Бутун дунё футболнинг кенг қайтишини кутаётган бир паллада эътиборингизни Осиёнинг келажаги порлоқ футболчилари ҳақидаги мақолага қаратмоқчимиз. Марказий Осиё - футбол тарихи билан бемалол мақтана оладиган минтақа. Бу ердан етишиб чиқаётган иқтидорларнинг келгусида юксак натижаларга эришишларини тахмин қилса бўлади. Яқинда The-AFC.com сайти айнан минтақамизда бош кўтараётган 7 нафар ёш футболчини эътироф этди. Эътиборлиси, улар орасида Ўзбекистондан ҳам икки вакил бор.
Гулжигит АЛИҚУЛОВ (Қирғизистон)
Вингер, 19 ёш, «Қайрат» (Қозоғистон). 2019 йили Қирғизистон термасидаги чиройли ўйинлари билан ном қозонган Алиқулов якунда ўз мамлакатида бош лауреатга айнланди. Ваҳоланки, у 2019 йилги Осиё кубогида қатнашмаганди. Қойилмақом дриблингчи аввалги мавсум ўз клубида ҳам етакчилардан бирига айланди. Беларуснинг «Неман Гродно» жамоаси сафида 23та учрашув ўтказган Гулжигит кейинчалик «Қайрат» (Алмати) сафига қўшилди.
Остон ЎРУНОВ (Ўзбекистон)
Ярим ҳимоячи, 19 ёш, «Уфа» (Россия). Ярим ҳимоя чизиғининг исталган қисмида ўйнай оладиган универсал «Пахтакор» академияси тарбияланувчиси ҳисобланади. Суперлигадаги дебютини 16 ёшида «Навбаҳор» таркибида нишонлаган футболчи кейинчалик Ўзбекистон чемпионатида 50тадан ортиқ ўйин ўтказди. Албатта, мазкур ҳолатда унинг «Локомотив» (Тошкент) сафидаги иштироки ҳам инобатга олинган. Ички биринчиликдаги мазмунли ҳаракатлари билан Россиянинг «Уфа» клуби вакиллари эътиборини тортган Остон ҳозирда РПЛ вакилидир. Унинг жамоаси мусобақа тўхтатилишидан олдин «Краснодар», «Зенит» ва ЦСКАга қарши ўйинларда муносиб кўринди.
Рустам СОИРОВ (Тожикистон)
Ҳужумчи, 17 ёш, «Истиқлол». 2018 йили Малайзияда ўтказилган U-16 тоифасидаги Осиё чемпионатида Тожикистон термаси билан финалгача етиб борган Соиров кейинчалик кичик мундиалда ҳам бор иқтидорини намоён этди. Жумладан, аргентиналик ўсмирларга қарши кечган баҳсда пенальтидан гол урди. Ёшлар жамоаларида ўзини кўрсатишга улгурган футболчи эндиликда катталар даражасида ҳам ютуқларга эришиш ниятида. У ҳозирда бу мавсум ОФК кубогида қатнаша бошлаган «Истиқлол» клуби аъзоси саналади.
Аллоҳёр САЙЁДМАНЕШ (Эрон)
Ҳужумчи, 18 ёш, «Фенербахче» (Туркия). Эронлик юксак истеъдод соҳиби ўз мамлакати миллий жамоаси сафида Сурия термасига қарши кечган баҳсда дебютини нишонлаганида 17 ёшда эди. Универсал футболчи кўп ўтмай, Туркия чемпионати грандларидан бири - «Фенербахче» эътиборини ўзига қаратиб, ушбу клуб таркибига қўшилди. Кейинчалик ижара асосида «Истанбулспор»га йўл олишидан аввал «Бавария» ва «Реал»га қарши кечган ўртоқлик учрашувларида тажриба тўплади. Сайёдманеш нималарга қодирлигини Таиландда ўтказилган U-23 тоифасидаги Осиё чемпионатида намойиш этди, кейин мавсумнинг иккинчи қисмида «Фенербахче»га қайтди.
Жасур ЖАЛОЛИДДИНОВ (Ўзбекистон)
Ярим ҳимоячи, 17 ёш, «Бунёдкор». Осиё футболининг етук футболчиларидан бирига айланиши кутилаётган Жалолиддинов ўтган мавсум «Бунёдкор» таркибида тез-тез кўриниш берди. Суперлигада 20та ўйин ўтказган ҳужумкор ярим ҳимоячи жамоасига етарлича фойда ҳам келтирди. Жасур 2019 йил якунларига кўра, Ўзбекистоннинг энг яхши ёш футболчиси сифатида эътироф этилди. Беларусь термасига қарши баҳсда эса миллий жамоадаги дебютини нишонлади. Асосийси, Англиянинг The Guardian нашри талқинига кўра, жаҳоннинг 60 нафар келажаги порлоқ футболчиси рейтингидан жой олди.
Бекназ АЛМАЗБЕКОВ
(Қирғизистон)
Ҳужумчи, 14 ёш, «Галатасарой» (Туркия). Ушбу рўйхатга тушган энг ёш футболчи ўтган йили ноҳақ белгиланган пенальтини атайин аниқ бажармай, кўпчилик диққатини тортганди. Умуман, Бекназнинг инсонийлик фазилатларидан ташқари, майдондаги ҳаракатлари ҳам мақтовга лойиқ. Туркиянинг энг йирик клубларидан бири ёшлар жамоасида сардорлик қилаётган қирғизистонлик ўсмир июнда 15 ёшга тўлади. У Қирғизистон ўсмирлар термаси таркибида Ливан ва БАА жамоалари дарвозасини ишғол қилишга эришди. Дарвоқе, Туркия клубида маҳоратига сайқал бераётган Алмазбековдан ташқари, «Бешиктош» ихтиёридаги Автандил Дуйшоевга ҳам қирғиз футболи келажаги сифатида қаралмоқда.
Муҳриддин ҲАСАНОВ
(Тожикистон)
Дарвозабон, 17 ёш, «Хўжанд». Ўсмирлар ўртасидаги Осиё чемпионати-2018 қаҳрамонларидан яна бири. Ҳасанов КХДР термаси билан бўлган чорак финал баҳсида 2та пенальтини бартараф этиб, жамоасининг кейинги босқичга чиқишига катта ҳисса қўшганди. Табиийки, салоҳиятли киперни тожикларнинг мундиалга йўл олишларида қаҳрамонлик кўрсатган футболчилар қаторида эътироф этишди. Муҳриддин - Марказий Осиёнинг The Guardian тузган рейтинг бўйича топ-60га кирган яна бир вакили. Айни пайт «Хўжанд» клубида ўйнаётган ёш дарвозабон «Локомотив» (Тошкент)нинг собиқ аъзоси Маъмур Икромовга рақобатчи ҳисобланади.
****
Айтганча, The Guardian 2002 туғилган энг истеъдодли 60 футболчининг номини эълон қилди. Улар орасида Ансу Фати ("Барселона"), Люсьен Агум ("Интер"), Адиль Аушиш ва Ньянзу Куасси (ПСЖ), Малик Тилльман ("Бавария"), Андри Лукас Гудьонсен ("Реал") ва Пабло Морено ("Ювентус")лар бор.
Эътиборлиси, ушбу рўйхатда "Бунёдкор" футболчиси Жасур Жалолиддинов ҳам энг киритилган эди.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20