Япониялик афсонавий фахрий профессионал фаолиятини тугатишни хаёлига келтираётгани йўқ. 52 ёшли (!) ҳужумчи яқинда «Йокагама» клуби билан шартномаси муддатини яна узайтирди. Ҳа, «Абадий самурай» мақомини олган Казуёши бу йил ҳам катта футболда қолади. Кўринишидан, у турли воқеаларга тўла фаолиятига ҳеч қачон нуқта қўймоқчи эмасдек... Ҳар ҳолда, «Қирол» Миуранинг ўзи ҳам бутсаларини қачон михга илиши хусусидаги савол жавобини билмайди. Аслида ундан шу ҳақда кўп сўрашади. Тиниб-тинчимас фахрий бир сафар қачон нафақага чиқиши хусусидаги саволга юзида илиқ табассум билан фалсафий жавоб берганди: «Футболдан қачон кетаман? Қачонки, руҳим танамни тарк этса...».

ВАҚТНИНГ ТАЪСИРИ ЙЎҚ

Мана, 2020 йил «мангу» Казу учун яна одатий тарзда бошланди - у амалдаги клуби - «Йокогама» билан яна 1 йиллик янги шартномани расмийлаштирди. Буниси япон футболининг чин афсонаси учун профессионал фаолияти давомидаги 35-келишувдир. Бу борада жаҳон рекорди айнан Миурага тегишли эди. Демак, у ўз натижасини янада яхшилади. Бир неча йил олдин кимдир сэр Стэнли Меттьюздан ўзиб кетиши мумкинлигини ўйламасди ҳам. Зеро, Англия футболи афсонаси охирги марта расмий учрашувда майдонга тушганида, 50 ёшдан ошганди. Яъни у юбилейидан 5 кун ўтиб, проффессионал даражадаги баҳсда иштирок этган. Миура эса 26 февраль куни 53 ёшга тўлади. Японнинг фамилияси аллақачон Гиннесс рекордлар китобига киритилган - у футбол тарихида гол урган энг «қария» ўйинчи ҳисобланади.

САМУРАЙНИНГ БРАЗИЛЧА ЙЎЛИ

Казу тарихий голини ўзига хос усулда нишонлаганди - бразилча самба элементларига уйғунлашган рақс билан. Гап шундаки, рекордчининг фаолиятида Бразилия жуда катта ролга эга. Демакки, Миура муҳим паллада самба элементларини кўрсатиб, Бразилияга ҳурмат белгисини ифода этган. Бўлажак ностандарт шахс 15 ёшида япониялик футболчилар учун ностандарт қарор чиқариб, узоқ Бразилияга йўл олганди. Миура шу аснода Жанубий Америкада 8 йил яшади. Диққатга сазовор жиҳати, «Жувентус» клуби мактабида шуғуллана бошлаган япон йигитчаси катта футбол билан чекланиб қолгани йўқ. У худди типик бразилиялик каби пляж ва футзалдан ҳам сабоқ олди. Миура ҳозирга қадар зал ва қум майдонида ўзлаштирилган хусусиятларни футболдаги узоқ фаолияти сирлари қаторида тилга олади. Энг диққатга сазовор факт - Казуёши биринчи профессионал шартномасини кимсан Пеленинг собиқ клуби - «Сантос» билан расмийлаштиради. Тўғри, япониялик футболчи Бразилияда ўз ўрнига эга жамоанинг саноқли расмий ўйинларида қатнашади, холос. Муҳими, у бу даврда маълум даражада танилади. Казуёши шундан кейин «Палмейрас» ва «Куритиба» жамоаларида ҳам ўйнайди ва ватанига қайтишни лозим топади. Чунончи, ўша пайт Японияда миллий чемпионат, жумладан, янги тузилган «J»-лигани тараққиёт сари бошлаш йўлида катта кўламда иш бошланганди. Дейлик, японлар Зико ва Гари Линекер каби «импорт» юлдузларни ўз лигаларига чорлашади. Улар шунингдек, ўз қаҳрамонларини эсдан чиқаришмайди, жумладан, узоқ Бразилияда тўп сураётган Миурани ҳам. Қарангки, айнан Казуёши ғайриоддий техникаси билан барча тан олинган афсоналарни «соя»да қолдириб, чемпионатнинг бош тўпурарига айланади, унинг клуби - «Верди Кавасаки» эса бир неча бора чемпионлик унвонини ютади.

