ЭНДИЛИКДА «БАРСЕЛОНА» ФУТБОЛЧИЛАРИГА УСТОЗЛИК ҚИЛАДИГАН КИКЕ СЕТЬЕН ҲАҚИДА НИМАЛАР БИЛАМИЗ?

У Мессига ҳавас қилган, уни қарсаклар билан кузатиб қўйган «Бетис» мухлисларини мақтаган; Бускетсдан футболкасини сўраган, уйининг деворига эса «Реал» аъзоси Модричнинг либосини илиб қўйган; Вальверденинг «Барса»сини «Камп-Ноу»да енгган («Бетис» билан - 4:3) ягона мураббий; Шахмат бўйича жаҳон чемпионларига қарши дона сурган, спортнинг ушбу турини жуда яхши кўради. Умуман, Сетьен ҳақида кўпчилик билмайдиган маълумотлар бисёр.

Кике 2006 йили уч ой муддат Африка Ғарбидаги Испаниянинг собиқ колонияси - Экваториал Гвинея термасини бошқарди. Ушбу мамлакат Габон билан биргаликда 2012 йилги «қора қитъа» кубогига мезбонлик қилиш ҳуқуқини қўлга киритган, воқеадан олти йил муқаддам эса яқин келажакда миллий терма шарафини ҳимоя қиладиган кучли футболчилар авлодини тайёрлаш режалаштирилганди. Чунки авваллари Экваториал Гвинея жамоаси йирик турнирларда қатнашмаганди.

Испаниянинг «Логроньес» клуби президенти Хуан Ортелано африкалик ўйинчиларни тайёрлаш бўйича ҳамкорлик ва ёрдам борасида келишувга эришди. Сетьен ва унинг ҳамкасбларидан 15 ёшдан кичик 200га яқин болаларни кузатиш талаб этиларди (хабарда янги Это`Олар қидирилиши айтилганди). Энг яхши деб топилганлар «Логроньес» захира жамоаси машғулотларида қатнашардилар.

Лойиҳа шунингдек, янги инфратузилма яратиш ва терма савиясини 2012 йилги Африка кубоги йўлланмасини қўлга киритадиган даражага кўтаришни ўз ичига оларди. Қўшимчасига - 2010 йилги жаҳон чемпионатидаги иштирок учун курашиш. Мундиал режаси барбод бўлди - гвинеяликлар саралашнинг дастлабки гуруҳ босқичидан ҳам ўтолмадилар: 6та ўйинда атиги бир ғалаба. Шунга қарамай, АМК-2012да чорак финалга чиқиб, бўлажак финалчи - Кот-д~Ивуар термасига ютқазишди.

Муваффақиятнинг энг юқори чўққиси 2015 йилга тўғри келди. Экваториал Гвинея (Эбола вируси тарқалиш хавфи мавжудлиги сабабли) Марокашнинг ўрнига Африка миллатлар кубогини ўз уйида ўтказди ва ўша турнирда 4-ўринни эгаллади. Буларнинг бари Сетьенсиз амалга оширилди, мураббий Африкадан жуда тез ва ғамгин ҳолда қайтди. Дастлаб Кике бу ҳақда батафсил гапиришни хоҳламади, фақат 2013 йили ўтказилган Э.Гвинея - Испания ўртоқлик ўйини (1:2)дан бир кун аввал «ёрилди». Сетьенни мазкур учрашувнинг ўтказилганлиги ҳайрон қолдирганди: «Бу тушунарсиз, эҳтимол, ҳаммасига сиёсат сабабчидир. Бошқа томондан, ушбу беллашув маҳаллий мухлисларга қандай қувонч келтирганини тасаввур қилиш мумкин».

