Халқаро спорт тадқиқотлари маркази - CIES Football Observatory мутахассислари жаҳоннинг 93та юқори лигасида ўйнайдиган 1292та жамоани ўрганиб чиқиб, қаерда 21 ёшдан кичик футболчиларга кўпроқ ўйин амалиёти берилишини таҳлил қилишди. Маълум бўлишича, бу борада Словакия чемпионати 1-ўринда. Мамлакат элит лигасида жами ўйин вақтидан 29,0 фоизи ёш футболчиларга тақдим этилмоқда. Янги Зеландия ва Ирландия чемпионатидаги кўрсаткич ҳам чакки эмас - 28,8 фоиз (2-3-яхши натижа). Россия Премьер-лигаси эса 57-ўринда - РПЛда ёш футболчилар ўртача ҳисобда 11,3 фоиз ўйин вақтига эгалар. Россияда бу борада ЦСКА (56,3 фоиз ўйин вақти) олдинда. Айтиш ўринли, жаҳон миқёсида ёшларга кўп вақт тақдим этиш борасида 11-яхши натижа айнан «армиячилар»га тегишли. Эътиборли томони, Европанинг 4та етакчи лигаси ёшларга ўйин амалиёти бериш масаласида РПЛдан орқада: Германия Бундеслигаси - 66-ўрин (9,8 фоиз), Англия Премьер-лигаси - 74-ўрин (8,5 фоиз), Италия «А» серияси - 76-ўрин (7,7 фоиз), Испания Ла Лигаси - 79-ўрин (7,0 фоиз). Кучли 5та миллий чемпионат қаторига кирадиган Франция лигаси эса жаҳон миқёсида 36-ўрин (15,0 фоиз)ни эгаллаб турибди.