ЕВРОПАНИ «ЗАБТ» ЭТИШГА УРИНИШ

Миура кейинчалик табиий равишда еврофутбол томон ошиқади, аммо унга «кўҳна қитъа»ни ҳайратда қолдириш насиб этмайди. Боз устига, япониялик юлдузнинг 2та уриниши ҳам самара келтирмайди. Тўғри, Казу Италия «А» сериясида ўйнаган биринчи япон сифатида тарихга киради. У яна бир сафар «Генуя дербиси»да «Сампдория» дарвозасига ягона ғалаба голини ургани билан «Женоа» мухлислари ёдида қолади. Ҳаммаси шу, холос. Чунончи, жамоа хўжайини мураббийларни худди қўлқоплардек тез-тез алмаштираверади ва Миура трансфери шунчаки, президент йўлга қўйган бизнес-лойиҳанинг бир қисмидек таассурот қолдиради. Дарвоқе, япон футболчиси «Милан»га қарши ўйинга тўғри келган дебют ўйинидаёқ бурнини синдириб олади ва бу унинг учун Италия чемпионатидан «ёрқин» хотира бўлиб қолади. Футболчи жароҳатланган вазиятнинг бош айбдори - афсонавий Франко Барези. Миура бир неча йиллардан кейин италиялик ҳимоячи билан фахрийлар ўртасидаги кўргазмали ўйинда яна тўқнаш келади. Япониялик ҳужумчи Европа футболидаги иккинчи уринишида эса камтарин «Кроация» ҳам муваффақиятсизликка учрайди, гарчи бу жамоа билан Хорватия чемпионатида ғолиблик шоҳсупасига кўтарилган бўлсада. Хуллас, у вақтинча «Кроация» номи остида ўйнаган ҳозирги Загреб «Динамо»сида етарли ўйин амалиёти олмаганди.

ЖЧда ЎЙНАШ АРМОН

Миуранинг амалга ошмаган яна бир катта орзуси - бу жаҳон чемпионати. У «кўк самурайлар» билан Осиё кубоги-92да ғолиб чиқиш баробарида турнирнинг энг яхши футболчиси сифатида тан олинади. Ўшанда японлар «плей-офф» раундига зўрға чиқишганди. Аниқроқ айтсак, гуруҳ раунди 3-туридан ўрин олган Эрон термаси билан ўйин тугашига атиги 3 дақиқа қолган паллада айнан Миура ҳал қилувчи гол муаллифига айланади. Маълумот учун айтиш керак, Казу мамлакат миллий жамоаси сафида жами 55та гол урган ва форслар дарвозасига йўллангани энг муҳимларидан биридир. Бироқ Осиё чемпиони орадан 1 йил ўтиб, ўша вақт камтарин саналган Қатар термасига қарши баҳсда ғалабани қўлдан чиқариб, ЖЧ-94дан четда қолади. Яна 4 йилдан кейин эса Миура жамоа бош мураббийи билан можарога боргани туфайли Франция мундиалини уйида томоша қилишдан ўзга чора тополмайди. Ваҳоланки, у ЖЧ-98 саралаш босқичида 12та гол уриб, японларни йўлланма ютишларига катта ҳисса қўшганди. Миурага катта мундиалда ўйнаш насиб этмаган бўлсада, унинг фаолиятида жаҳон миқёсидаги 2та биринчилик бор, барибир. Япон юлдузи 2005 йили ўз мамлакатида ташкиллаштирилган Клублар ўртасидаги ЖЧда қатнашиш мақсадида қисқа муддатли ижара келишуви асосида Австралиянинг «Сидней» жамоаси сафига қўшилади. 2012 йили эса қаҳрамонимиз яна бир бора мамлакат терма жамоаси либосини кияди, фарқи шуки, футзал бўйича жаҳон чемпионатида. Японлар гуруҳда 3-ўринни эгаллаган ҳолда, «плей-офф» раундига чиқишади, бироқ биринчи «ҳаёт-мамот» жангида украиналикларга бардош беролмайдилар - 3:6.

