Анча вақтгача «Атлетико» ва «Бенфика» жамоаларида ўз ўрнини топа олмаган мексикалик ҳужумчи Рауль Хименес жорий мавсумни «Вулверхэмптон» сафида ўтказиб, сермаҳсул ўйинлари билан АПЛ мухлисларини лол қолдирмоқда. Бундан ташқари, «Реал» эътиборини ўзига жалб этишга улгурди.

Ҳаётининг энг ёрқин дамлари.

Ҳозиргина ҳужумчи ўз маъшуқаси Даниэланинг ҳомиладорлиги, туғилажак тўнғич фарзанд ўғил эканлигидан хабардор бўлди. Хушхабарнинг сўнгги бандини у «Молинью» стадионида эшитди. Чақалоқ шарафига жамоа ташкил этган махсус ўйинга кўра, Рауль дарвоза бурчагига жойланган нишонни аниқ мўлжалга олиши лозим эди. Футболчи топшириқни адо этганида, у ердан кўм,кўк тутун кўтарилди.

«Бу ўйин бизга жуда ёқди. Отам ва синглим ҳам ўша пайтда стадионда ўтиришганди. Биз ажойиб лаҳзалар гувоҳи бўлдик» дейди Хименес.

Чақалоқнинг июль ойида дунёга келиши кутилмоқда. Воқеанинг Вулверхэмптонда юз бериш эҳтимоли юқори. Ўшанда «Бўрилар» мавсумолди тайёргарлигини бошлаган бўладилар. Балки биз ўшанда Англия терма жамоасининг бўлажак ҳужумчиси таваллудига гувоҳ бўлармиз?

«Ўзим унинг Мексика учун ўйнашини истардим. Лекин бу вариантни ҳам инкор этмайман» деди Рауль.

Ҳозирда ҳужумчининг нафақат майдон ташқарисида, балки унинг ичида ҳам ошиғи олчи. Жорий мавсумда Рауль «Бўрилар» хирмонига 22та гол билан улуш қўшди ва дебют мавсумидаёқ муносиб нуфузга эга бўлди. Энди у АПЛнинг етакчи тўпурарлари қаторида.

«Ҳозир доимо кўтаринки кайфиятдаман, амалга ошираётган ишларимдан фақат лаззат оляпман. Нафақат футбол, барча жабҳада ўзимни қушдек енгил ҳис этяпман. Ҳозир менинг ва жамоанинг «кетмони» учган давр. Орзуларим  воқеликка айланмоқда» дейди ҳужумчи.

Хименес , етук ҳужумчи. Гап фақат голларида эмас. Жорий мавсумда у АПЛнинг ўзида 6та асссистни амалга оширди. У жамоадошлари учун гол яратадиган ўйинчи, тўпни яхши олиб юради, рақибларнини осонлик билан ортда қолдиради. Кўпинча, битта кескин ҳаракати билан ҳужумни самарали якунлайди. «Ливерпуль» дарвозасига урган голи бунга мисол бўла олади. «Ҳа, у , Ғайри,табиий ўйинчи» деганди жамоа сардори Коннор Коади Рауль ҳақида.

Рауль Хименес хизматига эҳтиёж сезмайдиган жамоалар бармоқ билан санарли даражада жуда оз. Шу сабабли январь ойида рисоладагидек ҳужумчи излаган «МЮ», «Челси» ва «Тоттенхэм» «Молинью»га серқатнов бўлиб қолишганди. «Бўрилар» чиндан ҳам об,ҳавони ўзгартира оладиган уддабуро ижрочига эга бўлишди.

Қизиғи шундаки, Хименеснинг 2018 йилда Вулверхэмптонга келиши Жоау Моутинью ва Руи Патрисиудек номдор футболчилар трансферлари соясида ортиқча сезилмай қолиб кетди. Боз устига, мексикалик ҳужумчи навқирон ёшда эмасди. У миллий терма жамоада 81 марта майдонга тушган тажрибали жангчи сифатида чўққи сари аста,секин кўтарилди.