«Қора қитъа»даги фаолияти ҳақида эса мутахассис шундай деди: «Ўша пайт ишсиз эдим ва улар менга таклиф билан чиқишди. Мавжуд ғоя аниқ ва узоқ муддатли эди. Кўплаб футболчиларни, ўйинларни кузатдик, ушбу лойиҳага ишонардим. Ёки ишонишни хоҳлардим. Аммо ке-йинчалик мен билан шартнома тузишга жиддий истак йўқлигини тушундим. Бир сафар маҳаллий федерация президенти билан учрашдим, шу холос. Ташрифларимнинг бирида меҳмонхонада уч кун қолдим, ҳеч ким йўқлаб келмади. Бу ҳал қилувчи ҳолат бўлди».

НЕГА У БУ КАБИ ТАЖРИБАГА РОЗИЛИК БЕРДИ?

«Бундай йўл тутишга етарлича сабаб бормиди, билмайман. Аммо ўша пайт ишлашга эҳтиёжманд эдим. У ерга бориб, инфратузилмаси суст, аҳолиси мураккаб шароит ва касалликлар қуршовида яшаётган, суҳбатлашишни хоҳламайдиган одамлари бор депрессив ва ғамгин мамлакатни кўрдим. Дастлабки ташриф чоғида менга AS нашри фотосуратчиси ҳамроҳлик қилди, энг қашшоқ ҳудудларга бордик, буни унутиб бўлмайди.

Уердаболакайларялангоёқҳолдайиртиқтўпларнитепишарди, аммобунгауқадарэътиборқаратишмас, асосийси, иштиёқбиланўйнашарди. Улар учун нимадир қилиш керак эди. Экваториал Гвинеяда сабрли бўлишим лозимлигини тушунардим, аммо ҳар қандай сабрнинг охири борлиги ҳам аниқ».

АФРИКАДАН ҚУРУҚ ҚЎЛ БИЛАН ҚАЙТДИ

«У ерга мураббий сифатида бордим. Африка футболига нимадир берадиган лойиҳани ишлаб чиқмоқчи эдим. Аслида, бошлаш учун ҳеч нима йўқ эди, қандайдир пуллар ҳам ишлолмадим. Ахир яшаш учун маош керак. Гвинеядаги ҳаётим, меҳмонхона, овқат - буларнинг ҳаммаси пуллик эди. Маҳаллий федерация сариқ чақа ҳам тўламади».

Шундан буён гвинеяликлар ўнлаб мураббийларни алмаштиришди. 2013 йили, Сетьен Африка саргузашт­ларини эсга олганда, Экваториал Гвинея термасини испания­лик Андони Гойкоэчеа бошқараётганди. Уни АМК-2015 бошланишига бир неча ҳафта қолганда бўшатишди.

Сабаб сифатида назорат ўйинларида Португалиянинг унчалик машҳур бўлмаган клубларидан қабул қилинган мағлубият кўрсатилди. Гойкоэчеа шундан сўнг мураббийликни ташлади, Сетьеннинг фаолияти эса ривожланаверди - 2015 йили «Лас-Пальмас»да ишлади, кейин «Бетис»га борди. Энди эса - «Барселона».

ҚАЙСИ УСЛУБ ТАРАФДОРИ?

Ушбу мутахассис аввалги жамоаларида қисқа пас ва максимал даражада тўпга эгалик қилиш тарафдори - «Барселона» Йохан Кройфф ишлаган пайтдан буён худди шундай услубда тўп суради. Айнан ўша даврларда Сетьен Каталония клубини ёқтириб қолган.

Шунингдек, испан футболи ихлосмандлари Кикени шахмат ишқибози сифатида яхши билишади. Мураббий ўз интервьюларида футбол баҳсларини тез-тез шахмат партияларига ўхшатади, ушбу спорт турлари ўртасида боғлиқлик борлигини таъкидлайди. Сетьен Анатолий Карпов, Гарри Каспаров ва Владимир Крамник сингари жаҳон чемпионлари билан ўйнаган. Шунингдек, 12 ёшли Сергей Карякинга қарши дона сурган.