«ЙОКОГАМА»ДА 16 ЙИЛ

Умуман олганда, Миуранинг меҳнат дафтарчасида нақ 13та клуб номи бор. Улар орасида ҳозирги жамоаси - «Йокогама» алоҳида ўрин тутади. Биринчидан, бу катта эҳтимолки, афсонанинг фаолиятидаги охирги жамоа бўлиб қолади. Иккинчидан, Казу йокогамаликлар сафида нақ 16 йилдан буён тўп сурмоқда. Бу муддат кимлар учундир бутун фаолият давомийлигига тенг ҳисобланади. Тушунарлики, 52 ёшда жамоа етакчиси бўлишнинг иложи йўқ. Икки мавсум олдин «Йокогама» Япония элит дивизионига чиқишга жуда яқин келди, аммо «плей-офф» босқичи ярим финалида ютқазиб қўйди. Ўша мавсум Миура 9 марта майдонга тушиб, жами 56 дақиқа ҳаракатланганди - камтарона кўрсаткич. Кўпчилик шу статистикасини назарда тутиб, Казу учун ҳаммаси тугаганини тахмин қилди, аммо у футболда қолди. Гўёки, Миура кейинги мавсум «Йокогама»нинг ўз тарихида иккинчи марта мамлакат футболининг элит жамиятига қайтишини билган ва хайрлашув муддатини атайин 1 йилга чўзгандек. Ўз навбатида, клуб раҳбарияти фахрийнинг хизматларини юксак қадрлаб, афсонага ҳурмат белгиси сифатида шартнома муддатини яна узайтиришга қарор қилди. Тўғри, бунда аввало, Миуранинг ҳамон қатъий кун тартибига амал қилиши, соғлом турмуш тарзидан чекинмаслиги, машғулотларда ёшлар қатори ишлаши ва футболга нисбатан чексиз муҳаббати катта ўрин тутган. Миура тўй генерали эмас. Ҳар ҳолда, у аввалги мавсум бир йил олдингисига қараганда, майдонда кўпроқ (109 дақиқа) тўп сурди, қолаверса, баҳорда ҳаттоки, 2 марта бошланғич таркибга кирди. Якунда эса охирги тур баҳсида захирадан майдонга тушди - ғалабани чинакамига нишонлаш учун.

Жаҳон футболидаги асосий фахрийга эга «Йокогама» 13 йиллик танаффусдан кейин «J»-лигага қайтди. «Қирол» ҳозирда ёш бўйича клуб бош мураббийидан ҳам катта. Айтиш ўринли, Миура вақтида бир неча марта «J»-лиганинг энг яхши футболчиси сифатида тан олинган. Дарвоқе, Миура 23 февраль куни «Виссел Кобе» билан баҳсда Андрес Иньестага қарши тўп суриши мумкин. У шундан 3 кун ўтиб, 53 ёшга тўлади.

Дунё футболидаги энг ёши катта профессионал ўйинчилар (охирги расмий ўйини ваҚтига кўра)

*****

Деян Плиснич (Босния ва Герцеговина биринчи дивизиони, Prva Liga RS) -

44 ёш 3 ой 17 кун

Клуби: «Текстилаца»

Амплуа бўйича: дарвозабон

Охирги ўйини: 2019 йил 9 ноябрь

*****

Кеннет Абела (Мальта биринчи дивизиони, BOV First Division) - 44 ёш 6 ой 24 кун

Клуби: «Витториоса Старз»

Амплуа бўйича: ҳужумчи

Охирги ўйини: 2019 йил 15 декабрь

*****

Теруюши Ито (Япония иккинчи дивизиони, J3 League) - 45 ёш 2 ой 24 кун

Клуби: «Азуль Кларо»

Амплуа бўйича: ярим ҳимоячи

Охирги ўйин: 2019 йил 24 ноябрь

*****

Эгон Моек (Эстония иккинчи дивизиони, Esiliiga B) - 45 ёш 8 ой

Клуби: «Кейла»

Амплуа бўйича: ҳимоячи

Охирги ўйини: 2019 йил 10 ноябрь

*****

Казуюши Миура (Япония биринчи дивизиони, J2 League) - 52 ёш 8 ой 29 кун

Клуби: «Йокогама»

Амплуа бўйича: ҳужумчи

Охирги ўйини: 2019 йил 24 ноябрь

*****

Бонус: Исаак Хайик (Исроил тўртинчи профессионал дивизиони, Liga Bet South A) - 73 ёш 11 ой 24-30 кун

Клуби: «Ирони» (Ор-Иегуда)

Амплуа бўйича: дарвозабон

Охирги ўйини: 2019 йил 5 апрель