Вақтида Осиёнинг клублар ўртасидаги бош турнирида якуний ғалаба шукуҳини туйган 7та таниқли клуб («Гамба Осака», «Сеонгнам Ильва Чунма», «Кашима Антлерс», «Ал-Иттиҳод», «Урава Редс Даймондс», «Поханг Стилерс» ва «Вестерн Сидней Уондерерс») жорий мавсум томошабин ролида. Умуман олганда, кейинги душанба куни бошланадиган ОЧЛ гуруҳ раундининг 32та иштирокчисидан атиги 6таси («Ал-Ҳилол», «Чонбук Хюндай Моторс», «Ал-Айн», «Гуанжоу Эвергранд», «Ал-Садд» ва «Ульсан Хюндай»)га бундан олдин турнирда ғалаба қозониш насиб этган, холос.

*** Шу пайтга қадар ОЧЛда жами 131та клуб иштирок этган (саралаш раундларида қатнашган, бироқ гуруҳ босқичига чиқмаган жамоалар қўшилмаган).

*** Жорий мавсум гуруҳ босқичига чиққан 32та жамоа орасида ушбу турнирда кўп қатнашиш бўйича «Ал-Ҳилол» мутлақ етакчи. Саудия Арабистонининг ушбу клуби бу йил 16-марта гуруҳ босқичига чиқди. ОЧЛнинг умумий жадвалида эса «Ал-Ҳилол» энг яқин таъқибчиларидан 1 мавсумга олдинда. Турнирдаги ўйинлар (129та), ғалабалар (60та) ва дуранглар (37та) сони бўйича ҳам айнан «Ал-Ҳилол» 1-ўринда бормоқда.

*** ОЧЛ-2020 гуруҳ босқичи иштирокчиларидан 12таси турнирда камида  10 марта қатнашган.

*** ОЧЛда бош совринни қўлга киритган жамоалар сони 13та.

*** 9та жамоа учун энг юқори натижа - бу финал. Яъни 13та чемпиондан ташқари, яна 9та клуб ҳал қилувчи ўйин юзини кўрган.

*** ОЧЛ ярим финалида тўхтаган жами 15та жамоа орасида бизнинг «Пахтакор» ва «Бунёдкор» ҳам бор.

*** «Пахтакор» ва «Ал-Ҳилол» клублари мағлубиятлар сони (32та) бўйича ОЧЛнинг умумий жадвалида «кучли учлик»да. Энг кўп мағлубият эса «Ал-Райан»га тегишли - 34та. Қатарнинг ушбу жамоаси турнир доирасидаги жами ўйинларидан 63 фоизида енгилган.

*** ОЧЛнинг асосий раундларида қатнашган 131та жамоадан атиги 4таси 150та гол маррасидан ошган. 100та гол маррасига етган иштирокчилар сони - 18та.

*** Турнир тарихида 9та жамоа 100та ёки кўпроқ гол қўйиб юборган. Булар орасида «Пахтакор» (112та ) ва «Бунёдкор» (103та) ҳам бор.

*** ОЧЛ-2020 гуруҳ босқичига йўл олган 4та жамоа мусобақа дебютанти ҳисобланади. Булар - «Шаҳр Ходро» (Эрон), «Виссел Кобе» (Япония), «Перт Глори» (Австралия) ва «Чианграй Юнайтед» (Таиланд).

*** ОЧЛда шу пайтгача атиги 19та миллий чемпионат вакиллари қатнашган. Жорий турнирнинг асосий «сетка»сига чиққан 32та жамоа эса 12та мамлакат вакилидир. Дарвоқе, олдинги йиллар нуфузли турнирда ёмон қатнашмаган Қувайт, Сурия, Вьетнам ва Гонконг каби ўртамиёна чемпионатлар вакиллари кейинги мавсум гуруҳ босқичига чиқиш учун кураш олиб бориш имкониятига эга.