Кике маъқул кўрадиган чиройли ва ҳужумкор футбол у ишлаган жамоаларга тезкор натижаларга эришишда асқотган, аммо одатда, муваффақият финишда ўз аксини топмасди. Яққол мисол сифатида унинг «Бетис»даги фаолиятини кўрсатиш мумкин.

Қаҳрамонимиз мазкур клубни Испаниянинг энг ёрқин клубларидан бирига айлантирди. Сетьен ишлаган даврда жамоа сафарда «Реал»ни ҳам, «Барселона»ни мағлубиятга учратди, лекин ўтган мавсумни 10-ўринда якунлади. Шундан сўнг мураббий истеъфога чиқарилиб, ярим йилдан кўпроқ вақт ишсиз юрди.

Сетьен «Барселона»даги таништирув маросимида имкон қадар кўпроқ совринлар ютишга ваъда бериб, кўплаб машҳур футболчилар, хусусан, авваллари алоҳида ажратиб кўрсатган ўйинчиси - Месси билан бирга ишлашдан мамнун эканлигини билдирди.

«Ташкилотга шундай имконият яратиб бергани учун ташаккур билдирмоқчиман. Ҳаттоки, энг катта орзуимда ҳам бундай фурсат бўлишини тасаввур қилмаганман. Ушбу чорлов ва лойиҳа мени ҳаяжонга солмоқда. Кечагина қадрдон қишлоғимда сигир боқардим, энди эса Барселонадаман, жаҳоннинг энг яхши футболчиларига машғулот ўтказяпман. Мақсад - ҳамма совринларни ютиш! Имкон қадар барча мукофотларни қўлга киритиш, «Барселона»нинг бош­қа йўли йўқ», - деди Сетьен.

Испания чемпионати доирасидаги «Гранада»га қарши баҳс (1:0) Кике учун «Барса» мураббийи сифатидаги дастлабки синов бўлди. Энди олдинда мамлакат кубогидаги илк ўйин - «Ивиса» билан учрашув кутиб турибди.

Февраль ойи охирида «Барселона» Чемпионлар Лигаси 1|8 финал босқичида «Наполи»га қарши ўйнайди. Бу 2015 йилдан кейин биринчи марта ушбу турнирда ғолиб чиқиш учун қўйиладиган дастлабки қадам бўлади. Тўғри, яқин тўрт ой мобайнида Сетьен «кўк-анорранглилар»нинг асосий ҳужумчиси Луис Суареснинг хизматидан фойдалана олмайди. Уругвайлик тиззасидаги жароҳатини даволаш билан банд.

КИКЕ СЕТЬЕН ҲАҚИДА ФАКТЛАР

Футболчилик фаолиятида Сантандернинг «Расинг» клубида умумий ҳисобда 12 мавсум тўп сурган. Мухлислар уни Маэстро деб аташарди. Умуман, «Барселона» устози яшил майдонда яхши ўйнаган. Сантандердаги 8 мавсумдан кейин «Атлетико»га ўтиб, «матрасчилар» таркибида 70тадан ортиқ ўйин ўтказган.

Мадрид клуби сафида Испания Суперкубогини қўлга киритган (1985), ўша мавсум (1985|1986) Испания кубоги ва Кубок эгалари кубоги финалчисига айланган. Сўнгра «Логроньес»да муваффақиятли ўйнагач, қадрдон жамоаси «Расинг»га қайтиб, яна тўрт мавсум фаолият юритган.

Сетьен футболчилик даврида «Барселона» дарвозасини икки марта ишғол қилган.

У Серхио Бускетснинг мухлиси эканини бир неча марта таъкидлаган. Иттифоқо, «Барса» билан ўйиндан кейин Кике ушбу футболчидан либосини беришини сўраган. Бускетс эса зиқналик қилмай, либосига ўзига хос ёзувларни ҳам битган: «Кике учун. Сизнинг футболга бўлган иштиёқингиз ва қарашингиздан ҳайратдаман. Энг яхши тилакларимни билдираман».