Таажжубки, Мексикада ўзига яраша обрў,эътиборга эришган футболчи 27га чиққунга қадар Европа майдонларида бор,йўғи 24 марта майдонга тушганди. Унинг Мексика Олимпия термаси сафида илк бор Англия заминига қадам қўйганига ҳам қарийб 8 йил бўлди. Ўшанда Хименес жамоаси финалда Неймар ва Халкдек ҳужумчилар билан майдонга тушган Бразилиядан олтин медалларни тортиб олганди.

«Олтин медалларни қўлга киритишимиз мен ва бутун Мексика учун тарихий воқеа эди. Шу боис, Лондонга қайтганимда ўзгача фахрни ҳис этаман» дейди Хименес.

Бундан 7 йил аввал Рауль «Ацтека»да терма жамоа либосида майдонга тушиб, Панама терма жамоаси дарвозасини тўпни ўзининг устидан ошириб йўллаган зарба эвазига дастлабки голини нишонлаганди. 1 йилдан кейин «Атлетико»да тўп суриш учун Европага йўл олди.

Олам,олам орзулар билан.

«Футболчилар доимо дунёнинг энг нуфузли чемпионатларида тўп суришни орзу қилишади. Бундай мусобақалар эса Европада. Шу нуқтаи,назардан олганда, ҳозирги мақомга эришишимда «Атлетико»нинг ҳиссаси беқиёс бўлди. Аввалига анча қийинчиликларга дуч келдим. Чунки ўзим ёлғиз яшардим. Лекин янги турмуш тарзига тезда мослашиб олдим. Мақсадга этиш учун сабр,қаноат билан тер тўкиш лозимлигини, ҳатто имконият беришмаганда ҳам тўхтамай ишлаш кераклигини тушундим»

Дарҳақиқат, Диего Коста ўрнини босиш ҳеч қачон осон бўлмаган. Ёзда «Атлетико» Марио Манжукич ва Антуан Гризманнларни харид қилгани вазиятни янада кескинлаштириб юборди. Мавсумни уларнинг иккови 20тадан кўпроқ голлар билан якунлашди. Хименес эса захира ўриндиғини иситишдан нарига ўта олмади. Бу ҳолатнинг уятли жиҳати йўқ. Бироқ у кейинчалик «Бенфика» захира ўриндиғига уланди:

«Асосий таркибдан жой олиш учун Лиссабонда 3 йил уриндим. Баъзан бунга муваффақ бўлардим, баъзан эса йўқ. Вақти,вақти билан жароҳатлар халал берган бўлса, бошқа пайтларда рақобатчилар имкон беришмасди. Хуллас, ўйин амалиётига эга бўлиш осон кечмади»

Ҳозирда АПЛ грандлари Хименесга кўз тикиб туришгани ҳеч кимни ажаблантирмайди. Аммо яқин ўтмишда уни инкор этганликлари ҳам бор гап.

«Атлетико» либосидаги 21 учрашувнинг бирортасида Рауль тўлиқ иштирок эта олмаган , 17тасида захирадан майдонга тушган бўлса, 4тасида бошланғич таркибда майдонга тушган, лекин ўйин давомида бошқа футболчига ўрнини бўшатиб берган.

Ана шу нохуш анъана Португалияда ҳам давом этди. «Бенфика»даги 80та ўйиннинг 60тасида захирадан майдонга тушди. Европадаги дастлабки 4 мавсумнинг бирортасида 1000 дақиқадан кўпроқ тўп суришга эриша олмади.

Шу сабабли нуфузли харидорлар Хименеснинг барча ижобий жиҳатларидан қониқиш ҳосил қилишларига қарамасдан, асосий кўрсаткич , ўйин амалиётининг озлиги шартнома имзолашга имкон бермаганди.

