28 ёшли футболчининг келишини «Реал» бош мураббийи Зинедин Зидан истамоқда. Н'Голо Канте клуб раҳбариятига ҳам маъқул, аммо нархи эмас. «Transfermarkt» портали Кантени €100 млн.га баҳоламоқда.

Кантени қишда қўлга киритишни кўзлаб турганлар орасида «Ювентус» ва «Бавария» ҳам бор. Маълумот учун: Н'Голо Канте жорий мавсумда «Челси» таркибида 18 та ўйин ўтказиб, 3 та гол урган.

Айтганча, жамоа вингери Винисиус Жуниор жорий мавсум ҳали бирор ўйинда тўлиқ вақт ҳаракатлангани йўқ. Боз устига, бразилиялик футболчи умумий ҳолатни янада чигаллаштирмоқда. Ҳар ҳолда, у «Хетафе»га қарши ўйиндан кейин захира футболчилари билан шуғулланишдан бош тортди. Бу кетишда, «Қироллик клуби» Винисиусни трансферга қўйиши ҳам мумкин.