Жорий мавсум аввалида катта умидлар билан «Реал»га йўл олган ёш ҳужумчи Лука Йович ҳозирча мадридлик мухлислар ишончини қозона олгани йўқ. Ўзи Бундеслигада мегаиқтидори билан ажралиб турган футболчига нима бўляпти? Йович яқинда Сербиянинг YouTube Sport Afternoon каналига берган интервьюсида «Қироллик клуби»даги дебют мавсумига ҳам алоҳида тўхталди.

- Сербияликлар «Фортуна» (Дюссельдорф)га қарши ўйинда 5та гол урганингизни ҳамон зўр энтикиш билан эслашади. Айтингчи, айнан қайси паллада юксак савияда тўп сура олишингизга тўлиқ ишонч ҳосил қилгансиз?

- Очиғи, ҳеч қачон ўз иқтидоримга шубҳаланган эмасман. Қисқаси, вақт ўтиши билан янада самаралироқ ўйнашим, кучайиб боришимни билардим. Фақат маълум муддат омадли лаҳзаларни кутишга тўғри келди: «Бенфика»да бундай имконият келмади, «Айнтрахт»да эса ўзимни кўрсатишга эришдим. Чунки ўз салоҳиятимга тўлиқ ишонардим. Тўғри, Германияда ҳам аввалига анча қийналдим, муҳими, ишончни йўқотганим йўқ. Охир-оқибат, мақсадимга етдим. Кўрамиз, истиқболим қандай бўларкин?

- Майдонда ҳужумчи ролини бажарасиз. Демак, бош вазифангиз - гол уриш. Энг севимли голингизни айта оласизми?

- Германия кубоги ярим финали доирасида «Шальке» дарвозасига урилгани ёдимда муҳрланган. Яна «Мадрид» сафида «Леганес» билан баҳсда урган голимни ҳам алоҳида эътироф этишим мумкин. Чунончи, «Қироллик клуби»да гол уриш дуч келган футболчига насиб этавермайди.

- Дунёнинг энг номдор жамоаси таклифи ҳақида илк марта уйга қайтиш чоғи эшитганингиз ростми? Ўша вазиятдаги ҳолатингизни тасвирлаб бера оласизми?

- Яхшиси, барчасини бир бошдан айтиб бера қолай: менежерим телефон орқали «Мадрид»дан таклиф олганини билдирди. Мен эса ишонмадим: «Қўйсангизчи, ҳозир ҳазил вақти эмас». Шунда у анча жиддийлашди: «Нега ҳазил? Ҳаммаси рост. Тезроқ обдон ўйлаб кўр...». Натижада деярли ақлдан озаёздим - дунёнинг энг сара клуби менга қизиқиш билдирадию, хотиржамликни қандай сақлайман? Хуллас, бундай имкониятни рад этиб бўлмаслигини англаш учун икки кун ўйладим. Тушунарли, «Реал» сафига қўшилиш имкони қайта такрорланмайди. Ўйлашимча, якунда таклифни қабул қилиб, тўғри қарорга келдим.

- Кўплаб футболчилар сизнинг ўрнингизда бўлиб қолишни орзу қиладилар. Ёш йигитлар эса, сизга кумир сифатида қарашмоқда. Болаларга намуна бўлишингиз кераклигини ҳис қиляпсизми?

- Ҳа, тўлиқ тушуниб турибман. Мендан кўп нарса кутаётганликлари маълум. Ҳа, ҳозирча «Реал»даги ўйиним салбий жиҳатлардан холи эмас. Бироқ бу ерга тасодифан келмаганимни исботлашимга аминман. Зеро, талаб даражасидаги маҳоратим эвазига таркибдан жой олдим. Энди ёш касбдошларим узоқ йиллар давомида ўйинларимдан илҳомланиб, тегишли сабоқ олишларига шубҳаланмайман. Менимча, «Мадрид»даги голларим билан уларни руҳлантириш қўлимдан келади.

- Ижтимоий тармоқларда нечоғли фаолсиз?

- Фақат «Инстаграм»да саҳифам бор. Тўғри, олдин анча фаол эдим, лекин ҳозир асосий эътиборни ўйинга жалб этяпман: мураккаб мослашиш даврида тезроқ юқори спорт формасига кириш учун тинмай ишлаш лозим.

- Одамлар ёки ОАВ вакилларининг фикр-мулоҳазалари тинчингизни бузмаяптими?

- Йўқ, уларга умуман эътибор қаратмайман: матбуотда ёзилганлари бемаънилик, холос. Муҳими, яқинларим, танишларим ва маҳбубам асл ҳақиқатни биладилар. Қисқаси, ғаразгўйлар фикри мени қизиқтирмайди. «Инстаграм»ни очганда ҳам, фақат шахсий ҳаётимга оид янгиликларни кўздан кечираман. Сербияликлар ватандошларининг «Реал» аъзоси эканлигидан фахрланишлари керак. Бош­қа гапим йўқ.

- «Реал»даги илк голингизни «Леганес» дарвозасига урдингиз, кейин «Севилья»га қарши ўйинда Каземирога ассистентлик қилдингиз. Бу билан мураббий ишончига кирдингизмикин?

- Жорий мавсумдаги ўйинларимдан кўнглим тўлмаяпти. Ҳозирча, албатта. Биринчидан, сезиларли даражада яхшироқ тўп сура олишимга ишончим комил. Баъзан ижтимоий тармоқларда аввалги мавсумдаги ўйин­ларим парчаларини томоша қилиб, беихтиёр ўйланиб қоламан: «Ўзи менга нима бўляпти?» Лекин «Реал»нинг буюк жамоа эканлиги, унга мослашишда ҳаттоки, тажрибали ўйинчилар ҳам қийналишларини барчамиз яхши биламиз. 60 млн. эвазига харид қилинган 21 ёшли йигитча учун янада қийин бўлиши ўз-ўзидан маълум: бу ерда босим жуда кучли, ҳозирча уни енголмаяпман. Лекин яқин келажакда ҳаммаси изига тушишидан умидворман, албатта.

А.АҲМЕДОВ тайёрлади.