«Биз уни кузатиб юрганмиз. Жисмоний кўрсаткичлар бўйича Рауль инглиз футболига мос эканлигига шубҳа қилмасдик. Лекин ўйин амалиётининг камлиги бизни тўхтатиб қоларди» дейди АПЛ топ,клубларидан бирининг собиқ скаути.

Бу жиҳат мураббийларни ҳам қониқтирмасди.

«Бизга кўп учрашувларда ўйнашни истайдиган ишончли футболчилар керак. Шахсан мен кам сонли таркибдан ҳамжиҳат жамоани шакллантиришни хуш кўраман. Шунда барча футболчиларда етарли ўйин амалиёти бўлади» деди АПЛ мураббийларидан бири.

«Мен истаган футболчини майдонга тушириш мумкин бўлган, менда танлаш имконияти бўлган шароитни ёқтираман. 2та дисквалификация, 4та жароҳати бор, танлашнинг эса иложи йўқ бўлган таркибдан иш чиқиши қийин. Энг сара ўйинчиларни майдонга тушириш рақобатни кучайтиради»

«Муваффақиятли тўп сураётган жамоаларга эътибор берсангиз, уларда ўйинга шай футболчиларнинг кўплигини кўрасиз. Бу борада ўзаро тенг бўлган жамоалар куч синашганда, танлаш имконияти кўпроқ бўлгани ғолиб чиқади. Мана шу арзимас жиҳатлар катта аҳамиятга эга» , бу ақида Нуну Эшпиритунинг қуроли. Бироқ португалиялик мураббий бир неча йилдан бери ўз ўйинини топа олмаётган ҳужумчида ажойиб жангчи сиймосини кўра олди.

Хименеснинг асосий муаммоси унинг майдонга тушишга тайёр эмаслигида эмас, балки майдонга туширмаганликларида эди. Дақиқалар камомади унинг тамғасига айланган бўлсада, Рауль «Бенфика»даги битта учрашувда майдонга тушмади, холос. Лекин фақат 6та ўйинда бошланғич таркибда майдонга тушди.

Бошқалардан кўра кўпроқ хафа бўлганди.

«Атлетико»даги 1 йил, «Бенфика»даги 3 йиллик фаолиятимда мен кўпроқ вақт беришларини сўрадим. Мен ўйинга чанқоқ эдим. Кўпроқ ўйнай олишимни билардим» дейди Хименес.

Маълум бир вақт оралиғида ҳужумчини Мексикага ижара асосида қайтариш ҳақида гап,сўзлар бўлди, «Бенфика» бу вариантни йўққа чиқарди. Шунингдек, Хитойга йўл олиш имконияти ҳам пайдо бўлди. Бу таклифни футболчининг ўзи рад этди:

«Аниқ бир тўхтамга келиш осон бўлмади. Ахир гап миллионлар устида кетаётганди. Бироқ мен таклифни қабул қилиш фаолиятимга нуқта қўйиш билан баробар эканлигини сезиб турардим. Чунки Хитойда тўп суриш Европа билан тенглаша олмаслигини яхши билардим»

«Мен ҳеч қачон таслим бўлмадим. Вақти келиб имкониятга эга бўлсам, ундан фойдалана олишимга ишонган ҳолда табассум билан ишлашда давом этдим. Ниҳоят, нурли кунларга етиб келдим»

Ўтмишга юзланиб, Хименеснинг кўрсаткичларини қайтадан баҳолаш қийин эмас. Масалан, Вулверхэмптондаги муваффақиятини инкор этмаган ҳолда, «Бенфика»даги голларига сарфлаган дақиқалари яхшироқ эканлигини таъкидлаш ўринли. Португалия чемпионатидаги 18та голнинг ҳар қайсисига у ўртача 146 дақиқа сарфлаган. «Ўйлайманки, «Бенфика»дагилар мен ҳақимда ижобий фикрдалар» дейди мексикалик тўпурар.