Юрген Клинсманн мураббий сифатида чексиз ваколатга эга бўлишни орзу қилди. Бунинг оқибати - «Герта»да атиги 76 кунга чўзилган фаолият ва можароли кетиш... Берлин клуби грандлар қаторига кирмасада, қишки трансферлар бозорида катта шов-шув кўтарди. Германия Бундеслигасининг одатий ўртамиёна вакили битта аниқ вазифа (юқори дивизионда қолиш)ни бажариш илинжида қишда мисли кўрилмаган (албатта, ўз ўлчови билан) харажатларга қўл урди. Берлинликлар энди жамоани еврокубоклар йўлланмаси учун курашишга шайлантиришмоқда. Бироқ барча ишлар текис кетаётгани йўқ. Дейлик, «Герта»нинг янги соҳиблари ва катта умидлар билан таклиф қилинган бош мураббий Юрген Клинсманн ўртасида келишмовчилик юзага келди. Натижада таниқли мутахассис билан ҳамкорлик атиги 76 кунда тугади...

«Герта» раҳбарияти Юрген Клинманн билан ўтган йилнинг 27 ноябрь куни оғзаки келишувга эришганди. 2 декабрда эса томонлар расман шарт­нома тузишди. Мана, 11 февралга келиб, мураббийлик фаолиятида Германия ва АҚШ терма жамоаларида ишлашга улгурган Клинсманн истеъфога чиққанини эълон қилди. Бу оралиқда «Герта» унинг бошқарувида ўртачадан пастроқ натижа кўрсатди - 3та ғалаба, 1та дуранг, 4та мағлубият. Энг катта муваффақиятсизлик - бу жамоанинг Германия кубоги турниридан чиқиб кетгани. Оқибатда мураббий ва раҳбарият ўртасида келишмовчилик юзага келди, можароли истеъфо рўй берди. Хулоса ўзингиздан...

Клинсманн клубдаги ишини тўхтатгани ҳақида «Фейсбук» тармоғида хабар қолдирди. У ўз постида футболчилар ва мухлисларга ҳамкорлик учун миннатдорчилик билдирди, шунинг баробарида «Герта» қисқа вақт ичида маълум натижаларга эришганини алоҳида қайд этди. У яна раҳбарият ишини киноя остига олишни ҳам унутмади: «Бош мураббий сифатида олдимизга аниқ вазифа қўйган кишилар томонидан менга бутунлай ишонч билдирилишига эҳтиёж сезгандим, албатта. Бирдамлик, ягона мақсад йўлида жипслашиш ва эътиборни жамлаш - клуб ҳаётида энг муҳими шу. У айниқса, лигада қолиш учун курашаётган бўлса. Бордию, ишонч ва бирдамлик кафолатланмаса, ҳеч бир мутахассис мавжуд потенциалдан тўлиқ фойдаланолмайди». Клинсманн айни шу хабарида яна бир фактга тўхталди: у «Герта» кузатув кенгаши аъзолигидан чиқмайди. Мураббий бошидаёқ кенгашга киришни хоҳлаганди. Энг қизиғи, «Герта» Клинсманн баёнотига ғалати тарзда муносабат билдирди. Берлин клуби расмий сайтида ёзилишича, раҳбарият мураббийнинг қароридан «шок» ҳолатига тушган. Яъни таъкидланишича, жамоада ҳеч ким Клинсманни истеъфога чиқариш масаласини ўртага ташламаган, айнан унинг ўзи ҳамкорликни узишни хоҳлаган.

Маълумот учун, Юрген Клинсманн бунга қадар Германия миллий жамоаси ва «Бавария» клубларини бошқарган, кейин АҚШ термасида ишлаганди. Демак, «Герта» унинг мураббийлик фаолиятидаги биринчи ўртамиёна клуб бўлди. Айтишларича, Юрген жамоада иш бошлашдан олдин мураббий сифатида имкон борича кўпроқ ваколатга эга бўлишни истаган. Германия ОАВ тахминига кўра, Клинсманнинг кетишига айнан кутилган ваколат тақдим этилмагани сабабдир. У жумладан, трансферларни тўлиқ ўз назоратига олиш ва футбол масаласидаги энг майда-чуйда қарорларни ҳам шахсан ўзи чиқаришни хоҳлаган. Бироқ бу «Герта» раҳбариятига ёқмади, шекилли. Хусусан, спорт директори Майкл Прец бошқарувни тўлиқ бош мураббий қўлига ўтиб кетишига тўсқинлик қилди. Айнан у Юрген Клинсманн билан келишмовчилик борлигини тасдиқлаганди: «Айрим масалаларда бош мураббий ва раҳбарият фикри бир жойдан чиқмаяпти. Ўртада келишмовчилик борми, барчасини хотиржам ҳолда муҳокама қилиш маъқул. Бироқ иккинчи томон рўпарангизда туриб, шундоқ юз ўгириб кетса, ҳеч нима қилолмайсиз...».

Клинсманнинг ногаҳоний кетиши «Герта» сармоядори Ларс Виндхорст­ни ҳам бефарқ қолдирмади: «Нима бўлишидан қатъий назар, Клинсманн тайинловини клуб ғалабаси сифатида эътироф этаман. Афсуски, унинг кутилмаган истеъфоси барчасини бузди. Ҳа, Юрген кузатув кенгаши таркибида қолишини маълум қилибди. Аммо эндиликда у билан ҳамкорликни давом эттиришимиз иложсиз масала...». Майкл Прец эса ESPNга берган интервью­сида бор гапни дангал айтди-қўйди: «Ҳамиша охирги сўзни айтишга масъул киши бўлиши керак. «Герта»да бундай одамлар бор - молия директори Инго Шиллер ва мен. Буни алоҳида муҳокама қилиш ўринсиз». Ҳа, «Герта» позицияси тайин, Клинсманн эса кўпроғини хоҳлаган кўринади...